KA VEI TLAT

Tun ṭum chu ka ngaihmawh zawng, ka rilru kap deuhtu chanchinbu leh vantlang ti ti aṭanga ka hriat ka rawn sawi ve dawn a ni. Thu ziak mi ka ni lo.

Vanglaini March 11th, Saturday chhuaka YLA rorel inkhawma an thu rel hi ka chhiar a. Ka rilru a khawih hle mai. LADC huam chhunga District pawn lam miten ram an neih theih lohna atana hma lak an rel ta mai hi ram leh hnam inpumkhatna atana thil ṭha lo tak niin ka hria.

Hetianga YLA ten hma an la dawn a nih chuan LADC huam chhunga miten District pawn lama ram an neih hi khap ni ve ta se; an neih sa pawh cancel sak ni ta se a ṭha mai lo’ng maw? Mizoram chhungah hnam hrang hrang kan awm a, kan inhung bik dawn a nih chuan Zoram zimte hi inlak hran tumin kan buai mai mai ang tih a hlauhawm. Chu chu remchangah lain hnam dangte hian min rawn nek mai ang tih a hlauhawm hle. YLA hian ngaihtuah nawn leh teh se.

A pahnihnaah chuan, Miss Mizoram thlanah khan thil fel tawk lo a awm deuh em ni? Mi tam tak sawi kan lo hriat danin zawhna chungchangah te, Miss Mizoram tur hi ruat lawk deuh awm anga thusawi tam tak te, result puan sual te (an koh chhuahte tan a zahthlak dawn lutuk). A hming leh nihna a zahawm tehlul nen organise fel tawk lohna kha a pawi ka ti.

Tin, bikini round bik hi chu tih tawh loh nise, kan Mizo society nen a inmil lo deuhin ka hria. Zonet lamin sumdawn nan an hmang duh hrim hrimte a nih loh chuan. Tin, people choice an tih pawh hi people choice ni lovin social media choice a ang mah mah zawk; nu leh pate tan chuan vote thlak a har deuh a ni.

Kum 1984 a Miss Mi­zoram an thlan laia Mizo inchei an tih ang khan ti leh mai se, kan nulate zahawm­na pawh kan hum him zawkin ka ring. Khang hunlai pawh khan mit tla lek lekin an thlir peih tho a nih kha! Khatihlaia Miss Mizoram, Miss Brigitte Zohmingi, tunah chuan Pi a ni tawh ngei ang a, an nalh em em si a. Pu James Lianmawia (RIP) in Pi Brigitte Zohmingi tana thumawi tak a lo chhak chhuah Pu Mafaa’n Mizo ṭawnga min lehlin sak atan ka han tarlang hial teh ang.

“Oh thou art fairer than the Evening Stars

Clad in a beauty in a beauty of thousand stars

Sweet Brigette make me immortal with a Kiss”

- Aizawl West Pa