Thing phun ang u

Thufing pakhat chuan heti hian a sawi, "I naupan laiin thing phun la, i ṭhanlen rualin a lo ṭhang lian ang. I puitlin hunah chuan i naupan laia i thing phun chuan nang leh i fate tan hlim nuam tak a chhuah tawh ang," tih a ni.

Mizoram dinhmun thlir ila, he thufing pakhat hi a ti diktu kan ni thei ang. Thufing pakhat sawi belh ila, "Bul ṭan nan chuan vawiin a ṭha ber," tih a ni, chuvangin kan nakin hun nuam taka kan hman theih nan vawiin aṭangin thing kan phun ṭan thei tihna a ni.

Laiking fa neih a fa neih ringawt erawh a tawk lo. Thing kan phun hian ngaihtuah zui a ngai, kan phun ni bak kan ngaihsak peih lo a nih chuan kan duh leh beisei angin a hlawhtling thei ṭhin lo, chuvangin a rei lo berah kum hnih tal ngaihtuah zui thei ila a duhawm hle.

Mizoram chauh thlir theih a ni lo a, India chauh pawh a tawk lo - khawvel kan ngaihtuah tel a ngai. Mizoram chauh kan ngaihtuah theih loh chhan chu, boruak hi khung bik theih a ni lo a, khawvel hmun danga mite nen a inpawh vek vang a ni.

Ram tam tak chu khaw lum vangin an buai takzet tawh a, keini awmna ram ngei pawh boruak lum hian min luhchilh ve mek zel. Tun hma deuh chuan Mizoram laihawl leh khaw chhak lamah hian Tengtere, Kuhva, Coconut etc te hi a rah thei ngai lo.

Tunah erawh khaw luma chin chin thleite pawh hi khaw chhak lamah pawh a rah duh ta viau, a rah theih tak chhan hi khua a lum tak vang a ni. Thlai khung ngai reng khan boruak dang a hip chuan thil danglam a thlen ta tihna a ni.

Thlai rah hleithei lo an rah ta hi a lawm­awm, chutih rualin nasa takin boruak a lum ta tihna a ni. Boruak lum zel hi kan vei a, kan ngaihtuah a ngai - a tih nep dan leh thunun theih dan awlsam ber chu thing phun a, enkawl sei len a ni ang.

Kum tinin mi tam takin thing an phun a, mi ṭhenkhat chuan a phun pawh an phun hnem ta malh malh hle. Mizoram sorkar hmalakna in department hrang hrang pawhin thing an phun ṭhin, tunlai chanchin thar luahtu pakhat pawh a ni mek.

Thing kan phun a, a ṭha takzet. Kan phun tluk chuaha pawimawh chu enkawl a ni, kan thing phun kha engzat nge puitling a, eng ang takin nge a hlawhtlin tih enlet nachang kan hriat a hun tawh viau niin a lang.

Mizote kan ṭhat tawk lohna lai pakhat chu, kan hmalakna leh hna thawh enlet kan taima tawk lo hi a ni, an ti ṭhin. Hei hi a dik viauin a rinawm, thil dang ang bawkin kuminah chuan thing kan phun bakah kum hmasa lama kan phun tawhte kha enkawl zui ila, eng ang takin nge nikum lama sum leh pai, tha leh zung tam tak senga kan thil tih kha a hlawhtlin tih en let nan kan hmang a nih chuan, kum thar lama hmalak dan tur ṭha zawk pawh kan hre thei ngei ang.

- Puitea, Aizawl