Airport chim kha a pawi lo em ni?
Lengpui Airport chim hnu khan Mizoramah hian kawng zawh mup mup emaw, bang tura inauh luai luai lam a thlen ka rin nen social media lama Kamrul-a Kamrul-a tih fiamthu leh thutak pawh thliar theih loh bak thu hmuh tur a awm zui lo miah lo mai.
Mizoram First lamin thu an thehluhte kha a reh ta vang vang mai bawk nen, Lengpui Airport sak meuh a sak chhiat vangin a chim rup mai kha a ni a, chu pawh chu kan en liam ta a nih chuan, he Mizoram hian infrastructure ṭha hi a phu thlawt lo a ni.
An tia lawm, Mizoramah chuan a chhim tawlh tawlh a, hnathawh a nuam tawlh tawlh mai an lo ti ṭhin a ni awm e! A chhan chu monitoring lam a awm ve ngai mang lova, contractor tan paradise a ni an ti hial. Tun hma kha chuan Kolasib leh Vairengte inkara contract hmuh hi a bungraw lakna man a tlawm avangin contract ṭha tiin an sawi ṭhin. Tunah chuan Kolasib leh Vairengte lamah Journalist leh Social Worker vengva deuh deuh an pun zel avangin hna thawhna hmun nuam lo an ti leh daih tawh.
Tunlaiah chuan District Council area lam hi an thikthu a chhe lova a hlep pawh a ṭha alh alh hle an tih hi dawt nge thutak kan va hre ve phak lo. Thu dik a nih chuan contractor te tan paradise a ni ve leh mai dawn tihna a nih ber chu.
District Council huam chhung chu sawi loh, kan zavaia tana ualau ber pakhat chu lengpui Airport a ni a, chutah chuan KR Construction (Kamrul-a ta) chuan tuma thal ve theih loh restricted tender hmangin hna a hmu thei ngat a. A hna hmuh dan pawhin sawi a kai tawh avangin midang zawng aia ṭhaa a thawh a rinawm nen a sak laiin a chim ta daih mai a, Mizo mipui chu social media-ah kan phun kan phun ta a ni.
Vairengte lam ramri hnaiha kawng laihna hnuhma pawr tak leh a laih man sawi kai tak te pawh hi a sawi chhuaktute misual ang maia an chhuah lohna turin a chhehvel mipuite hian lo chik ve peih se. Hengte hi tute beihna mah ni lovin Mizoram thil tur hi chu ṭha takin siam ila, tunah hi chuan Airport sakna tur pawisa pek belh an nih loh vangin a chim kha kan sawi mama chhe chu a ni ta.
- Lalremruata