BIHAR A LO DANGLAM TA
Kum 1999-2004 thleng khan Bihar-ah ka awm ṭhin a, chung laia Bihar leh tuna Bihar chu danglam tak a ni. A chhan bulpui ber nia lang chu an Chief Minister pahnihte inan loh em vang a ni.
Kum 10 zet kal taa Bihar chu chhe tak a ni. Dan leh thupek a chhiat em avangin sumdawng hausa te, sawrkar hnathawk te, zirlai te leh a thei apiangin hmun him leh nuam zawk panin an chhuahsan a ni ber. An ṭhalai nuai tel teh meuhin inhlawhna ṭha zawk dapin Bihar an chhuahsan bawk.
Patna khawpui hlun leh lar, India history-ah pawh hmun pawimawh tak luah ṭhin chu a chuaiin a chul a. Dan bawhchhiatna leh thil ṭha lo a thlen pawhin, ‘Bihar a nih hi’ (This is Bihar) tih hian a hrilhfiah nghal veka ngaih a ni ṭhin. Inthah, inruk bo, inrawk, pawngsual, invau etc. chu chanchinbu ṭialtu a ni ṭhin. Economy lamah lah “State hausa, mi rethei tamna ram” (Rich State with poor people) tih a ni bawk.
Chutih lai chuan Bihar ram leilung fa, New Delhi leh Patna dai kawp, central lama finna pur zu chaw mek, Nitish Kumar-a chuan a lawng chu Bihar lamah a rawn khalh lut ve ta a. Ruling leh Opposition-a a awm chhung zawng zawngte kha zir nan vek a hmang a ni tih hriat takin hma a rawn la a, inthlanpui a lo thlen meuh chuan rorel lai Party chu lehthalin lal-ṭhutthleng a rawn luah ta a.
Ram rorelna ṭhaah chuan ram a vul a, mipuiin par an chhuah a, roreltute an vul vak ngai lo. Rorelna ṭha loah erawh chuan roreltu an vul a, mipui an par ve ngai lo. Mizoramah hian tute nge vul a, tute nge par ve ngai lo? Ram roreltu ṭha chuan ngun taka thil ngaihtuahin ram tana ṭha turah chuan huaisen takin ke an pen a, a ṭha lo tur chu huaisen takin an dova, enchhin nan hun an khawhral mai mai ngai lo.
Kan ram Politician-te hian mi State-in hma an sawn chakzia te, an kawngpui zauzia te, an lei dawh rinawmzia te, an airport a changtlunzia te thlirin tun aia chak zawkin ke min pen pui se a va duhawm em!