CHAMPHAI YMA THUCHHUAK
Tun thla ni 14-a Champhai Sub-Hqrs. YMA rorel inkhawm, Champhaia neih chuan thil tam tak an rel a, chung zinga pakhat chu BADP sum hmanga hna chi hrang hrang thawhnaah sum ruahman za zela 60 tal, a taka hnathawh nan hman a nih theih nan YMA-in ṭan la rawh se tih a tel. BADP hnuaia hnathawhna atan sorkarin sum tam tak tak a ruahman a, mahse a thawktuten an hlep tam lutuk vang emaw, chhan dang vang emaw-in a taka hnathawhna atana sum hman chu a tam ṭhin lova, hna-in a tuar ṭhin tihna a ni ber ang.
Hei hi YMA chuan ṭha a ti lova, hnathawh chu ṭha se a ti a, a thawktute hlèp emaw, thil danga riral emaw pawh a tlem thei ang ber ni se a duh a ni. Hetiang thute hi YMA-in a rèl a lo ngai ta hi a mak khawp mai a, tangka âtchilhte hian thil dang zawng zawng chu kan pawisa lo fai vek ta em ni, a tih theih hial ṭhin.
BADP hnuaia hnathawh chauh a ni lo. Contract hna thawh reng rengah hian a ni vek ti ila a dik hial awm e. Cheng nuai khat manah hian a zatve chu sawi loh, hmun li-a ṭhena hmun thum vel hi hnathawh nan ni lo, hlèp leh thil dangah a riral hial àwm mang e, tih tur a ni ta a, hlâwk kan tih hi a uchuak ta lutuk deuh chu a ni. Cheng nuai khat manah cheng sing riat emaw tal hi hnathawh nan hmang ila chuan kan hnathawhte hian belh chian a dawl deuh ang a, a tlo ang a, a rintlâk ang a, a thawktu tan pawh damlai lungphun, chawimawina kumhlun, fak hlawhna tlo leh nghet a ni mai tur hi a ni a, sum ruahman zatve kan hman chuan 'Ka chhe vek' kan ti tawh mai chu a ni a, Kristian kutchhuakah chuan kan kutchhuakte hi a zahpuiawm ta lutuk deuh a, kan sulhnu hian kan hming a tichhe mek a ni. Hausa hmingchhia nihte hi kan thlahlel zel em ni le? "Sum tam tak aiin hming ṭhat hi thlan zawk tur a ni" tih hi Mizo Bible aṭang hian kan nâwt reh dawn em ni?
Hetiang chi thunun leh, hna a ṭhat theih nana dan ken kawh chungchangah hian tunge mawhphur ber tih pawh hi hriat a har tawh a, a thawktute tih apiang hi thuneitute hian an pawm ta mai nge, a viltu sorkar hnathawkte pawhin an pawm ve mai em ni? An pawm theih nan tihlungawi an ni nge, pawm lo thei lo khawpin a chung leha miten an ṭhut bet zawk em ni? Khawtlang hruaitute tal hian tih theih an nei em? Nge, hnathawktute leh a viltute hian 'Hetianga in phunchiar dawn chuan in khuaah hian hna kan rawn thawk tawh ngai lo ang' tiin an vau lêt thei hial? A mal malin kawm ta kauh kauh ila, kan inkâwk kual ṭhúmin a rinawm a, a tawpna chu 'hna chhe tak leh tute emaw hlâwk lawih' te hi a ni mai bawk si. Heti lutuk te hi chu nun leh chhungkaw kal zelah mal a sáwm lovang tih te hi kan hlau lo em maw ni, tih thlengin a ngaihtuah theih a ni.
A tawpah chuan, thil dang ang bawkin YMA an rawn ṭawng chhuak leh ta a, mangang auráwl bawk a ni. Hmasawnna hnathawh vil emaw, an sum sen zat tur vel bithliah emaw hi YMA tih tur a ni hauh lo. Mahse zu leh ruihhlo thu te, gas bur tihchingpen te, tuialhthei peng bo tur ven te, ILP nei lo hnam dang dap chhuah leh thil dang ang bawkin, tih lohva a awm miau si chuan, "Âk-a, nang han che leh rawh le" kan ti leh lo thei ṭhin lova, YMA hian, 'Keia hmuite hlir mai... tlawmngaihna leh zonunmawi humhalh tih bâk hi zawng kan ngaihven hman bik tawh love' an ti mai ang tih hlauhawm tak a ni ta.
Rev. C. Chanchinmawia'n Revival Speaker ho chungchang a sawinaah, "Kohhran a ro tak tak chuan pay scale nei lo bawk hi a ni kan pun leh ṭhin ni" a tih ang deuh khan, Mizo khawtlang nun leh thil dangah pawh, thil harsa leh buaipui ngai deuh tak tak a awm chuan, "Hlawh nei lo leh uniform ha lo YMA bawk....." hi kan vauchher ber chu a ni rih zel zawng a nih hi.
- RK Lianzuala