Ram kang leh Mizoram

Mizoram sorkar chuan February thla chawlhkar hnihna (10th-15th) chhung hian Fire Prevention Week hman leh ni se, a ti a. 

Hemi chungchang hi State Level Sub-Committee on Fire Prevention chuan January 21, 2020 khan Environment, Forests & Climate Change Deptt. changtu minister Pu T.J. Lalnuntluanga kaih­hruaina hnuaiah sorkar department hrang hrang aiawh leh NGOs aiawhte’n Secretariat Conference Hall-ah an rel a. Thupui (theme) chu “Kangmei chhuak tur veng la, i ram chhan rawh” tih a ni a, Chief Minister Chairman-na hnuaia din, State Level Committee on Fire Prevention chuan heng rawtna te hi an lo thlir nawn leh dawn a ni. 

Kan dinhmun: Kum 2019, January aṭanga June thla inkar chhung zawng khan Mizorama kangmei chhuak zawng zawng (bawlhhlawh hal te nen), Forest Survey of India (FSI)-in satellite kaltlanga a chhinchhiah dan chuan kangmei hmun (fire point) 9490-ah a chuak a. Ramkang ṭhenkhat chu a kikawi leh zauh dan a zirin satellite hian fire point 6 laiah te pawh a hmu ṭhin. 

Nikum (2019) chhunga kangmei chhuak satellite-in a hmuh, a hmuna endik chin, 90% vel aṭanga a lan danin Mizorama kangmei chhuak zat hi a vaiin 1452 a ni. Heng zingah hian hmun 1357 chu lo hal a ni a, hmun 12 chu ramkang niin, a dang 83 chu Cha hal (debris burning) leh bawlhlawh hal a ni. Lo hal vanga kang zau zawng hi 4773 Ha. niin, ram kang zau zawng hi 60 Ha. a ni. 

Kan hmabak: Kum hmasa lama lo tih ṭhin tawh angin kum 2020-ah pawh hian March ni 15 aia tlai lovah lo hal vek tur a ni a. Lengpui Airport chhehvel khuate’n chawhnu dar 3:00 hnu lamah chauh hal tur a ni thung. Hriattirna hi district tina DC ten lo chhuah tura ngen an ni a, thupek zawm lo chu danin a sawi anga hremna pek ngei tur an ni bawk. 

Kangmei ven kawnga district tin hmalak dan, Moni­toring & Evaluation nei tur hian NGOs hrang hrangte ruat an ni leh a. District hawn thar, Hnahthial, Saitual leh Khawzawl district-te pawh Monitoring Team hian an hma tel dawn a ni. 

Ram kang ven kawnga district ti ṭha pathum leh district tina Village ti ṭha pathum te hnenah lawmman (award) siam leh a ni dawn. District leh Village level-ah lawmman Rs. 50000, Rs.30000 leh Rs.20000 te siam a ni. 

Kum 2009-a Chief Sec­retary-in Office Memorandum hmanga hriattirna a lo tih chhuah tawh angin, Local Council/ Village Council tinah Village Fire Prevention Committee din theuh turin District Level Committee ten hriattirna pe thar leh vek tura tih an ni bawk. 

“Kangmei chhuak tur veng la, i ram chhan rawh”