Two wheeler taxi-a hman dan chungchang

Two wheeler taxi-a hman theih chungchang chanchin­bu-ah te kan lo hmu a, a ṭha ka ti hle. State ṭhenkhatah pawh an hman thu, a ṭhatzia leh a awlsamzia an sawi.

Two wheeler taxi hi a ṭhat rualin a famkim lohna, mipa-in hmei­chhia a phur thei lo hi chu a fel theiin ka hre lo. Mipa-in a nupui emaw a fanu emaw a phur thei dawn lo a ni ang a. Tin, hmeichhia-in a pasal emaw a fapa emaw a phur thei dawn lo a ni a, hei hi a famkim lo hle-in ka hria.

Sorkar leh Trans­port thuneitute hian ngaihtuah chiang leh ta sela. Four wheeler taxi-ah pawh phurh thian vek a ni si a, enge maw a chhan ni ta ber ang le?

Lenkual nan an hmang ang e tihna em ni ang le? Four wheeler hlei hlei in lenkualpui nan chuan a ṭha zawk awm si a. Tin, a phurh man (fare) pawh hi km 1-ah Rs. 10 tih pawh hi a tlawm deuh mah mah lo maw? Taxi kan hman dan te nen hian han khaikhin ila.

Tin, Aizawl permit nei tan khawpui chhung ringawt ni lo, khawpui pawn te pawh pelh phal ni se, khaw ṭhenawm a mitthi ral lawk nan te pawh a ṭha hle awm si a. Tin, veng kil tinah a stand awm vek sela. Veng kilkhawr, nuho bazar lawk nan emaw te pawh a awlsam hle ang. Kan khawpui chep lutuk pawh a zia phah zawk ngei ang.

Dawr neitu car nei, bazar kawngpuia dah ṭhinte hian dah tawh lovin driver neiin emaw anmahni garage-ah dah kir leh zel se, kan Aizawl traffic tawt lutuk hi chu a ziaawm ngeiin ka ring.

- Vanlalsiama Fanai, Electric Veng, Aizawl