NGAIHSAK HLAWH LO THINGTLANG COLLEGE TE

A thupui hi a dengkhawng deuh em aw? Thiam ang tawka tinem veah chuan ka inngai a, a lo na deuh a nih pawhin ka ṭhahnemngaih luat vangah min lo ngaihsak dawn nia. Mipui mimirin thinglang lam leh khawpui lam kan thlir dan, kan rilru hawiher (mentality) pawh hi kan en chian deuh hlek chu ngaiin ka hria. Ram pum huapa kan thil thlir dan te hi kohhranah a inpho chhuak chawk. Khawrel chhiatna (kangmei, thlipui, leimin etc.) lo thlen chang hian a chiang zual ṭhin.

Biakin chhia sak ṭhat ngai ṭheuh ṭheuh, chhawmdawlna pek kawngah pawh kut a inhlawk hleih deuh ṭhin. Chhiat dan thuhmunah pawh thingtlang lam tan sing tel sawi a nih chuan khawpui lam tan chuan nuai tel a ri nghal zel (entirna chu sawi hrih lo mai ang). Chawp leh chilha reltute thiam loh a ni hran lo; kan ram mipuite rilru hawi her a reltute-ah a rawn inlar a ni mai.

Sawrkar hnathawk, a bikin, Education Depertment pahnih, Higher & Technical Education leh School Education- a thawk (zirtirtu) te, khawpui aṭanga sawn chhuah kan harsat em em dan leh thingtlang lama awmten khawpui lama luh an chak dan te hian ngaihtuah a tithui. An hna zawn laia ‘khawiah pawh awm ka hreh lo’ titute khan, an ngheh veleh, khawpui lam luhna remchang an lo zawng leh char char a, an hmu nge nge bawk ṭhin. A tuartu chu zirlaite leh a khaw mite an ni.

A changtu Minister-te pawh hian tih ngial chu an han tum ṭhin tak na-in an tang leh chat chat zel zawng a nih hi, pawt bettu ṭha tak awm vang ni maw. Hei hian, result a nghawng lo thei lo. A tawpah ramin a tuar leh bawk. Central Services-ah kan tling thei lo kan tih phah. Kan IAS/IFS ni ta te ho kha thingtlang lam mi deuh vek an nih ṭhin kha. Hetiang thawktu lama harsatna hi Primary leh Middle School lamah chuan a khaw mi emaw an bul hnaia mi te aṭangin duhthusam an nih chiah loh pawhin, a la tih nawk nawk theih. High School leh a chung lam, Higher Seccondary School leh College mawlh mai hi a ni buaithlak chu. A sang tulh tulh a, ngaihsak an hlawh lo telh telh a ni ber.

India ram pum huapa College leh a chunglam zirna tihhmasawn nan leh an dinhmun endikna kawnga, thuneihna sang ber neitu NAAC (Autonomous Body) ruahmanna chik taka zir chian chuan khawpui College, hmun chep lutuk leh tawt lutuk a in-ekbengna college ai chuan, thingtlang lama College hmun hma zau tak neiten remchanna an ngah daih zawk tih kan hre thei. An tih fuh phei chuan sang takah an invawrh thei. Chu chu a dik ngei a ni tih tunhnaia Govt. Serchhip College dinhmun NAAC tehna khan a tichiang khawp mai.

Zirlai naupang tam lamah chuan an tluk loh khawpuiah an tam mai. Mahse, an ṭha tlat. Gov. Serchhip College chuan December ni 29 leh ni 30, 2021 khan NAAC Peer Team hmachhawnin, MZU hnuaia grade hmu sang ber (CGPA 3.18) nihna a hauh (hrih). Principal, staff, zirlaite, alumni (an college aṭanga zir chhuak) te, nu leh pa, khawtlang hruaitu, NGO leh Bialtu MLA thlengin an ṭang tlang tih a chiang khawp mai. An fakawm thlawt e. College dangte pawh Serchhip College aia nep bik lo tur an awm ngei ang. Mahse, an nep tlangpui. Eng vang nge? Tawite a chhan dawn chuan “Ngaihsak an hlawh loh vang” a ni mai.

Thingtlang leh khawpui College-a thawktute hamṭhatna dawn a inang tlangpui a, UGC leh RUSA Scheme-a grant an dawn chung changah pawh a rualkhai viau. Pawi ta ber chu Transfer & Posting System (thawktute insawn kual dan) leh Service Rules mumal lo lutuk hi a ni. ‘Higher & Technical Education Department chu a chuh chak chak kaisanna leh chan ṭhatna a ni’ ti ila kan sawi sual vak lo ang.

Hamṭhatna dawn inangah chuan a thawktuten thingtlang aiin khawpui an duh zawk deuh vek. Professor/ Associate Professor ṭheuh ṭheuh pawh khawpui mi chuan ngaihsan an hlawh deuh a, anmahni pawh an indah sang deuh zel niin a lang. Heng te avang hian thingtlanga awm college zirtirtute chuan khawpuia insawnna hun remchang an dap char char a, an hmuh veleh chhuanlam awm theih zawng zawng siamin thunei­tu­te an dawr nghal a, an hlawhtling nge nge ṭhin.

Thil pawi deuh mai chu, thawktu insawn kual pangngaiah chuan, a thlaktu an awm ṭhin a ni ngai a, thingtlang aṭanga khawpuia lutte chhuahsan College-a hmun ruakte erawh hi chu hnawh khah a ni ngai meuh lo. Hnawh khah hram a nih pawhin a chhuaka te tluk tur thawktu nghet an dah ngai lo. A nghet lo deuh hlir an dah ṭhin. Principal nghet awm lohna phei chuan ngaihsak an hlawh lo leh zual emaw tih palh awl tak a ni.

Tlemlai deuh khan MZU hnuaia Sawrkar College-a Principal hlunho an pension hlawm avangin Principal nghet 5/ 6 emaw lek an an awm a. Khawpui zirlaiten nasa taka an nawrh avangin enge maw zat lak thar an ni a, chungho zinga tam zawk chu Khawpui chhunga College-ah thawhtir an ni. Thingtlang College Principal pension te hmun ruak erawh ngaihsak an ni lo hle.

College-in a mamawh ngawih ngawihna avanga Principal pension tur thla hnih khat lek pawhsei (extent) an rem tih loh laiin khawpui chhunga mi, pension tur pawhsei erawh an harsat lem lo. Khawpui chhung College ṭhenkhat te hi chu H&TE Directorate Officer-te chawmtu College an ni ringawt. Hetiang zela kan kal chuan thing­tlang College (ṭha tak tak, duhthu­sama chei thei ni si) te hi chu an ngaihtuah awm ngawt ang.

Zirna ṭha kan duh takzet chuan India rama zirna sang (College leh University-te)nNgaihtuahtu pawl (NAAC) te duhthusam tihpuitlun awlsamna ber, ram hmasawnna hnuk pawimawh tak ni bawk, thingtlang college-te i ngaihsak ang u.

- Dr. Lalsiamhnuna