RUIHHLO LEH SUM EIRUKNA

Kan hun tawn mek kan thlir chuan kan tunlai boruak tawn mek hi kan lungawi chiah em tih hi zawhna a ni. Eng chu nge kan inzawhna chu tita ila, kan ṭhalaite ruihhlo hian min run nasa em em mai hi a mangangthlak takzet a ni.

Sawrkar mai ni lo NGO hrang hrangin an do nasa a. Ruihhlo a bikin zu leh damdawi hi kan chhiatpui nasa zual a. Mi tam tak nih tur ang nih phak loh phah pawh khaw tin leh veng tinah an awm ngei ang.

Myanmar sorkar buai avangin kan ramah raltlan an rawn lut thla nasa a, raltlan zingah hian remchang la a ruihhlo a bikin Herion a ruka rawn kenglut an tam thu leh, kan khawtualah tunah hian tun hma lama manto taka an zawrh ṭhin kha man tlawm te te in an zuar a, chung chu kan ṭhalaiten an ti nasa viau niin alang. Rangvamual panna kawng dungah nitin zantin ruihhlo ti leh zuar hmuh tur an awm a, ramdang mite lo hmuh atan pawh zahthlak khawpin kan kawtlaiah kan ṭhalaite ruihhlo ti hmel hmuh tur awm hi kan en liam mai hi a tawk ta lo.

A bikin damdawi hmansual avanga kan ṭhalaite harsatna hi sorkar, kohhran, khaw­tlang nu leh pate nena doa kan ṭanho a ṭul takzet ta a ni.

Chutih mek laiin ruihhlo man chungchang tarlan apiang maia "Eiru man ve tawh rawh se" tih lam hawia comment tam tak awm ṭhin hi a post-tu mai ni lo, a mantu tan pawh hian chhiar a hrehawm ṭhin ngawt ang.

Miin hna ṭha tak thawka an inngaih laia an beisei loh lutuk chhanletna an hmu ṭhin hi chu an khawngaihthlak zozai ṭhin khawp mai.

Engvangin nge kan duhkhawp loh? Damdawi leh zu hi chuan mihring a nih tur ang a nih loh tir a, eirukna erawh chuan ram a nih tur ang a nih loh tir thung a ni. Hetia ruihhlo man chungchang post a awm apiang maia eirukna chungchang sawia comment ṭhintute hian ruihhlo man kha pawi an ti tihna lam a ni lo. Sawrkar (Police/ excise etc) leh NGO a bik takin YMA te'n ruihhlo man tura tha leh zung an sen ang hian ram leh hnam tana pawi zawk eirukna do kawngah hian tha leh zung seng ta se kan ram hian a hlawkpui zawk ang em? Ruihhlo an man hi a ṭha lo kan tihna a ni lo a, ruihhlo lo zawk pawh hi man ve tawh se kan ti a ni ber mai.

Ruihhlo zu leh dam­dawi te chu a langsar a, man a harsa lo, eirukna nen chuan khaikhin chi a ni lo kan ti pawh a ni maithei. Chu pawh chu lo ni tehreng se ruihhlo do tura an tha sen zahve tal pawh hi sorkar emaw, NGO emaw hian eirukna do kawngah hian a seng tawh em? Kumpuanah te hian 'Ruihhlo leh eiruk do' te hi kan hmang ve ngam dawn tawh em?

Tih tak emah chuan eiru ni kan rinhlelh pakhat tal hi ruihhlo zuara an rinhlelh te an tih ang hian ti ve chhin se, an inlum aṭanga hruai chhuakin khawtlang mipuite hmuh ngei turin lang chhuak ta se, ruihhlo zuar kan dawp ang hian zankhuain han dawp ve ta se an beisei aia ṭha in an inpuang ve mai lo'ng maw?

Kan ram hi chhantlak a la awm mahse vei tur dik kan vei em, ṭangruala kan do tur ruihhlo leh sum eirukna hi kan hnualsuat a, kan umbo ngam ava hun ta em.

- Lalnunzira Chawngthu