KAN INTEHNA HI…
Zofate mai pawh ni loin hringfa zawng zawngte leh hnam hrang hrang leh ram hrang hrangte hian intehna dan, ziak leh ziak loh kan nei vek awm e.
Kohhran pawl hrang hrangte pawh hian kan tum ram vanram thleng tur hian intehna kan nei vek a; kan intehna dan hi a inang lo hlawm mai pawh a! Kohhrana harhna a thlen nikhua pawh hian ringtu ṭha leh piangthar ṭha nia kohhran minawlpuiten kan intehna vang pawh a ni mai thei, ṭhenkhat chuan mi aia nasa deuha lam leh taksa chetna chang pawh an awm ṭhin!
Chuti ni loin kan hnathawhna leh eizawnnaah te, kan mihringpuite lakah leh kan ram lakah dikna, rinawmna leh taihmakna ka nei em tihte hi intehna pawimawh zawk atana kan hman uar a hun tawh hle a ni.
Chutiang zelin kristian kan nihna hi kan inkhawm tam lamah leh thawhlawm thawh tam lam ringawta teh loa, HIV AIDS vei tlemna ram a ni em tihah te, eirukna tlemna ram a ni em tihah te, ruihhlo tlemna leh ruihhlo bawiha tang tlemna ram a ni em tihahte pawh kan in teh a hun leh zual viau tawh awm e.
Chu ber ai pawha pawimawh leh chu, a mi cheng tam zawkte kristian kan nih ang ngei hian kan aiawha rorel tura kan thlan ṭhinte hian rinawmna, dikna leh taihmakna an nei tak zet em tihte pawh hi inteh nana kan hmana chutiang ang ram hruaitu kan nei a nih loh chuan a chhunga cheng ringtu intite mualphona a ni tih hria a, kan kohhran member-te pawh kan infuih thar leh zual a ngai ang.
Ram hruaitute hlei hlei hi mi pawimawh an nih avangin mipuite hi an chungah kan mit a fu ṭhup a, an thlekna lam lam hi kan thlekna lam a ni deuh zel a. An intehna leh an inkhaikhinna a zir hian ramin hma a sawnin a sawn lo thei hle ang! An rorel ṭhat loh sawiselna thawm a lo awma sawrkar hmasa rorel duh dan ngaihtuaha an la ṭhat zawkzia thu lam ringawt kan ngaithla fo ṭhin hi chuan thlan an nih chhan hi chu an ṭhelh lian viau a nih hmel!
Tin, hetiang thu ringawt buaipuia party dang chirhtheh nan ringawt puipunna leh funtion pawimawha thusawi ṭhin politician hi chu thlan nawn an niin ka hre lo. Sawrkar hmasa aiin an ṭha bik lo tih pawh chiang viau awm e.
Ṭha zawka ro an rela ram in hma a sawn zawk theih nana thlan anni tih an inhriat a hun tawh hle a ni. Kan ram hian mi ram anga hma a sawn ve theihna tur chuan kan hruaitute hian kan duh tawh loha kan hnawl tawh sawrkar hmasa thil tih dan hi inteh nana hmang tawh loin, Pathian pawh ti ve sek lem lo kan thenawm state thenkhat hruaituten an ram an hruai dan leh rorel dan hi inteh nan hmang tawh teh se..!
- V. Lalchhanhima, Chhiahtlang