NIHLIAP

Zan tir a ni a, ruah a tla cherh cherh a. Hritlang-awmna tan chuan chhuahvah a chakawm lo khawp ang. Lehkhabu dahna chhuar bula pereka inbang Nihliap thleh theih chu ka la a, hun engemaw chen ruah a sur tawh loh avang leh ruah sur nikhua pawha nihliap keng peih lo ka nih avangin chu nihliap pawh chu ka khum chhuak khat viau a, ka lung a ti leng hial a ni.

He nihliap hi a thar a ni tawh lo a, hmeichhe tan phei chuan khawlaia khum chhuah tlak a nih meuh tawh loh avangin a hluihlawn tawh a nih ka ring. Chutia nihliap chuangtlai reng awm ta chu an ina ka kal ṭumin a ni (aunt) chuan ka khum hawn atan min pe a, ka pe let leh ta lo a nih kha.

He nihliap neitu hmaah hian ka keh chhe vek a; ka nihna leh zahawmna zawng zawng hloh khawpin ka hmangaih a. Ka thinlung a tihkeh chhiat vek hnu pawh hian hmangaihna nen ka la nghak ta fan a, a ruk in, a hriat lohin. A hriat chuan min ngainep zual mai mai dawn si.

Hmangaihna hi hmel­ṭhatnaah a awm lo a, pian nalh leh khalah a bet hek lo. Ṭhatna leh sualnaah hian a awm lo a, thianghlimna leh mawinaah a awm lo tih ka hriat chian phah. Hmangaihna chu ka thinglunga awm a, a neitu chu ka thinlung tikhehchhe vektu, natna leh beidawnnaa min hnuk luttu, mahni nunna ngei pawh lak mai duh khawpa hreawmna ruama min hnuk luttu a ni. Ka hmangaihna hnawl a min hmusit a min ngaineptu, ka nat belchhah ngeina tura thil ti ṭhin, Facebook, Instagram leh WhatsApp thlenga ka rilru natna tura khawsa ṭhin a ni.

Ngaihsak tawh loh ka tum a, ka theihnghilh ve fo. Mahse, ka inrin loh hlanin a lamah bawk ka rilru a lo pe a, ka hriat loh hlanin ka lo ngaihtuah leh a, a lo nghak leh tlat ṭhin. Ka rilru ka hneh thei a, amah ka hmangaihna erawh chu ka hneh thei lo.

Chung zawng zawng ngaihtuah a chhuak chunga nihliap ka ban lai tak chuan, ka rilru nat aia a let sang engemaw zata rilru na, keimah vanga rilru na em em mi pakhat hlinglukhum khum hi ka hmu a. A hmai leh a chal vel te chu thisenin a bual a, a mitmeng ka en chian chuan min hmangaih takzet tih ka hmu a. Chu mai ni loin min hmangaih avangin tuna natna chu ka tan a tur mek tih ka hmu zui a. Ka hmangaihin min tihnat aia a let sang tam taka na zawkin a rilru ka tina tih ka hmuh phei chuan ka hnuk a ulh a, ka en chiang ngam lo.

Chuti taka a rilru ka tihnat, ka hnawl chian em em chunga min la hmangaih cheutu chu ka’n en chiang a. Khawvel leh a piahlam thlenga chatuan nunna ka neih theih nan Kraws-ah an khengbet a, a chatthla lek lek tawh hi a lo ni a. Chuti kau a min hmangaihtu mitmeng chu zak takin ka han en ru leh hram a, a mitmeng chuan tihian a sawi-

“Ka hmangaih che... min tihnat tawhna aiin min hmangaih let ve hun turin ka rilru a luah zawk. I tan chatuanin ka lo awm ang - ka lo nghak ang che Vanram ah.”

- Rinfela Zadeng