Sherlockians meet thangkhawk

Kum tam tak liam tawhah khan ka pa hian library a nei ṭhin a, chumi aṭang chuan kan unau hian lehkhabu chhiar hi kan uar ta ni berin ka hria.

Mami hian chung lehkhabu aṭang chuan Sherlock Holmes bu hi a chhiar fo ṭhin a ni chek ang chu ngaih­nawm takin min hrilh ṭhin a, ka ngaisang em em ṭhin. Ka han chhiar ve dawn ṭhin a, a thawnthu kalhmang hian ka rilru a luah thei ngang lo a, chhiar zawh dawn lama a thu man thiam chauh a ni ṭhin si a tiin ngaihnawm ti ve turin ka rilru ka pe thei tlat lo a, chhiar ve ai chuan Mami min hrilh chu ngaihnawm ka ti zawk fo ṭhin a ni.

Nimahsela, kum rei vak lo kal ta aṭang erawh chuan ngaihnawm ti takin ka chhiar ve thei ta a, a thawnthu hi a ria chhiar chi a lo ni lo a, mahnia awm a, rilru pe taka a ri loa chhiar chi zawk hi a lo ni.

Tichuan, Sherlock Holmes chu ngaih­nawm ti takin ka lo chhiar ve thei ta a ni. Bu tam ka chhiar hma hauhin a letling tupa Pu PL-a hi Khawzawla General YMA Conference a thlen ṭum khan remchang a awm hlauh bawk a, ka titi pui chiam tawh bawk a, chumi ṭum chuan Sherlock Holmes thih dan ka la hriat miau loh avangin ka zawt nghe nghe.

Pu PL-a vanga Sherlock Holmes hi hmelhriat ka ni. Amah nen hian kan inhmu zauh zauh tawh a, min hriat phei chu ka ring chuang lem lo. A Sherlock Holmes lehlin hi mi ṭhenkhatten ṭangkai puina an lo nei tih ka hriat hian a taka hman theih a nih leh nih loh hi amah ngei ka zawt tawh a, ka la hriat reng chu Pu Rozama Chawngthu hian Sherlock Holmes bu a chhiar tawh vanga lehkhabu (Bible nge Hlabu ka chiang ta chiah lo) bo tawh hi a neitu a zawnchhuah thu a sawi ka hre tawh.

Chu lo lehah pawh Pu F. Lalhuliana (Police hotupa) hian Sherlock Holmes bu a chhiar tawh avanga misual an man dan a ziak ka chhiar tawh bawk a, ngaihnawm takin a ziak nghe nghe. A mah ngei hian sawi duh sela chuan sawi tur a hriat ṭeuh ka ring.

London a kal a, Baker Street hmun ngei maiah a kal vawi­khatna mah nisela a zuk tlangnel viau dan erawh ngaihnawm takin min fah hlawm kha.

A thawnthu ziaktu Sir Arthur Conan Doyle hi a pianpui hming tak chu Arthur Ignatius Conan Doyle tih a ni a, 1859 May 22 ah Edinburgh, Scotland-ah a piang a, University of Edinburgh Medical School chhuak a ni. Kum 71 mi niin Crowborough, Sussex hmunah kum 1930 July 7 ah heart attack vangin a boral.

A thih hmaa a ṭawng hnuhnung ber chu a nupui hnena ‘You are wonderful’ tih chu a ni. A ruang chu Windlesham hmuna Rose huanah July 11, 1930 ni chuan an phum ta a ni.

- Mahmuaka Chhakchhuak