Kan bawlhhlawh paih dan kan ennawn a ngai

Mizoram Sustainable Develop­ment Foundation (MSDF) chuan ni 28.05.2022 khan Solid Waste Management Centre, Tuirialah, The Himalayan Cleanup 2022 pualin Aizawl khawpui aṭanga kan bawlhhlawh paih te chîk taka zirchianna hun ṭha tak a huaihawt a. Keini Mizoram Green Society (MIGS) mai bakah Aizawl Smart City (ASC), SIPMIU, Aizawl Municipal Council (AMC) leh Faith Academy School te chuan he hun hi kan hman pui a ni.

Aizawl khawpuiah mipui kan pun belh ang bawkin bawlhhlawh a pung ve zel a, kan bawlhhlawh tihriral danin kan chhehvêlah (envi­ron­ment) a kalh zâwng­­in nghawng ṭha lo tak tak mai a nei chho zing hle mai a. Tun hnai kan leivung paih danin kan tui tlanna hnar ber a tih buai dan hi entirna ṭha tak a ni a, keini Aizawl khawpuia cheng mihringte chauh ni lo, luidung nungchate thlengin chhiatna rapthlak tak a thlen ti ila kan sawi sual tam lo vang.

Fûr a inṭan a, ṭhal laia kawr kam vela kan bawlh­hlawh paih khawm te tuihawkin luipui lamah a len bo duak a. Kan lui tam takah um/ saidawiûm (plastic/ glass bottle) leh bawlhhlawh chi hrang hrang hmuh tur a tam hle a, lui kam leh mawng lamah bawlhhlawh a inchhekkhawl hnuk ṭhin.

Ruahtui an baw hawk a, veng hrang hrang tui­hawk luankawr aṭangin bawlhhlawh tam tak a rawn len chhuak kumtin kan ti thei awm e. A rimchhiain a tenawm duh em em mai a, veng mawng lama awmten an tawrh phah ta ṭhin a ni. Kan bawlhhlawh paih dan hian faina lama kan la hnufualzia a tilang chiang hle bawk a ni.

Aizawl khawpuia kan bawlhhlawh khawlkhawm ṭhin dinhmun pawh hi hre chiang ta ila kan bawlhhlawh paih dan te pawhin ziaawm lam a pan lo maw tihna rilru leh kan dinhmun hrim hrim zirchianna neih hi a pawimawh hle. Tun ṭuma zirchianna pawh hi hemi avanga huaihawt a ni.

Aizawl khawpuia chengte bawlhhlawh paih dan felfai zawka zirchianna atan hian veng pahnih aṭanga bawlhhlawh thleng remchang hmasa, Dinthar leh Tuikhuahtlang aṭanga lo thleng te chu lak a ni a. Pickup truck pakhat ve ve niin, hmun inang loah bun tir an ni. Bawlhhlawh zirchianna atan hian ṭawih thei lo phur lirtheite chu thlan an ni a, ṭawih thei lo chauh phur tura ngaih an nih laiin biodegradable waste (ṭawih thei) chu hmuh tel a nih avangin bawlhhlawh pawh chi hnih (plastic ni lo leh plastic) anga thliar hran zui a ni.

Tins/ metal (thir), paper/cardboard (lehkhakhawng), cloth/ textile (puanchhia), glass, e-waste (electric lam khawl chhia) leh sanitary waste (diaper) chi hrang hrangte chu bawlhhlawh paih zinga langsar te an ni. Heng bawlhhlawh te hi an rih zawng a hnuaia kan tarlan ang hian han enzui ta ila. (Fig. 1)

He zirchianna (Fig-1) aṭanga chiang taka lang ta chu bawlhhlawh ṭawih thei lo (non-biodegradable) phur lirthei te hian ṭawih thei (biodegradable) ṭhahnem tak an lo phur tel reng tihna a ni a. Ṭawih thei (biodegradable) bikah rau rau hian hman nawn (recycle) theih, lehkha (Paper/ Cardboard) te hi chu lo dah hrang ta ila. Ṭawih thei lo paihna turah ṭawih thei tam tak a thleng tel ziah mai hian kan bawlhhlawh paih dan a la felfai lo hle tih a lang. Ṭawih thei kan paih tel hian bawlhhlawh paihna hmunah hnathawk ten thliar hran hna an lo thawh ve leh zel a ngai a, darkar tinin bawlhhlawh ṭhahnem tak a thlen belh zel avangin hna a thawh chak theih loh a. Hnathawh ti khaih lak lo tur hian mipui­te’n mawhphurhna kan nei ṭheuh a ni. Mumal takin, hunbi nei thlapin bawlhhlawh khawn khawm ṭhin a ni a, in lama kan bawlhhlawh te felfai taka ṭawih thei leh tawih thei lo lo thliar hran sa diam a, a paihna tur bik lirtheia paih mai hi tun dinhmuna kan tih theih ṭha ber a ni.

A khawn khawmtu lirthei enkawltute pawhin bawlhhlawh an lak khawm laiin uluk leh zual a bawlh­hlawh enchian theih ni se. Bawlhhlawh a paih ni ni lova paih tum te chu hnar zel ni se, a sawngbawlna hmuna buaina tam zawk chu kan pumpelh thei ang.

Fig 2.: Pickup truck pakhat aṭanga plastic bawlhhlawh awm dan (kg)

Tin, zirchiannaah hian ṭawih thei lo (non-biodegradable) zingah plastic bikte zirbingna neih a ni bawk a. Plastic-te hi polyethylene terephthalate (PET) plastic bottle, single use plastic (dispo cup, kuhva kawr), multi-layered plastic (MLP) leh a dang te (other plastic- PPE, LDPE, etc) a ṭhen hran an ni a (Fig 2). Plastic zingah hian single use plastic, vawi khat kan hman hnua kan paihhote chu a tam filawr hle a (Fig-2). Heng single use plastic te hi a tlangpuiin dawr hrang hrang aṭanga kan thil lei kan pack-naho hi an ni ber a. Heng bakah hian kuhva pack-na, dispo cup leh sarang hrang hrang 50 micron aia pan te rin luh tel a ni a. He zirchiannaah hian single use plastic-te hi bawlhhlawh zingah ngaihven ngai zual an ni tih a lang chiang hle a ni.

Tin, PET bottles te hi rit lem lo mah se, bawlhlawh thliar hran zînga belhkhawma a tam ber (bur 1071) a nih angin kan bawlhhlawh zirchian a nih dan entîrnan hmang chhunzawm ila. PET bottles hian coca-cola bur, mineral water bur, sprite bur leh bur dang tam tak a huam a, PET bottle-te hi hmun khata dah hran an nih hnuah a mal ṭheuhva bur inang (brand name) awm zat chhiar chhuah leh vek a ni a, a siamtu (manufacturer) leh a siamna ram chu tualchhûng nge rampawn (local/international) tih thlengin chhinchhiah vek bawk a ni. PET bottles ang chiah hian plastic ni lo bawlhhlawh kan tarlan mai bakah single use plastic, multi-layered plastic leh other plastic te chu chhinchhiah vek bawk a ni a. He zirbingna hi hetah tarlan sen ni lo mah se, hmun hranah report hi thehluh niin eng company chhuak nge bawlhhlawh thlen tamtu zingah tel tih chenin chhinchhiah a ni.

Dinthar leh Tuikhuahtlang veng hnih aṭanga truck pahnih rawn thleng aṭangin bawlhhlawh rih zawng belhkhawm hi Kg 514.98 a ni a. Bawlhhlawh zawng zawng rih zawng aṭanga lakin, za zela 43.4% hi biodegradable waste (thil ṭawih ral leh mai thei) a ni hem mai a, ṭawih ral thei tho paper/cardboard chu 10.9% laia rit ni bawkin, ṭawih thei lo bik hi 45.7% (plastic ni lo 12.91% leh plastic 32.79%) a rit a ni. Tawih thei lo paihna tur lirthei Pickup truck-ah hian ṭawih thei Kg 296.6 leh ṭawih thei lo Kg 235.38 rit phurh a ni a. Aizawl khawpui hmun hrang hrang aṭanga rawn phurh luh motor zawng zawngte zirchian vek sen ni lo mah se, hei hian kan dinhmun a tichiang viau awm e.

Bawlhhlawh hi keimahni aṭanga chhuak a nih angin, a paihna tur hmuna paih mai hi kan tihtur a ni. Bawlhhlawh neih tlem te hi mi tin tana inzir theih a ni a, chhungtinte kan ṭan tlan a ngai hle mai. Mi tih turah dah lovin kan thil eina kawr leh ningnawite uluk lehzuala thliar hranga ṭan kan lak thar chuan, hma kan sawn lehzual ngei ang a, a khawn khawmtute ngei pawh bawlhhlawh kan paih danah an fir zual ang a, a paihna hmun tur ni lova paih tumte pawh ‘keimahni’ vangin an harh thar ngei ang. Boruak ṭha, khawpui fai leh thianghlim kan neih theihna’n he thu ziak tlawm tak chhiartu zawng zawngte kan ram tan a bul ṭantu ni turin kan sawm a che u.

- VL Thachunglura, Mizoram Green Society (MIGS)