Chapchar Kut ni parking kha
Chapchar Kut 2017 kha Aizawla Chapchar Kutah chuan mipui an tam ber ṭum a ni an ti a, mipui tam hi hlawhtlinna a nih chuan a hlawhtling hle. Kei chuan a hlawhchham ka ti ve thung a, mipui tana harsatna nilenga a thlenga traffic jam vanga Aizawl khawpui a buai kha Chapchar Kut hlawhchhamna angah ka ngai a ni.
Vanglaini Thlalak tih Facebook group-a Chapchar Kut nia Lammual kawta lirthei an dah kha in lo hmuh ve chuan, kawngpui chanve aia tam an luah a ni. Kha kha No Parking pawh ni mai lo kawngpui a ni a, Chapchar Kut a nih vanga eng vanga lirthei hun phal ta nge an nih, tiin ka ngaihtuah a, Mizote hi dan zah lo tak kan ni tiin ka nemnghet ta a ni.
Inkhawmpui nei apiangin an duhna apiangah lirthei tlan dan an tidanglam pawh lo ngaimawh tawh nen, Aizawla kawngpui pawimawh khatianga an dang chat deuh titih mai kha mipuiin kan tuar hle a ni.
Chapchar Kutah kher loah pawh mipui hian kan thil tih khawmna bulah lirthei park vek kan tum hi a dik lo. Vai rama mipui punkhawmnaa kal tawh chin chuan kan hria ang a, lirthei park na aṭanga minute 20-30 a hlaah kan punkhawmna kan thlen chauh chang a awm ṭhin. Lammualah inkhel a awm emaw, Chapchar Kut a ni emaw, eng thil pawh ni se Lammual bula parking pangngaia leng bak hi chuan hmun dang an zawng mai tur a ni. Parking a hlat deuh chuan kein thui tak an kal mai tur a ni.
Kan pan khawmna hmun bul hnaia lirthei dah vek tum hi sim a hun tawh a, Traffic Police pawhin hei hi chu vawng reng se a ṭha ka ti. Parking hi phal lohna hmun a nih chuan a occassion a pawimawh pawhin khap tho ni se, kea kal ve theih mai hi kan peih loh leh duh loh avangin pun khawmna hmun bul thlenga tlan vek kan tum a. Chutahah motor dahna awm tawh loh hnuah lirthei dahna kan han zawng chawp leh ṭheuh a, rem leh rem loa kan dah luih hnuah meuh chuan midangte tan harsatna siamtu kan lo ni ta ṭhin a ni.
Chuvangin, kan traffic police-te hian mipui tana harsatna thleng zawng ni lo hian hetiang hun pawi hi kan huaihawt theih nan khauh zawkin hma la se ka duh a ni.
Chapchar Kut 2017 kha motor parking aṭanga teh chuan a programme kha a hlawhchham a ni mai lo maw?
- Lalrempuia