Minister John Rotluangliana'n kut a thlak lo

MNF Ṭhalai thu­chhuahin, March 8 khan Transport Minister, Pu John Rotuangliana leh a hote chuan Kolasib to Bairabi kawng siamtu ‘Sunshine Overseas Ltd. Company’ a thawk Tipper MZ-01 G-9490 driver leh hnathawktu pakhat chu kut an thlak a, driver zawk hi chu kuai kunin an hnek hial a ni, tia an tarlan chu thu dik lo leh thu hriatsual a ni.

Minister Pu John-a leh mi pawimawhte chuan Bairabi leh Hortoki inkar Rel kawng siam mek chu an tlawh a, hetah hian chanchinbumi angin Pu Alfred Vanchhawng, Doordarshan nen Aizawl aṭang kan zui a. Kolasib aṭangin Pu H. Vanlalnghaka, Door­darshan pawh a lokal ve bawk a ni.

Kolasiba tukṭhuan kan ei zawhin Bairabi panin kan kal a, Minister a kal hmasa ber a. A dawtah Parliamentary Secretary Pu Hming­dailova Khiangte leh Pu TT Zothansanga ten an zui a, a hnungah Pu Vanlalvena MLA te leh mi pawimawh dangte'n an zui a. Keini pawhin an hnung deuhah kan zui ve zel a. Rengtekawn to Bairabi kawng ṭhenkhat chu Sunshine Overseas Ltd. ten black-topping hna thawkin rah phal loh chinah duty an lo indah a. Truck pakhat chuan alkatra chhuan tui sa chu a bawm (tawlaitir-ah) chain hmangin a hnuk a. Minister leh Parliamentary Secretary chuanna motor-te chuan a tlan pelh tawh laiin truck-in alkatra a hnuh chu a chain a dawk a, a thil hnuh chu kawng chhukah a lir ta chiam a, luikawrah a lir lut a. Alkatra phurtu taw­lailir tlan ta chiam chuan Pu Hrangtawna, Consultant motor hnung bumper a tai rang a, Pu Hrangtawna te chu dingin keini pawh kan ding ve a.

Engtizia nge tia driver chhuk tura an tih khan a chhuk duh lo a, kan zinga driver pakhat chuan a luhchilh a, a chhuk duh loh vangin mi pakhatin a han pawt thla a, kut a thlak pawh ka hmu lo. Pu Hrangtawna chuan thil awmdan a zawt a, Transport Director Pu Remmawia chuan a driving licence laksak turin Kolasib DTO a hrilh nghal a, a tuka Kolasib DTO hnena lam turin an ti ta a ni.

He thil thlengah hian Minister Pu Johna hian kut thlak chu sawi loh, truck driver a motor hnunga lo chhuk tawh hnuah a motor aṭangin a rawn chhuak ve chauh a, Pu Hrangtawna mo­tor chhiat leh chhiat loh a rawn en a ni. Parlia­mentary Secretary pahnih phei chu an lo chhuak lo niin ka hria.

MNF ṭhalai thu­chhuahin Minister leh a hoten driver leh mi pakhat kutthlak anga an tarlan chu thu dik lo, an thu dawnna dik loh a ni a, driver erawh chu Minister zuitu zinga pakhat chuan kut a thlak ngei a, a thlak chhan pawh a thil hnuhin pawi a khawi a, en tura an tih pawhin a chhuak duh tlat loh vang a ni. Midang phei chu kutthlak an awm hriat a ni lo a, kut inthlak lai hi Minister-te hian an hmu hman lo hrim hrim.

Hei erawh sawilan ṭhain ka hria. VIP motor khalhtu leh anmahni zuitute hi an tlan chak tlangpui a, motor dang a tawk zawng leh a lehpelh tura tlan tan hmanhmawh a ngai a, VIP motor khaltu polite lo tak tak an awm nual ṭhin. Chuvangin, VIP motor khaltu leh zuitu ka ni, tih vanga mi laklawh hre lo khawpa inti VIP phur leh zuitu angin an lang ṭhin.

VIP motor khalhtute reng reng hi uluk taka training pek a ṭha khawp mai. Hei hi tuna thil thlen vang pawh ni loin, a ngaihmawhawm zawk vangin zirtirna pek an ngai hle a ni.

- Lal Rinmawia