Ngaihtuah chian a ngai e...!

Vishal leh keini

Vishal dawr tih tawp a ngai, chhiatna thlentu a ni, tih ang reng chauh ngaihtuah, he Vishal mi tlemte hlawkna tur a nih ngaihtuah lem lo leh hetiang dawr lian zinga an thil neih ṭha lo ber, a tlangpuii Vishal hi vai zingah pawh lower class ti mai teh ang, chutiang chuan an pan nasa berin ka hria.

Hetiang chi-ah chuan an hniam ber ang - Shopper Stop, Pantaloon, Big Bazar

Vishal...

Supermarket/ MegaMart velah hian thil man a tlawm zawk ngei mai a, mahse local business a tichhe thui thei khawp mai.... hnam tlem, mihring cheng tlemna hmun keini Mizoram angah te phei chuan nula rimna leh khawilai puipunna hmunah te emaw kawr inang hak ṭhup ṭhup a awl dawn.

Vishal hi thlahlel viau mah ila, mi tlemte hlawkna nge kan hnam tan ngaihtuah si lo, thawmhnaw man tlawm tih leh, duh duh zat chhiar ṭhin sumdawngten kan sumdawnna min tihchhiat sak tih ringawt mai mi naranin kan lo helh em em te hi a fuh lo. Mi tangka peipunna tur kan buaipui sak a ni chauh zawk.

Mizote leh tangka peipunna lam

Ṭhianpa Rova'n, "Mizoteah hian hausakna hi a insawr zim sawt hle. Sumdawnna zawng zawng chu mi hausa tlemte kutah a lut chho zel a. Hetianga nih chuan, a lut chho zel mahna. Kan officer-te pawh hi en ila. Officer leh officer an innei a, an fate zirna ṭha ber ber an pe a. Sawrkar hna ṭhaah an lut leh thei zel. Coaching ṭha ber ber an la kal thei zui. Mi hausa leh mi hausa, mi lian leh mi lian an in telin a circle a zim tial tial a... Kan taste, kan duh zawng min han pe zel ang a, an bawihah hre hauh loin kan tang zel dawn a ni. Dinchhuahna remchang hi mi retheite tan a tlem tawlh tawlh dawn. Kan chawh tawlh tawlh mai dawn a ni. Tiang dawr lo lut hian employment a siam kan ti mai thei a. Eng ang chiahin nge a secure a, eng zah chiah nge hlawh an neih. Mi engzat chiahin nge hna hmuh phah dawn?”

“Engpawhnise, mi dang dem emaw, mahni interest ti lian/ um vak lo hian, hnam thil hi ngun takin i ngaihtuah teh ang u. Aman kan pek tur hi a tam dawn si a. Kum 10 hnu-ah chuan kan mangang tawh ang. Manipur leh Meghalaya-a an ILP ngen leh dan leh an buaina te hi chhut ila. Mizote hian resources hran kan nei lo, consumer lian tak kan nihna hi kan resource ropui ber chu a ni mai. Chu chu kan chhiatpui dawn hi a ang," a tih te hi a dik thlawt ka ti.

Chi a to, a phurhna leh a laknaah buaina a awm an ti... an tih darkarah Aizawl dawr zawng zawngin a leh li te, lah nga te in chi man an duh ang tawk tawkin an ti to ngawt. MRP print sa nawt reh a, mahni duh ang tawk thil man ziak ṭha leh ṭhin Mizo christian sumdawngte tan hei hi min beng harhtu ni mawlh bawk se.

Mipuiin Vishal an thlahlel hi ep ngawt lovin ngaihtuahna thar, sumdawnna nghet, kei­mahni mai ni lo, kan tu leh fate rochun tlak din tum a ṭha.

Sawrkar hnathawkte pawh in ngaihtuah chian a ngai

Sawi tur te hi kan hre lo khawp a ni teh chek ang, state pakhat rorelna in sanga mi sawi duh loh Pastor zu in ka hria tih vel sawi vak vak ai chuan kuthnathawktuten lo hal ngei ngei an la ngai te, lo hal hun kan lo bituk sak ve ngawt ngai lova nun an hman theih nan engtia hmalak nge ṭha ang, enge kan tih tur? tih te hi ngaihtuah a ṭul zawk.

Mizoram hmasawn lohna lianpui chu, ngaihtuah hmasak ngai ngaihtuah a ni ngai lo te, an hnena ṭanpuina a thlen ve changa 'thik' tlat te hi a ni. 'NLUP emaw, MIP aw, NEDP leh SEDP emaw pawh ni se, heng scheme te avang hian kuthnathawktu tam takin sawrkar aṭangin ṭanpuina an dawn ve theih phah a ni. Hei hi lawmpui aiin nuihzat a, hmusit a, thik a, sawisel a, ti ṭha duh lo an tam.

Sawrkar hnathawk tam takin loneitu leh mi hniam zawkin ṭanpuina an dawn hi an thik tlatin a lang. Anni pawhin duham takin hlawh an la a, an hlawh an la iai fo a, hlawh an lak loh zeuhin ṭawngṭai chungin kawhmawh an bawl a, an nuar duh zel mai lehnghal. Tunah pawh intiamkamna nei sa siin an la nuar zel duh a nia.

Hlawh pangngai bakah TA/DA bill, MR Bill thlengin an la a, heng te hi an phu chiah em? Hetiang hlawh leh hamṭhatna la chung hian lungawi lohna, duhkhawp ngah lo, eng emaw therhlo dang tangka peipunna an la zawng ta zel a.

Anni leh keini

Dik tak chuan, thingtlang lo neitute leh mi hnuaihnung zawkte chawmdawlna tur atana sawrkarin a din depart­ment lian zet zet kum tam fe lo ding tawh te avang hian enge hmasawnna kan hmuh, hmasawnna an hmuh lohzia hi, lo vat lo thei lo dinhmunah an la ding mek a nih hi. Hetiang a nih avang hian tunah pawh lo hal theih loh vangin an la buai em em a ni.

Anmahni vang hian sawr­kar hna tam tak a piang a, chu­vang chauha sawrkar hna thawk thei chu kan ni tih hi ngaihtuah a ṭul zawk. Thing­tlang mite avanga motor nalh tak nei thei, in sang leh nalh em em sa thei, fa te phaia dah thei hi engzat tak awm ang maw?

- Lalrochhara Chhakchhuak