MIT I ENTIR DAWN CHUAN...

I mit i entir dawn chuan heng hi zawm hram tum ang che -

1) I mit i sawisel dan kim chang takin ziak la, a indawtin doctor hrilh ang che

2) I inentir tawhna lehkha i neih zawng zawng keng ang che

3) Tarmit vuah i nih chuan i tarmit vuah chung ngeiin kal ang che

4) I tarmit vuah lai power inziahna lehkha keng rawh

5) Damdawi ei lai emaw hman lai emaw i neih chuan a hming hre ngei ang che. A theih chuan damdawi an chawhna che lehkha keng tel ang che

6) Zunthlum (dia­betes) i nih chuan i inentir hma ni emaw a zinga i blood sugar (Fasting leh PP) report keng tel ang che

7) Damdawi huat i neihte i doctor hrilh ngei ngei ang che

8) I inentir hunah bawm enga alphabet inziak an chhiar tir ang che a, thuawih takin chhiar rawh. "Kei chu chhiar ve kher a ngai lo" ti reng reng suh; mit entira a pawimawh hmasa ber a ni. I chhiar thiam lo a nih pawhin sawi hreh lo la, chhiar thiam lo tana test dan a awm vek. (Chhungte ziak leh chhiar thiam lo tan in lo hrilh atan)

A theih hram chuan taksa leh thawmhnaw fai takin, ka leh ha fai takin kal tur. Kuhva

ṭhial sen sung chung te, sahdah leh tuibur hmuam pung chung te, chewing gum ṭhial ri pup pup chungtea kal loh tur. Zurui chung phei chuan mit entir loh reng reng tur.

Eye specialist-te hian hnai taka damlo mit an bih a ngaih ṭhin avangin ṭawp taka kal loh a ṭha. Hriatthiam loh neihin doctor-te zawh hreh loh tur. Doctor pakhat rawn a, a course pawh a zawh hmaa doctor danga insawn zung zung hian dam a har duh.

Ka ziak ta duah a, zawm vek a har mai thei mah se zawm thei ila chu a duhawm hle mai. Tin, Aizawl pawn aṭanga lo kal tan phei chuan kal hma zan aṭangin lehkha pawimawh ken tur chu bag-ah dah sa a ṭha. Lehkha pawimawh ken theihnghilhin kar a hla tawh ṭhin si a, a buaithlak bìk êm mai.

Tun laiin cell phone nei lo kan awm tawh mang awm lo e. I phone kha i inentirna lehkha (prescrip­tion card) dah ṭhat nan hmang ang che. A thla la la, hming, kum, veng, date lang vekin, i save keuh dawn nia. Nangma lehkha leh i chhungte lehkha pawh.

Chuan inentir dawn­ reng rengin lehkha pawimawh lo keng theihnghilh mah la i phone ami kha i entir mai dawn a ni. Phone hi chu kan theihnghilh mawh si a. Tarmit power inziahna lehkha pawh i phone-ah save ṭha rawh le.

- Dr. Lalhuthangi Hmar