Kum thar thutiam (New Year’s Resolution)

Kum a lo thar hian khawthlang lam mi, hnam fing zawkte chuan Kum Thar Thutiam neih an uar hle a, ‘New Year’s Resolution’ an ti ṭhin. ‘Ka thil tih ṭha lote ka bansan ang’ emaw ‘chumi kha mi chu tih ka tum thar ang’ tiin thutiam an nei ṭhin. Kum a lo thara miin hmasawnna engmah a neih loh chuan ‘mi hmasawn lo’ a ni ṭhin. 

Motor-a kan chuan chuan kawng sira thingkungte chu hnung lam pan zut zut angin kan hmu ṭhin. A hma lawka kan hma lama thingkung awmte pawh reiloteah a awmna hmun kan tlan thleng a, chuan hnung lam pana tlan angin kan hmu zui bawk ṭhin. An awmna ngai rengah ding mah se hma lam kan pan miau avangin hnung lam zawnga chak taka tlan angin kan hmu ta ṭhin a ni. Hetiang chiah hi mihring nun chu a ni e. 

Intlansiakte zinga mi pakhat chu hma lamah tlan ve lova a din tlat chuan (hnung tawlh lo mah se) a tlansiakpui, hma lam pan mekten reiloteah an tlansan thuai ang a; an kar a hla tial tial ang a, a ṭhiante hma lam pan rengte avangin ‘mi hnung tawlh’ a lo ni mai dawn a ni. Mihring nun intlansiaknaah hian hma lam pana kan tlan ve pang pang reng a ngai a ni. “Hmasawnna” nia kan ngaih hi mi mal tinah a inang lo thei hle ang. Mi ṭhenkhatte tana hmasawnna ropui tak kha ṭhenkhat tan erawh hmana an lo neih sa leh tih sa a ni thei. Chuvangin, kan thlen chin ṭheuh aṭanga hma sawn dan kan ngaihtuah a ngai. Hmasawn turin upa lutuk a awm thei lo a, naupang lutuk pawh a awm theih loh ang. 

Kum thar thutiam chu... Kum 2020 a lo thleng ta. He kum thar hian chhiatna nge a rawn thlen dawn a, malsawmna kan hre lawk lo. 

Eng pawh ni rawh se, eng kawng emaw talah he kum tharah hian hmasawnna tur ruahmanna kan siam dawn lo’m ni? Lian lua leh te lua a awm thei lo ang. Kum thar thutiam, hmasawnna thlen thei tur eng ber nge kan siam ang le? 

Heng a hnuaia mite hi mifing pui puite pawhin an kum thar thutiama an lo hman tawh ṭhin a ni. Mi tam takin an tihlawhtling a, hlawkpui an tam tawh asin. 

1.     Zial zuk ka sim ang. 

2.     Zu in/ drugs abuse ka sim ang. 

3.     Lehkhabu chhiar ka uar ang.

4.     Excercise lak ka uar ang.

5.     Ka chhung leh kuate bula awm tam deuh ka tum ang. 

    Heng bakah hian Mizoramah chuan 

    hengte pawh hi thutiam Ṭha takte an ni:

1.     Social media hman tlem deuh ka tum tawh ang.

2.     Zing thawh hma ka tum tawh ang.

3.     Kawng engkimah taimak lehzual ka tum ang.

4.     Zuk leh hmuam sim ka tum ang.

5.     Inkhawm tam ka tum ang.

6.     Thlai hmun ṭha tak ka siam ang.

7.     Ka thlai hmun awm sate kum dang aia ṭha lehzuala enkawl ka tum ang.

8.     Chumi hmun/ khami hmun tlawh ngei ka tum ang.

9.     Ka thinchhe lutuk hi sim ṭhen ka tum ang. 

Kum 2020 hi awmze nei lova liamtir loh hram i tum ang u hmiang.

- Zomawia Khiangte