Mizoram sorkar ka fakna

MNF kaihhruai sorkar hi a duh tan selna tur tam tak a awm ngeiin a rinawm. Nitin mamawh buhfai, gas, tuialhthei etc. ah hi chuan an fakawm hlein ka hria a, an thawk ṭha ka ti takzet.

Mizoram hi nitin ma­mawh chi hrang hrangah kan intodelh lo viau a, state pawn aṭanga kan lakluh deuh vek. Chuvangin, mipuite a tel loa kan awm theih loh nitin mamawh chi hrang hrangah hian kan sorkar hi state dang sorkar aiin ṭan a ngai lehzualin a rinawm. Kan intodelh lo mai ni loin, kan ram hi hmarchhakah pawh a kilkhawra awm, leimin duhna hmun, kawng nei ṭha lem lo tak kan ni.

Kum 2018-a MNF kaih­hruai sorkar a pian hnuah harsatna chi hrang hrang a thleng a, hengte avang hian nitin mamawhah han buai deuh changte a awmve ṭhin a, mahse mipuite buai rei lutuk loin harsatna awmte chinfel thuai thuai a ni ṭhin.

Covid-19 a leng a, zin veivah khap a ni chho a, nitin mamawh phur lirthei khalhtute pawh hripui avanga hlauthawngin an awm ve a ni. Chutiang boruak karah chuan Zoram mipui­te nitin mamawha harsatna liantham lutuk a thleng lo. Kan hnianghnar lutuk tih tur chu a ni kher lo thei a, mahse Covid-19 avangin nitin mamawh bikah mipuite'n harsatna liantham lutuk an tawk loin ka hria.

Covid-19 leng karah ramri a buai a, Assam lamin Mizorama lut tur lirtheite dang chatin, nitin mamawh phurte pawh an chhuah duh lo a ni. Khatih hunlai khan Assam lam hian min min hrek rilṭam an tum ni berin a lang.

Mah se, khatih hunlai pawh khan harsatna tawk mahila, mipuite'n engmah kan nghei lo a, Manipur leh Tripura lam aṭangtein nitin mamawh phurh a ni a, kan buai chhe viau lo a ni.

Hun a kal leh deuh a, nitin ma­mawh pangngaiin a rawn lut chho leh thei mai a, mahse kuminah nitin kan lakluhna ber Assam-ah tui lian avangin a hlawm liana rel kawng leh kawngpui eng emaw zat a chhia a ni.

Lirthei hmangin nitin mamawhte hi Mizoramah lakluh theih ni tho mah se, a tam ber kan lakluhna chu rel a ni. Assam-ah rel kawng a chhiat miau avangin rel hmanga lakluh ngaihna a awm lo. A bikin tuialhthei chu Silchar-a stock awm sa a tam loh avangin Guwa­hati-ah lirthei hmanga phurh luh a ngai a. Megahalaya leimin avangin ni hnih thum Mizoram tan Guwahati-ah nitin mamawh a la phurh theih loh zui.

Hetiang harsatna karah hian mipuiin a bik takin tuialhthei kan inchuh nasa a, sorkarin khuahkhirhna siamin, free sale na hmun filling station-te chu an lun hle a nih kha. Mahse, hun rei lutuk loah harsatna zualpui chinfel a ni a, thla khat pawh tling loah a pangngaiin tuaialhtheite hi lak leh theih a ni.

Rawtna pakhat han sawi ila. Tun hnuah chuan eng emaw harsatna a thlenin, stock dinhmun chhiat lutuk hma hauha tuialhthei khuahkhirh nghal kher hi a ṭul kherin ka hre lo. Mipuiin a pang­ngaia kan lak chuan kan filling station-a awm hian rei tak min daihin ka ring. Sorkar khan khuahkhirh a nih thu kha puangzar lo ta se, mipuite buai em em si loin, tuialhthei inchuh vak ang kha a thlen ka ring lo.

Sorkarin mipui a tih chiai avangin kan mamawh bak bak thil lak kan tum a, a theih ang a tam stock tum an tam hle. A pangngaia hralh chhuah a nih leh hnu pawh hian an stock la hmang zo lo mai ni lo, an stock la hmang lo pawh an awm hialin ka ring.

Sorkar tan khuahkhirh ngei ngei ngaih hun chu a awm thei e. Mipui hnena puangzar loin, filling station-te chumi zat stock in neih hunah sorkar thu loin pe chhuak tawh suh u ti mai se. Chumi hunah chuan strict takin kalpui thung se. Two wheeler taxi, city bus leh taxi-te priority pe thung se, mipuite buai lutuk loin kan awm theiin ka ring.

- Malsawmdawngzela Hrahsel