Hmunawl ren thiam

Tlang ram, hmung chhengchhia leh hmun rualrem lo hmun­ah kan chêng a, hmun rualrem ṭha kan nei tlem. Chuvang chuan hmun awl leh remchang kan neih chhun hi kan ren thiam a ṭul hle.

Hmannia Vang­lainia Lalnghinglova Hmar ziak, Secretariat hmun, an tual rem­chang leh awl rem­chang, a hmun tinuam­tu ber pakhata Apex Bank an sak luah chungchang khan ka rilru a luah zui hle.

Tualzawl zau neih hi in tinuamtu a ni a, office leh a chhehvel tinuamtu a ni. Secretariat hi ka tlawh zeuh zeuh a, a tual zawl pawh a zau nuam viau a, a chhehvel pawh a thawvenga a nuam hle. Amaherawhchu, Apex Bank a han awm ta luah mai hi chu kei pawh ka lo ningin, a hmun khu a uiawm ka ti hle. Hei hian kan thil thlir la tawizia te, thil ruahman kan thiam lohzia te a tilang hlein ka hria.

Mizote rilru ṭhin chu hmun kan neih ang anga in sak khah vek hi a ni ṭhin a, mahse kan kalsan ta hret hret. Tunhma deuh kha chuan kawng kama in sa pawhin kawt tur emaw, motor hun theihna tur ngaihtuah miah loin kan sa khat khup mai ṭhin. Tunah chuan motor hunna tur siam nachang te kan hre ta a, tual neih nawmzia te pawh kan hre ṭan ta.

Secretariat com­pound, hmunawla Apex Bank-in in an sa luah mai hi chu nakkin zelah kan la ning tial tial dawn. Chu bakah, khawi hmunah mah an secretariat emaw, an hmun pawimawh dip zawng emawa in dang an sak luah luah hi a tam lo hle.

Ngaihtuahna kan nei tawi hle a, hmun danga an insawn chhuahna tur zawn thuai a ṭha hle mai. Secretariat hmuna thawkte tan chuan a awlsam rih deuh pawh a ni mai thei a, mahse hun rei zawk ngaih­tuah chuan a hnawk­sak lurh lurh hle.

Hmunawl kan nei tlem a, hmun rem a awm mang lo a, chuvang chuan hmunawl zuah thiam kan zir a ngai a, thui deuh hlek thlir phak te pawh a ṭha. Ngaihtuahna thui zawk leh khawthlir thui zawk neia tura kan ngaihte pawhin hmunawl leh rualrem zuah nachang kan hriat loh mai bakah, a hlutzia kan ngaihtuah pha lo. A awl rem­changah chuan invalh zel mai kan tum niin alang. Chu bakah, New Secretariat aṭang khuan Mizoram sorkarin rua­hmanna a neih chauh­zia te, khawthlir a neih tawiziate a lang. Motor dahnate pawh hi heti teh nuai hi a nia. Hawi nuam tur lam te ngaihtuah miah loin Apex Bank building an han hawng thar leh bawk nen.

Heti hi chuan khawpui thâwl nuam leh felfai ruahman chu kan la hlat hle mai.

- Lalṭhasiam Tochhawng