Office tlai leh corruption
Kan Zoram office-a thawkte hi regular takin a tam ber chu kan tlai a ni ta ngawt mai a. Zing dar 9-a ṭan tur tih chu dar 10 hma chuan hmuh tur an la awm lovang, tih hi ṭawngkam tlang lawn a ni ta mai a. Hotute pawhin kal tlai chu explanation call tur an tih lah chu a sawt lem lo.
Kum 1957 vel khan Assam Civil Secretariat, Shillong-ah ka thawk ve ṭhin a. Development Department-ah LDA-in min dah a, office kal tlai kan tam hle ṭhin a. Kan Development Commissioner chu A.N. Kidwaia I.C.S a ni a, dar 10:5-ah office a rawn tlawh kual vek a. A lo la awm lo chu "Tlai dar 7-ah min rawn hmu rawh se," tiin kan Bora Babu a hrilh ṭhin a ni.
Ṭum khat chu ka ṭhianpa Pu Pianga a tlai ve ta hlau mai a, tlai dar 7 nghakin a ṭhu ta ran mai a. A tukah ka zawt a, "Kan pu office-ah ka va kal a, Peon-in a inah a haw thla tawh, zuk hmu rawh, a lo ti a. Gold links-ah taxi-in ka tlan thla a, ka pu ka lo kal e," ka ti a. "A ṭha e" a lo ti a, "Tlai lehna chi a ni lo" a ti a. Tlai kan awm ta ngai lo.
Mizoram sawrkarah Education Officer-in kum 20 vel ka thawk a. Kum 1986 vel khan kan Chief Minister Pu Lalthanhawla'n "Office Cashier chu kum 3 a thawh chuan thlak zel tur," tih a chhuah a. Kan Department chu 1997 vel khan corruption thu-ah officer tam tak an buai ve ta a.
Ka theih angin ka zawt kual a, Cashier kum 3 aia tam chhawr vek officer buai an ni tih ka hmu tlat zuk nia. Tunlai hian engtak nge kan nih ka hre ta lo.
- V.L. Nghaka, Ramhlun