Fur atan inbuatsaih ang aw

Furin min nangching leh ta a, he hunah hian chhiat­na kan tawk fo a, leimin leh in chim thawm te pawh kan hre kumin a ni mai a, kumin fur kan hmachhawnnaah pawh hian fimkhur taka kan chet loh chuan chhiatna tam tak kan tawk leh ngeiin a rinawm.

June thla tir lam hian aṭang hian ruah­tui a tla tam deuh a, September thla vel thleng chu ruahtui kan dawng tam leh ang. He malsawm ruah hi mi tam tak tan chhiat tawhna ruahah a lo ni fo tawh a, hei hi kan hman ṭangkai thiam loh chuan thil pawi a thleng leh zut dawn. Kum sawm chhunga Mizoramin ruahtui kan dawn ṭhin dan tlangpui chu 2000 mm vel nia ngaih a ni a, kum tin ruahtui tlak dan hi inang lo mah se a danglam tam lo tura ngaih a ni.

June aṭanga chhiara hla nga thla ruk chhung vel hi Mizoramah ruahtui a tla tam leh dawn a, leimin vanga chhiatna tam tak thleng leh thei a nih avangin ruahmanna ṭha tak nen fur ruahtui tla tur hi dawngsawng ve thei tawh ila a duhawm ngawt mai.

Fur lai hian ruahtui vangin chhiatna a thleng fo tawh ṭhin a, mi ṭhenkhatin malsawmna ruahtuiah an chantir laiin mi ṭhenkhat tan erawh chhiatna thlentu ruahtui a lo ni fo tawh a, hei vang tak hian kan fimkhur a ngai a ni. Ruahtui kawl nachang hre tan malsawm ruahtui a ni leh mai dawn a, thlai chingtute tan pawh malsawmna thlentu tho a ni dawn.

Chutihlaiin mi ṭhenkhat tan erawh chhiatna thlentu a ni leh mai ang tih a hlauhawm a. Kan in leh a velah te lei khi leh in chim te, lei tawlh lakah te kan him theih nan ruahtui luh theihna lei a awm em tih te pawh in en fiah ṭheuh ila. Thil ho te ni si, pawimawh em em si kan tih loh avanga chhiatna thleng hi a awm ve fo avangin awmze nei taka fur pui kan hmachhawn thiam a hun khawp mai. Ruah tui vanga chhiatna a thlen fo tawh loh nan mitinte in buatsaih ang u.

Khaw cheng rei deuh te pawh kan hma­chhawn leh ngei dawn a, he mi hunah hian ruahtui khawl ngah dan tur te pawh kan lo ruahman lawk thiam a ngai a ni. Ruah tui hi thianghlim taka kan kawl chuan in tlak a ni tih kan mithiamte pawhin an sawi tawh ṭhin a, malsawm ruahtui atan hman ṭangkai i tum hlawm ang u khai. Kum dangah chuan fur lai hian chhiatna a thleng zing deuh ṭhin a, kan MLA ten ṭanpuina awm thei ang ang an sem a, mawng pawh hung hman mang loin an buai viau ṭhin a nih kha.

Chhiat­na a thlen tawh hnua silpouline sem chiam ringawt tawh loin ruahmanna ṭha zawk nen fur hi hmachhawn tawh ang u. Sorkar pawhin fimkhur zawka furpui kan hmachhawn theih nan mipui hnenah awareness te nei thei se, hlawk zawkin furpui hmachhawn i tum ang tawh teh ang u.

- Lal Pekhlua