Airport chim kha engtin zel...

Lengpui airport chei ṭhat mek slab chim kha contractor leh a viltu lam emaw hrem an nih thu hriat a la ni lo a, mipui lam chuan thil tisualtu hrem an nih ngei hi kan lo ring ve phawt a. Mahse sorkar hian a tih duh ang chu a ti tlang mai zel a, mipui lam chu kan ngawi ral leh mai ṭhin.

Mahse mipuite pawh hian thil ṭha kan duh ve tawh a, kalphung dik kan beisei ve a nih chuan thil dik lo hi kan do ngam ve tur a ni a, a nih tur ang a nih hma chuan kan ngawi mai mai tur a ni bik lo.

Hetiang em pawh kan tih peih loh chuan thil ṭha nei tlak kan ni lo tihna a ni ang a, sorkar tan pawh zah tlak kan awm lo hle tihna a ni ang, tichuan sorkar chuan a duh danin thil dik lo pawh ni se a ti leh zel mai dawn tihna a ni mai.

Lengpui airport siam mek slab chim chhan hi Mizoram Mistiri Association pawhin an chhui zui ve a, anni hi he hna kalphung leh he hna atana hmanrua an hmante a ṭha tawk em tih hre chiangtute an ni ve a. Anni hian airport chei ṭhat meka an hmanraw hmante hi a ṭha tawk lo tih an sawi bawk a nih kha. Hei hi he hna thawktuten hna an thawk ṭha lo tih finfiahna ṭha ber pakhat a tling ve a ni.

Lengpui airport hi ṭhawmṭhat ngai lai a tam tawh nia sawi a ni a, mahse Mizoram contractor te thawh theih loh chi a nih hlawm avangin a buaithlak deuh nia sawi a ni ve bawk.

Tuna a chim chhan ber hi chu, Mizo­ram contractor thawh theih chi, mah se an thawh ṭhat loh vanga chim rup mai a ni a, hmabak hi a eng lo ṭhin viau a ni. A upgrade lam chu sawi loh, kan neih sa Airport maintain tur pawhin kan tlin tlat lova, tilian leh tichangtlung tur phei chuan kan tlin lo leh zual a ni.

Hetihlaia kan tlin tawk hna kan thawh ve chhun pawh a chim rup mai kha a ni a. Thil pawi lian tham tak a thlen hnuah vawiin thlengin a mawhphurtute hrem an nih kan hre lo a, a chhuitu tur din a nih thu kan hriatah khan kan tawp san leh mai ang tih hi a rin theih deuh tlat a ni.

Kan sorkar kal tawh dan han en hian thil dik lo do ngam tur leh a dikna zawng chhuak tur hian a huaisen tawk lo niin a lang a, tin mipui lam en pawhin dikna duh vanga au chhuak ngam hi kan tlem tlat a ni. Mi ṭhenkhat chuan a chim hlimah engtin emaw hma lak a, a ti dik lotu hrem kan duh thu te kan sawi a, mahse a sawiah kan tawp san a. FIR han theh lut emaw eng tin emaw bawhzui duh khawpa dikna duhtu Mizo zingah kan tlem nge sorkar nep vangin kan beidawng zawk?

- Nunoi pu