Kuhva tawlh rukah ṭang ulh lo teh u

Kuhva tawlh ruk chung­changa Vanglaini chan­chinbua Mamawitea thu ziak "Kuhva tawlh rukah ṭang ulh lo teh u" tih kha a thu a ṭhat rualin thlirna tlang dang aṭanga thlir a ṭul ve tlata hriatna ka nei. A thusawi ka pawmpui leh pawmpui loh lai te ka rawn thur chhuak ve ang.

"Kuhva tawlh ruk an sawi hian kan party min bei emaw kan tih tlat tawh chuan kan party lam zawk hi i inenfiah tawh ang u. Kuhva tawlh hi mi tam tak eizawnna a lo nih pawhin chu chuan Mamit leh Kolasib District chhunga chhungkaw tam tak eizawnna a tih chhiat si avangin tihtawp nghal vat tur a ni.

Central YMA lo chu rin ngam tur pawh hriat an har tawh a nih hi kan ram hi. Kuhva tawlh ruk kan sawi dek deka sorkar bei emaw ti tlat leh, kan party min beihna emaw ti tlat kha chuan a dik lo zawk in ṭan tih lo inpawm phawt mai ula, lo ṭang ulh lo teh u," a tih hi chu 100% in ka thlawp a ni. Hei hi chu sawi fiah zui ngai lovah kan dah thei ang.

A thu ziak pakhat zawk, "Mithiam inti leh midik tia kan lo hriat ṭhinte pawh an chhung te, an ṭhiante leh an lam hnai kuhva tawlh ruka inhnamhnawih an awm chuan an chhan (defend) ngar ngar ṭhin tih pawh ka hmu chhuak," a tih hi chu ka pawmpui ve lo thung.

Mi thiam inti leh midik inti han tih ṭawngkam hrim hrim hi ṭawngkam mawi lo a ni nghal phawt a, "mithiam kan tih zinga mi pawh" tiin emaw, "Mi dik nia kan ngaih zinga mite hial pawh," han ti se chhiar a nuam deuh tur a ni a, a ṭawngkam hrim hrim hi 'chaltlai' lam rawng a kai a ni.

Miin smuggling a defend char char chuan mi dik an ni lo tihna a ni zawk a, miin smuggling a pawm, chuan mithiam pawh a ni lo tiin i sawi zui zawk ang u.

Kuhva rah tawlhah hian tute nge hlawk tih chu kan hriat ve phak a ni lova, smuggling a nih hrim hrim chuan kan do a ṭha a, Mizoram hi smullger-te van­ramah a chan lohna turin kan ṭan rual a ṭul tawh zawk a ni.

- KC Lalthlanawma