PM THUSAWI CHU

Tun hnaia state pangaa Assembly thar din tura inthlan buatsaih chu zawh fel a ni ta mek a, sorkar thar bun a ni ṭan ta. Inrinni-a vote chhiar a nih hnu khan Prime Minister, Narendra Modi chuan New Delhi-a an party pisa-ah 'Hnehna thuchah' a sawi a, thusawi thiam tih takah a sawi ropui leh khawp mai. "He inthlanna result hmang hian mi rethei zawkten hmasawn an duhzia an lantir a, vote hmanga an âw lo lang chu India ram thar dinna atana lungphum pawimawh a ni.

Mi retheite chakna leh, mi narante beiseina lo lang mek chuan India ram chu dinhmun sang zawkah a hlang kai dawn a ni. Assembly inthlan result hi inngaitlawm taka hnathawk tura mawhphurhna min pek belhtu a ni a, thuneihna hi chanvo leh dinhmun sang ni lovin, mi dang ṭanpui tura hun remchang a ni zawk" a ti. Inthlana hnehna hi thil tih tum hlen chhuahna a ni lova, thil tih tum ti thei tura bul ṭanna a ni, a ti bawk.

Politician te chauh ni lo, mi zawng zawng hian PM thusawi hnuhnung ber hi kan ngaihtuah a ṭul hle mai. Thil engemaw tih kan duh a, engemaw nih tumin nasa takin kan bei ṭhin. Hlawhtlin duhin lehkha kan zir a, kan sumdawng a, sorkar hnaah te kan lût a, politics kan khel a, inthlan kan chuh a, thil tam tak kan ti hlawm. Chung thilte chu kan tum vawrtawp a nih chuan thil tum lu bùl, ṭangkaina tak tak nei lo a ni thei.

Officer nih ka tum a, ka ni ta a, eizawnna mai emaw ti-a ka thil tum hlen chhuak taa ka inngaih chuan nun tam neih a har ṭhin. Politician ka ni a, MLA emaw, Minister emaw ka lo ni ta a, chu chu ka tum ber hlen chhuahna a nih hlauh chuan mipuite tan a vanduaithlak ang. Sumdawng pawhin a duh duh lei thei khawpa pawisa a neih hunah a thil tum hlen chhuaka a inngaih chuan an ṭhenawm nih a huphurhawm khawp ang!

Pu Narendra Modi-a chuan, 'Inthlana hnehna hi thil tih tum hlen chhuahna a ni lova, thil tih tum ti thei tura bulṭanna a ni' a ti. Politician te hi an inang lo khawp mai. Mipui rawngbawl duh avanga politics-a lût hi engzatnge kan neih ang a, thuneihna chan veleh hausak leh insawh ngheh ve tuma lût? A ṭhen chuan tum hi kan nei reng reng lo hial em ni aw, a tih theih chang a awm. Donald Trump-a chuan lak luh a nih zanah a thil tum tam tak a sawi nghal a, a tûk aṭangin a bawhzui mai a, kan sorkar tam tak chuan thuneihna kan chanin kan thil tum, mipuite hnena kan zawrh (manifesto) an tih chu kan theihnghilh nghal emaw tih tur a ni thung a, a thuneitu-in bawhzui hek suh, mipuiin bawhzui turin beisei tak tak hek suh, inthlan leha tlin leh dan tur bâk hi agenda kan nei lo emaw tih tur a ni thei.

Engineer-te hian Mizo­ramin kawngpui tlo leh ṭha tak a neih theih nana thawh ve te hi an thil tum ni ta se, Doctor-te hian mipuiten hriselna ṭha zawk an neih theihna tur hi sum leh pai ngah aiin tum tak tak ta se, chutiang zelin sorkar hnathawk kher lo, mi dang zawng zawng hian mahni hmasial ringawt âtchilh lo hian, engtizawng emaw tala kan mihringpuite tana ṭangkaina neih leh, an tana inpêk hi kan lungkham ni ta se, he ram hi a danglam tur a ni. Hlawhtling kan tehna te, tum hlen kan tehna te hi kan ennawn fo a ṭha ang.

Mi dangte tana ṭangkai a hnêka mahni sahmim tipuar tur ngawta hmanhlel, hlawhtlinna hi sum neih zata teh tur emaw ti tlat kan pun zel chuan, he ram hi thim thuah hnih chauh pawh a ni lovang, thuah li thuah nga-in a tuam ang a, mi dang hmangaih lrh duhsak thiam an pun zel erawh chuan, thim leh thawpik a kiang ang a, rethei zawkte tan pawh thawvenna êng a lo thleng ang.

- RK Lianzuala