Zotlang ram nuam

Tun hma kha chuan Mizote kan khawhawi a zim hle ṭhin a, ram dang chanchin hriat hi kan nei meuh lo.

German ral do tura tlangval, sipai lammuala an han intlar put mai te kha tam an ti hle a, hmelmate chu chawh hle turah an ngai, mahse alo ni lem lo a nih kha. Chutiang bawkin ram nuam tak tak hi khawvel hmun hrang hrangah a tam hle a, keini ram, Mizoram ngei pawh hi nuam kan ti. Kan hla phuahthiamte pawn, “Kan zotlang ram nuam hi chhawrpial run i iang e,” an lo ti reng.

Kan pi pute hun­lai kha chuan kan eizawnna a inang tlang a, feha inlawm a, zanah tlangvalten nula an rim a, zawl­bukah an riak khawm ṭhin. Kristian an la ni lo na a, an rin­awmin taima hle bawk.

India rama kan han tel ve hnu hian kan rilru a piangsual ni berin a hriat. Piansualin tlai luat a nei lo an lo tih angin, hnam rinawm leh taima ni ṭhin mah ila, Mizote chu kan lo nawi zo ta. Awlsam taka nei zeih zeih thei kan ngaisang zawk tawh tlat.

Mipat hmei­chhiatnaa inthlah­dah, ruihhlo ti, corruption a fihlim lo kan tam hle. Ei leh barah kan intodelh lo a, Silchar kawng a pin chuan kan ṭam dawn mai zel a. Incheinaah kan sang hle ringawt a, lirtheite chhuak thar apiang kan nei thei ang lawi a, kan nun hi a letling zawngin a ṭha a ni ber mai.

Kan ram laka kan rilru put dan, sawrkar thil kan hmuh dan, vantlang thil kan hmuh dan, ngun takin han bih let teh le.

Mizote chu hnam rinawm, taima, min ti leh mai thei asin.Zoram nuam siam tur hian eng dang vak mah kan mamawh lo, nang leh kei hi rinawmin taima ila, Pathian ṭih a tawk. Dawt sawi laklawh hi chuan kan sawi reng mai a ni. Ram hruaitute pawh an fimkhur a ngai hle.

Israel pawh a tirah chuan thlaler ramro a ni, mahse vawiinah chuan ram intodelh ber pawl a lo ni ta tlat mai.Keini Mizoram chu kan vannei alawm, tlangram chhengchhiaa cheng ni mah ila, ruahtui kan dawng ṭha a.

Central sawrkar pawhin kan duh phawt chuan sum leh paiin min pui thei reng a, min pui mek bawk a. Tichuan, Zotlang ram nuam, ti leh thei tur hian kawng thui vak a ni tawh lo, hmalama kan pen tlan ṭheuh mai khan a ni e.

- Lalchhandama Colney