Dawr lian rawn lut zel rawh se

Vishal Megamart, MZP ve si - a va lâr em! India rama sumdawnna lama darh zau tak leh thil chi hrang hrang zuartu, Vishal Megamart chuan Aizawlah rawn inbun ve vang leh sumdawng pawl intélkhawm Mizoram Merchant Association (MIMA)-te vang vek a ni. Rin dan leh ngaihdan a hrang ta nuai mai.

Phaia kal ṭhinte chuan an hria ang a; Vishal Megamart chu dawr lian, thil chi hrang hrang duh thlan tur awmna dawr a ni - thawmhnaw lam leh inchhung mamawh hrang hrang an zuar, a tlawm tlangpui bawk. Chutiang chu a nih avangin, beisei lutuk ngam si loin, Mizote tan a ṭha dawn em mai, tiin Mizoramah te rawn inhawng ve se aw, kan lo ti rilru ṭhin. Big Bazaar te, Pantaloons te, Monginis te, ZARA te, dawr lian dang dangte pawh rawn lut chum chum se, tiin rilruin duhthu a sâm ṭhin.

Kei, dawr lian pakhat hian Aizawl chauh pawha dawr sang tél awm hi a tihchhiat ka ring lo a, Mizo hnam hi min chîmral ka ring pha lo. Mizo, Mizoram khua leh tui nihna angin, Sairang thlenga rél lo lut tur hlau lo hian, Vishal Megamart han hlauh viau chhan tur ka hre lo.

Vishal Megamart-in dan bawhchhiat nei hauh loa kan ramah an huang an rawn zauh a nih chuan rawn inhawng teh se; dan loa an inhawn erawh a ṭha hauh lo. Hetianga dawr lian rawn inhawng hi a hlâwkna têltu tur chu Mizo mipui kan ni. An sawi danin, Mizo ṭhalai eng emaw zat an chhawr dawn a ni âwm a, Mizo ṭhalaite tan hna thawh tur an rawn siamsak tihna a ni nghal bawk. A lawmawm chai chai teh a ni lo'm ni.

Vishal - Franchisee an ti?

Dawrkai ṭhenkhatte sawi danin, Vishal Megamart rawn luh dan hi Firstcry, Adidas, Nike, Reebok, Subway, etc. te nen a inang reng an ti a. Nike franchisee chu *** an ni a, Louis Phillipe franchisee chu *** an ni a, KFC franchisee chu *** an ni a, Subway franchisee chu *** a ni a, Vishal Megamart franchisee chu LRM-te an ni (franchisee-te ho hming hi ka hre tho nã a, ka ziak lang ta lo mai). Hengte hi kalphung thuhmun, an zawrh erawh inang lo mai chauh a nih thu, Mizo sumdawnna lama thil hre zawkte'n an sawi. Sum nei tan chuan Big Bazaar, Pantaloons, ZARA, Reliance Digital Store, etc. te pawh thawhpui theih an ni - anmahni'n an duh chuan.

Vishal Megamart duh leh duh lotute pawhin kan hman ṭangkai vek, mobile phone lamte hi... Mobile phone service provider zawng zawng hi a neitute chu hnam dang vek an ni, Mizo an ni lo. Mizorama hnamdangte sumdawnna, Mizote'n hlêp neia an lo tihpui ve mai chauh ni lo'm ni? Mizorama hnam dang sumdawnna duh lo tak zet tan chuan, dodal tur zinga mi an ni ve tho lo em ni? Thil dang pawh sawi tur a tam ang.

Thil to lutuk hi

A thu hrimah, Mizote hi sumdawnna lam hi kan la thiam tâwk lo a ni mai thei. Kan sumdawngte hian hlêp tlem zawka hralh tam aiin, hlêp tam taka hralh tam loh pawh pawi an ti lo zawk a nih hmel. Vai kan tih hoin Puja laiin inhralh tam an duh a, a tláwm thei ang bera an inzawrh ṭhin laiin, Mizo Kristian sumdawng tam takte erawh hi chuan inhralh tam hun, Krismas bazarah an tito sawt ṭhin thung!

Mizo sumdawng leh dawrkaite'n an tito bik hle tih hi chu Mizo zawng zawngin kan hriat tlan a ni - phat tur a awm lo. Online shopping lam a lâr chho a, thil tam tak chu he laia a man aiin a tlawm zawk bawk a, online hmanga thil leitu an pung hlein a lang. Chutih laiin, kan sumdawngte chuan online shopping chu ngaimawhin an bitum nghal chat a. Sorkar lah chuan phuahchawp deuh takin online hmanga thil leite aṭanga chhiah lâk turin thutlukna a'n siam nghal mai bawk a. Mahse, rin leh beisei ang ngawt a ni lo a ni mai thei, an la thleng thui viau lo niin an sawi.

Mizo sumdawngte hian sumdawnnaa inelna hi hmachhawn ngam ve rawh se. Thil man to uchuak lutuk hmangin Mizo mipui hi min nghaisa rei tawh; mipui hma ngai tak takin thil mante han chhiar ve tawh se. Heti taka Mizo mipuiin Vishal dawr an lo lawm chhan hi han ngaihtuah ila. Chì a váng dawn tih thâwm a awm a, eng emaw zat chheprelha a lêt eng emaw zata tito nghal tute kha tute nge? Silchar kawngpui hun rei vak lo a pin chánga thil man tito nghal mai ṭhinte tute nge? Mizo mipuiin an hai lo. Mizo sumdawngte thil tihto bik thinzia rilruah a nung reng a, tlân tauhna tur remchang, kawng tereuhte a rawn inhawng dek dek a, mipuiin an lo lawm a ni mai lo'm ni? Mipuiin an lo lawm chhan leh rawn inhawng se an duhna hian chhan ril tak a nei ve tih hriat a ṭha.

Inti thlir zau deuh leh ngaihtuah ril inti deuhin hnam hma lam hun khawih, inchimral theihna a ni, an ti a. Pawm ve vek lem lo mah ila, a dik lo e, tihsak ngawt tur a awm lo. Thlir dan leh rin dan a inang lo miau a. Hnam dangin min chimral kan hlauh ang bawk hian, sumdawngte'n (an zavai chuan a ni lo ang) mipui min rahbeh (chîm pil!?) rei tawh dan hi ngaihtuah ve ila. Mipui hian chu rahbehna lak atan chu tâl chhuah an duh tih a chiang.

Mizo mipui hian vai dawr an chak ngawr ngawr a ni lo, an sumdawn dan te, thil man an tihtlawmnate hi an duh a ni. Chu chu Mizo sumdawngte aṭangin an beisei ve reng bawk. Sundawnnaah hian hnam dangin min chîmral thei teh meuh ang, hlauhawm pawh a hlauhawm ang. Sumdawnnaa inchimral leh inchimral lohah chuan kan Mizo sumdawngte mawhphurhna hi a lian berte zinga mi a ni ang. An mawhphruhna chu hnam dang sumdawngte tharum emaw, a tlukpui emawa dodal chiam lamah ni loin, an sumdawn danah a ni ang.

Aizawla Vishal Megamart a awm vanga sumdawng ṭhenkhat, thil man an tihto lutuk vanga mualpho hlauin inchimralna chhuanlama hmangin an lo dodal ta mai nia mi ṭhenkhatin an sawi hi chu thu dik ni lo hram se. Vishal Megamart-in thil man an tih tlàwm zawk vanga dawrkai ṭhenkhat, tlemtêah nghawng a nei a nih pawhin, a nghawngte chuan chonaah ngaiin an sumdawnnaah ṭang sauh zawk tur ni âwm tak an ni a, Mizo mipui hian tlâwm zawk, man zawka thil lei kan duh ve tihte hi hriat phah nan hmang hlauh se a lawmawm ngawt ang.

Rilru buatsaih a ngai

Khawvela hmasawnna nasa tak avangin kan khawvel hi a tê tial tial a, ram dang leh hnam dangte nen kan inpawlhsawp tial tial bawk ang. Chutiang karah chuan sumdawnna thil a ni emaw, thil dangah pawh, hnam dang hi kan ramah an rawn lut tam tial tial dawn - a chiang reng. KFC-te pawh kan mamawh a ni hran lo, mahse, khawvel inher zel leh ṭhang zelin a rawn ûm lut ve a ni mai.

Khawvel huap a ni emaw, India ram huap a ni emaw, dawr lian tak takte hi an la rawn lut zel ang; dodal ai chuan rilru lamah lo inbuatsaih ila, elpui atan hman tum zawk ang u. Rél lo lut thûk zel tur pawh dodal loin, a lo luh hun atan rilru lam lo inbuatsaih ṭhat zawk mai a ṭha ang. Mizote himna tur tia chhuanlama hmanga mahni ṭánghma hâi ngar ngar hi tum lo ila; Mizote chîmral kan nih lohna tak tak tur chu kan thinglungah hian a awm tih i hria ang u.

Inchimral kan hlauh loh dan tur te, vai ho kan hlauh loh leh kan hneh dan tur tha ber chu, rinawm leh taima taka Pathian

ṭihna nena hna thawh a ni awm e. Chu chu Pathianin mal min sawmna tur leh hnam dang lakah pawh min humna tur hmanraw pawimawh a ni. Kan ramah hian Vai awm miah lo mah se, kan rinawm loh a, kan thatchhiat a, Pathian duh dan anga kan awm loh chuan Mizote hi hnam dang chimral aia chhe zawkin kan awm ang. Kan rinawm a, kan taimak a, Pathian kan ṭih chuan, eng kawngah pawh hnam dangte'n min hnehin min chimral lo ang. Hei hi Kristian, Pathian ringtu kan nih anga kan inzirtir dan tur pawh a ni awm e.

- K. Zothanpara