Tiam chin lam pan (Philipi 3:12-16)

A chunga Bible chang kan tar lan aṭang khian ringtute hi hmalam pana kal zel tur kan nih leh kan nunah hian paih ṭhen tur leh belh zel tur a awm a ni tih kan hre thei awm e. Kan ramah Kohhran hrang hrang kan awm a, kan uar lai leh uar loh lai te a dang hret hret a. UPC chuan rawngbawltu zuk leh hmuama fihlim lo chu Pulpit aṭanga thusawi an khap a, an fak awm hle; zuk leh hmuama fihlim lo chu rawngbawltu atan hman loh tur tihah an la kai sang mahna.

Mizoram hi cancer vei kan tam a, khawvelah pawh taksa peng enge mawzatah chuan cancer vei tamna kan ni nghe nghe a ni awm e. Aizawl veng tinah hian cancer vei engemawzat kan awm reng niin alang. Heti em em cancer vei kan tam chhan ni thei awma an sawi ṭhenkhat chu kan ei leh in a thianghlim tawk lo, thil rep kan ei nasa lutuk te, zu leh ruihhlo dang kan uar lutuk te hi a ni mithiamte chuan an ti. Doctor-ten rinthu mai ni loa cancer thlen tam tirtu chiang banga an sawi chu zuk leh hmuam hi a ni.

Kan pipute chuan hlo thlawhnaah thosi leh vaihmite laka him nan meizuk an in zirtir ṭhin a, anni chuan hriselna a khawih pawi leh pawi loh pawh an hre lo a ni. Tunlaiah thosi leh vaihmite tamnaa hlo thlo ngai tawh lo zingah pawh meizial zu kan la tam viau. Hlo thlo mi tan pawh meizial ni lo in hnawih chite a awm bawk a, chung te chu hnawih mai ila, zuk leh hmuam laka kan fihlim deuh deuh hi a ṭul a ni. Thil in tih hmuh hnam kan ni bawk a, veng tina kan hero deuh deuhho hian bul han ṭin mei zuk aiah a hnawih chi hi han inhnawih thei sela aw.

Kan Kohhranah pawh hian Pathian thu thoelogy-ah phei chuan ka lo hero em em leh a sermon ka ngaih thlak apianga thil thar zir tur ka hriat pawh a famkim bik lo - vawi khat sude sikul kan ṭan hmain Biak In luh dawnah chiah hian sadah a hmuam a, Biak Inah a luh pui a, ka man chiang viau. Paul-a chuan mi zirtu ni rawh u a tih ang khan ani pawh keini a beramte thil ṭha min zirtirtu tur ber a ni sia tih ka ngaihtuah ta a, hmaichhana kan entawn a nihzia leh a thil chin ṭha lo te chu sim tura hrilh mai ka duh thu hrilh hial ka duh a ni.

Keni Presbyterian chuan ATC-a Pathian thu zir tur leh Pastor hna thawk tur pawhin zuk leh hmuama fihlim lo chu kan duh tawh lo a, thil ṭha leh ropui tak a ni. Chutilaiin tualchhung Kohhran pawh hian hma kan sawn a hun ve tawh lo maw? Tualchhung Kohhhran hrang hrang Koh­hran Committee a awm mek zingah zuk leh hmuam sim mai thei lo kan awm tih a hriat a, hengte pawh hian kan sim mai theih loh pawhin ualau deuh chuan ti tawh lo ila chuan a ṭha khawpin a rinawm.

Mipui hian Kohhran Commi­ttee a tel tur Upa/ Tual Upa kan thlan dawn hian piangthar leh mi fel rau rau-ah zuk leh hmuama fihlim te hi melh tel ta deuh ila, tichuan generation lo kal lehah chuan zuk leh hmuama fihlim Kohhran Committee kan nei thei maiin a rinawm. Chumi zawhah rawngbawltu zuk leh hmuama fihlim kan ti leh ang a, nakinah phei chuan zuk leh hmuam ti lo hnam kan ni ang a, Pathian rawng bawl tak tak tur pawn a international ruih tawh mai dawn a ni. Tunah chuan rawng kan bawlna pawh hi keini aia hnam chekhnawk leh hnuaihnung bulah bak bul kan ṭan thei tak tak lo niin alang.

Vawikhat chu ram dang aṭangin Presbyterian Synod te thawhho pui (partnership) turin min rawn zir chiang a, mah se in inkhawm dan leh buhfai ṭham leh in sude sikul neih dan zawng zawng hi chu ṭha kan ti lutuk, mah se inkhawm ban vel leha mei in zu sup sup ang te hi kan thawh ho pui thei lo che u, an ti nia.... kan Synod puipate tan chuan hnar a lian duh ngawtin a rinawm. Kan Bible chuan, Pathian khawngaihna avang hian inthawina nung leh thianghlim leh Pathian lawmtlak ni turin in taksa chu inhlanah ka ngen a che u, chu chu in rawngbawlna awm reng a ni. He khawvel dan ang hian awm suh ula, Pathian duh zawng a ṭha leh lawm tlak leh ṭhat famkim chu in hriat fiah nan in rilru a thara awmin lo danglam zawk tawh rawh u, chu chu in rawngbawlna awm reng a ni, a tih angin kan thlen chin aṭanga hmasawn zelin, tiam chin lam panin zuk leh hmuam i do tlang teh ang u.

- Rinawma Bawlte