“I HEADLIGHT I OFF LO A NIA!”

He thu hi kumin aṭang hian kan hre chho hnem malh malh dawn khawp mai. A chhan pawh April, 2017 aṭang chuan 2 wheeler thar hralh chhuah turah reng reng chuan headlight chu off theih loh, chhunah pawh eng reng tura dah tur a nih vang a ni. Tunah pawh hian an siam chhuah thar hovah chuan a awm ṭan der tawh.

He thil thar hi a hming chu ‘Automatic Headlamp On’ (AHO) an ti a. Supreme Court-in a din, Automotive Research Association of India (ARAI) in hetianga headlamp on hi compulsory tura thupek chhuah tura Road Transport Minister, Nitin Gad­kari hnena rawtna an theh­luh zulzuia thupek hi chhuah a ni. Europe ramah te chuan hetiang hi 2003 aṭang khan an lo hmang fur tawh.

Bike leh scooter tam takah April, 2017 kher nghak lova an siam nghal avangin chhunah an eng nghal tung tung tawh a. 2-wheeler khalhtu-in a duh duhin a off thei lo, off na tur a awm lo. Bengvar fahrana, “I headlight i off lo a nia!” in tih lung lung chi a ni tawh lo!

He rawtna an siam chhan ber chu India rama motor accident a thihna thleng tam ber chu 2-wheeler a chuangte an nih vang a ni. Kum 2014 khan 2-wheeler a chuang mi 32,524 zet chu accident vangin an thi a; mi 1,27,452 te pawhin hliam an tuar a ni. A bikin zing leilung lan hnu si leh tlai lam unau hmel hai vel, 2-wheeler headlight chhit a ngaih em em lai ni si lovah hian motor dangten 2-wheeler lo tlan an hmuh mai ṭhin loh avangin he’ng chhiatna hi a thleng duh deuh bik a ni an ti.

Two wheeler a AHO ang deuh hi car ṭhen­­khatah pawh a awm nual tawh. Car-ah chuan Daytime Running Lights (DRL) tiin an ko thung. AHO bakah hian two wheeler khaltute himna atan India sorkar chuan thil thar a ruahman leh bawk a. Two wheeler, a engine 125 cc leh a aia hniamte tan Anti-lock Braking System (ABS) emaw Combined Braking System (CBS) emaw hman ngei ngei tur tih leh, 125 cc aia liante tan chuan ABS hman tur tih notification a chhuah leh bawk a. He thupek hi two wheeler model tharah chuan April ni 1, 2018 aṭanga siamah chuan hman nghal tur a ni.

Model hluiah erawh chuan April ni 1, 2019 aṭanga siamah te hman tur a ni.

CBS hian two whee­ler kan han brake khan, a ke hnung brake emaw, a ke hma brake emaw, a eng lever zawk pawh hmet/ rap i la, a brake tha chakna kha a ke hma lam leh hnung lamah a sem kual ang a, chu chuan a brake a tihchak bakah, a ke tawlh tur a veng dawn a. ABS ve thung hi chuan motor ke kan brake avanga a tawlh tur kha vengin a tawlh lohna atan automatic-in a lo thlah dul zeuh zeuh ang a; chu chuan bike/ scooter tlu tur a veng thei dawn a ni.

Heng system manah hian sum kan sen belh hret a ngai ngei ang a. Mahse, thihna hial emaw, damdawia inen­kawlna mana kan sen tur emaw kha tam tak min humsak dawn a ni.

- C. Lalthazuala