IAS NIH KHER A NGAI LO
Tun hnaiah India rama hna sang exam result a chhuak a ni awm a. Mizo tumah an tel lo niin a lang. Chuvang chuan, mi ṭhenkhatin Mizo nula leh tlangvalte an nauin an deu va, hnam pum anga mualphona ni thei hial pawhin ṭhenkhat chuan an sawi a ni awm e.
He thil hi a veitute tan chuan veiawm ve tak mai a ni mahna; mahse, UPSC Exam result chhuah apianga IAS neih lo tum ve ngawt ṭhin hi a dik lem lo. HSLC Result chhuah apianga exam ve lo, fate hnena, "HSLC pawh pass ve hlei lo," tia lo hauh kum tin ve ziah ang deuh a ni. Exam tam tak pawhin an fail a nia, exam lo phei chuan engtin nge a pass theih ang!
Miin IAS nih tum lova MCS nih a tum zawk chuan a ni mai a. A tum loh zawk a nih loh avanga hauh kher kha a ṭul em ni? MCS te dinhmun hi state sawrkar hnuaiah hian a nuamin a ṭha em a, IAS nih kher a ngai lo. Duh leh chief secretary-ah chuan hnam dang pawh ṭhu ang hmiang, MCS ho hian an awt vak lo niin a lang. 'Ram mipuite hian an phu tawk ram hruaitu an nei zel a ni,' an tih hi a dik a nih ngai chuan, ram mipuite hian kan rilru phak tawk leh kan phu tawk officer pawh kan nei a ni tih hi i hre ngam ang u hmiang.
A thu hrimah, mahni ramri kan lova, officer lian tawk ve tak nih a, chhungkaw enkawl theih tho chuan IAS nih kher hi a ngai lo. Mahni khaw pela hnathawh hi hrehawm deuh asin. Mi tak tak chin deuh tih mi a ni!
IAS neih tam hi kan duh tak tak chuan sawrkar hian MCS exam hi kum 10 chhung titawp se la, chumi kum 10 chhung chuan IAS nih ṭhatzia kan hre chiang ang a, kan nula leh tlangvalte an IAS leh sup sup mai ang chu!
Tunah chuan, IAS tlukpui deuh thawin MCS dinhmun kan dah sangin kan dah pawimawh a, an service-ah lah chuti bawk. An thawh rei deuh hnuah IAS nihna an pe leh tho a, IAS pangngai nen inang chiah chiah lo mah sela, a tawpa IAS an nih leh tho zel avang pawh hian IAS nih nghal hi a ṭul lem tlat lo.
Chuvangin, IAS nih kher hi a ngai lova, a ṭul viau lem lo. IAS lo pawhin eiru thei dinhmunah a din theih tho; an eiru tihna ni loin... An thuneihna a sangin a pawimawh tho bawk. IAS nih kher hi a ngai lo atin a ni.
- K. Lalremruata