Hnam dang ngaimawh tur a ni em?

Central YMA hruaitute, MZP leh MSU hruaitute, MHIP leh MUP hruaitute chuan an member te rawn zauna pawh nei eih lovin Mizoram Chief Secretary Renu Sharma office kal tur dan an tum a. Tiam chin awm lova dana Chief Secretary-ah Mizo ngei dah a nih hma chu dan an tum niin a lang a, Mizote tana mualpho theihtawpa muakphona thutlukna an siam hmaa an member te rawn zauna pakhatmah an neih loh avang hian he thilah hian YMA member ka nih ve avang hian lungawi lo ve thei ka ni.

Ka pawl hminga Chief Secretary chu racism rawng kai ang taka ngaih theiha "Mizo a ni lo" tih tehna hmanga dan/ hnawh chhuah an tum thu hriat hian ka zak ngawih ngawih a ni.

Citizenship Ammend­ment Bill buaipui lai khan kan duh loh em avangin Republic Day pawh boycott kan inhuam a, kan lungawi lohna a sosan tak tak hnu khan vawi khat in biakah khan kan hotute khan an dinna kha an sawh sawn zung zung tawh tih la hre reng tu tán leh, Kamrul-a'n Mizoram sorkar hnuaiah cheng nuai hlir 8000 man chuang hna a thawk chung pawhin kan NGO lam hi an ngawi reng tih thute social media lama a document nena an tarlan han hriat bawk nawk bawk hi chuan kan ramah hian pawl hrang hrang awm hi a ṭulna a awm em ni le?

Kan pawl hruaitu ṭhenkhat sorkar hnathawkte an lo ni nawk a, a tak taka sorkar do ngam lo tur an nih bakah kan pawl hruaitu thenkhat ten sorkar hnuaiah hna an lo hmù ve lehzel tih thuthangte hian awm a ti nuam lo a ni. Engpawhnise mimal in kan NGO hruaitute hi dem tur pawh an ni lova, he i phenah hian eng thil nge awm? tih hi chhui chhuah tum ta zawk ila, kan NGO te hian an General Conference leh General Body Meeting naah "Chief Secretary ah Mizo ngei ni se," tih an rel kan hriat loh laia CS dan tumna awm thut hian dâwn a ti sei a ni.

Social media thenkhata Chief Secretary Renu Sharma hian Restricted Tender a sign duh lo an tihte phei hi chu keini va hriat ve phak a ni lova, thudik pawh a ni kher lovang. Keini zuk hriat ve phak chinah chuan tunah hian CS ni thei hi Mizo zingah kan nei lova, kan neih ber pawh hi AMGUT lama mi a nih si loh avangin insaan turin buaithlak a tam an tia, chuvangin kan duh emaw duh lo emaw AMGUT lama mi hnam dang CS kan nei dâwn tho a, lo dan tum ting tang tawh lova lo welcome thiam hi i zir ang u.

Tunah hian NGO hian kan CS dan tum hi an la titawp lova, CS hian leave a lâk avangin an ṭhulh lailawk niin kan lo hre ve a, ṭhulh hlen thei se kan hnam tán a mualpho thlak loh deuh vang chu. Kan hnam hian hnam dang thawhpui thiam kan zir a ṭul a, kan hnam hian hnam dang tela khawsak kan zir a ngai a, hnam dang kan duh loh tur chu buhfai supplier Abu Mazumdar tih te, kuhva smuggling lama mi te, ruihhlo tawlha mite, supplier leh contractor hming hawhte hi ni zawk se Chief Secretary dan tum chu ṭhulh vang vang ang u.

- Mahlima