CSS Hindi zirtirtute hi
CSS Hindi zirtirtute chungthu sawi tur hian Mizoram State-a Hindi dinhmun leh central sawrkar leh state hmalakna hi chiang taka hriat a ṭulin a lang.
India ram hnam ṭawng hi tih hmasawn leh a zau thei ang bera thehdarh a ṭulin central sawrkar chuan a hria a, kawng hnihin hma a la a. Pakhatnaah chuan, State tinah Hindi thehdarhtu pawl Hindi Prachar Sabha (Samiti) mipuite zingah din a ni a. Assam-ah chuan 1951 aṭangin Rastrabhasha Prachar Samiti tiin Gauhati-ah a din a. Sawrkar ni lovin N.G.O (Tlawmngai Pawl) in a din a ni. Mipui leh sawrkar ṭanghoin a din a, District tinah Prachar Centre a ding.
Mizoramah chuan 1954-ah din a ni a, Mizoram pum huapin kum 69 lai Mizoram Hindi Prachar Samiti din a ni ta a ni. President hmasa ber ka ni ve a, kan mi thiam leh mi liante'n an tuipui a. Pu Sangliana Ex-M.P, Pu Bawichhuaka Ex- C.E.M, Prof Darchhawna, Pu Thuamluaia M.C.S leh mi dang tam takin an hruai a. Prachar Sabha B.A (University Degree ni lo) 2015 khan 1676, Matric 9543 an awm tawh a. Tun ṭum sawrkar hian Secretariat Complex-ah hmun pe-in office ropui tak, nuai za man sak a ni. Central Sanotha Sangh New Delhi chuan Non Hindi Speaking State Prachar Sabha ti ṭha ber lawmman 2015-ah kan Prachar Sabha an hlan a. India ram Hindi Prachar Sabha ṭha zual 23 zingah a tel bawk. Dr. JV Hluna pawh examination chairman-ah hun engemawti a thawk tawh.
Pahnihnaah chuan, sorkar lam chetna sawi leh ila. UT nih tirh laia Hindi Teacher sawm vel lek awm kha sawrkarin Prachar Sabha Praboth pass leh Army Hindi first class-te la-in Hindi Teacher sanghnih dawn lai a la a. Rambuai laia harsatna a lo reh ta bawk a. India ram state-ah hmasawn chak ber zingah kan tel pha. Chuti takin hma sawn mah ila, India ram Hindi lar lohna ber zinga mi hi kan la changkang thei tak tak lova. Non - Hindi Speaking State kan ni si a, Cetral lamin hei hi hriain a bik takin CSS-in zirtirtu min siam sak a; Nagaland nen kan ni awm e. Tuna kan thlen chinah hi chuan tumah dem tur vak an awmin a lang lo. State sawrkar nawrna in School tinah Hindi Teacher an dah a. Hindi Teacher Training Centre siam a ni a, Govt. Hindi Training College-ah hlan kai a ni a. N.E. State dang, Assam tih lohah Hindi Prachar Sabha Office changkang ber an siam a. Kum 20 vel rambuai lai khan Hindi zir ṭhat theih loh a ni bawk nen, a bik taka enkawl a ngai a ni.
Hetih lai hian Central sawrkarin Non - Hindi Speaking Area min duhsakna hi kum ruk vel chauh, kum sawm em pawh a la tlin hmaa tihtawp chi chu a ni lov ang. Tin, thla sawm lai mai hlawh an la lote hi engtizia nge ni le? Zirtirtute pawh chuan an lo tuar rei mang e. An ṭangkaizia kan hre ṭheuh . Eng pawh nise kan Chief Minister-in theih tawp chhuahpui a lo tiam a, CSS hnuaia endiktute pawhin Mizoram sawrkar leh Central sawrkar hmalakna avanga Mizoram Hindi zirna in hma a sawn chakzia leh a la tawk lohzia an hriat chhuah ngei a beisei awm.
Hindi teacher-te hian nitin Home tuitor-ah an tang a, tam takin Hindi bak an zirtir thei bawk. Prachar school aṭang hian kum 2000 aṭang khan Hindi matric (Prabodh) 9543 in an pass tawh. Heng te pawh hi central sorkarin min hriatpui a ṭha awm e. An tel lo chuan Mizoram Hindi zirna hian a tuar hle ang.
- V.L. Nghaka, Senior Adviser, Hindi Prachar Sabha