MIZORAMA KA NI HMAN TE #1

Hei, tum loh taka Mizorama ka rawn khawsakna pawh kum khat chuang lai a lo ni ve hman ta! Mahni ramah thlamuang taka kan awm hle hle theih tawh loh azarah, ka awm ngai lohna, mi khua leh ramah mikhual dinhmuna dingin ka awm kual ta nawk nawk a, tawnhriat thar sawi tur pawh ka nei tam hman tawh hle. Tun ṭumah chuan Aizawla taxi leh two-wheeler ka tawnte chanchin hi ka sawi chak riau.

Vawi khat chu Treasury Square aṭanga Power House kal tur ka ni a, two wheeler taxi ka la a, kan inphur phei ta a. Kan tlan pahin kawngah chuan heti hian a khalhtu nen kan inbe pah zel a,

“Ka pi, i kalna tur Power House hi maw. . . a hmun thleng ka thlah dawn che a nih chuan hel kual a ngai a, pawisa i sen belh ang. Chu ai chuan tihian ti ila i tan a ṭhat zawk ka ring . . .”

“Engtin?”

"Ihh. . . Floria Hotelah ka dah che 'nga. . . chuta ṭang chuan step vawi khat chhuk thlak a ni mai, i zuk thleng nghal mai ang. Tichuan cheng 30 vel i save theih phah dawn nia. . .”

Mak ka ti kher mai!

Kha tlangval kha sum hlawh a duh vangin two-wheeler a khalh a ni a, a sum hmuhna tur lam aiin a passenger hlawkna tur min ngaihtuahpui zawk a nih chu! A va ropuiin a va ngaihsanawm tak em!

Mandalay kan awm laia kan mikhual pakhat, thingtlang aṭanga lo zin, taxi lain kan in a rawn zawn lai kha min hriat chhuahtir a. A awmna aṭanga kan in chu minute nga kal vel lek a ni a, kawng sira taxi lo ding hnenah kan address hmuhin a han zawt chu driver chuan hla tak anga lo hrilhin, a taxi la nghal turin a lo sawm a. Tichuan minute 15 lai mai hi a tlan kualpui hrep hnuah chuan kan kawtah a rawn chawlhpui, dah ta (drop) a nih chu! Taxi man a chawi zat kha uiawm tham ve tak a ni.

Two-wheeler taxi dang leh:

Zan khat pawh two-wheeler taxi ka la leh a, a khalhtu chu ṭawng duh ve tak mai hi a lo ni a, dilchhut takin thu min zawt peih bawk. Kei chuan ziakmi (writer) ka nih thu leh Mizorama ka awm chhante ka hrilh pah ve zel a. Tichuan a bike khalh pah chuan kan thlenna hmun leh veng hmingte min hrilhfiah zung zung a.

“Ka pi, helai hmun hi i thleng tawh ngai em?” “Ka pi, khawilai nge hmuh i duh?”

“Helai hmun aṭang hian Aizawl view a rem. . . i chawl duh em?”

Zawhna chi hrang hrang min zawt a, ka duh apiang min tihsak a tum tih ka hriat chuan ka ringhlel ta deuh a. Ani hi sum min dil belh theih dan remchang a zawng a ni lo maw? ka ti rilru hman. Chuvangin, tlang takin ka zawt ta ringawt a.

“Ka kal tumna hmun i hre reng si a, eng ngati nge thil dang dang min zawh kual chiam a?” ka ti ta rawih mai. Ani chuan, dam tein tihian min chhang ta hlauh a:

“Ka pi, ka duhsak vang zawk che a nia. Writer i ni a, writer-ho hi kei chuan ka ngaisang em em a, kan inphurh remchan lai hian i thil hmuh chak leh i la thlen lohna hmunte kalpui che ka duh vang mai a ni. I duhna sawi rawh, ka hruai zel ang che, pawisa min pek a ngai lo vang!”

Aw ka Pathian! Ka zak kher mai!

Taxi ka la:

Tahan lam aṭanga thil min thawn, bawm lian leh rit tawk chu hawnpui tur ka ni a, taxi ka la ta a. Power House aṭang ka awmna thleng taxi man chu Rs. 70 tur a ni.

Kan kawtkai kan thlen chuan taxi chu a chawl a, kei chuan driver hnenah, “Khawngaihin ka thil hi ka room thleng min thiarsak thei ang em le? A rit sia, step a awih bawk si a, ka inring tawk vak lo a. . .,” ka ti a. Driver chu a rawn chhuak nghal a, “Lungngai suh, ka pi,” ti pahin ka thil chu a pu chhuak vat a, ka roomah chuan ka inzui lut ta a.

“Engzat nge ka pek ang che?" ka zawt nawn leh. Ani chuan, "Sawmsarih kan tih kha. . .” a ti a. Kei chuan, “E le, kha chu taxi man a ni a, thil min thiarsak man kha?” ka han ti chu, a nui sek a tihian min chhang:

“Khai!”

“Ka pi, engmah pek belh a ngai lo aw. . . kha kha chu tlawmngaihna liau liau a nih kha,”

Awi . . .! ka hmulthi a ding sung sung thei zu nia!

Hetiang thil hi tun ang hunah, la awm thei tur paw’n ka lo ruat ngai lo reng reng a. . . ka va han lawm tak! Ka lawm em avangin cheng za ka pe a, “Nangmah avang hian Mizoram hi lo hmingṭha zel rawh se!” ka ti sep kha; ani chuan a hre tawh lo.

He thil duhawm leh hlimawm tak ka tawn rual hian hmanlaia Yangon khawpuia ka thil tawn pakhat ka hrechhuak leh pek a nih chu!

Yangon aṭanga Tahan haw tur ka ni a, taxi in Bus Station lam kan pan a, ka chawlhna hmun tur kan thlen chuan driver hnenah, “Khawngaih takin ka bungraw pakhat hi ka bus chuanna turah min nawrpui ta che? Ka bungrua a tam sia vawi khatah ka inthiar zo seng dawn si lo, rukru an tam si,” ka ti a. Ani chuan, “Aw le . . . aw le . .” a ti ve nghal mai a.

Tichuan, taxi-a ka bungruate chu kan han chhuah fel a, taxi man ka han pe a. Bungraw (luggage) pakhat leh ip (bag) pakhat ka lak rualin taxi pu hnenah chuan, “Ka pu, nangin kha kha min rawn thiarpui dawn nia,” ka ti a. Ka kal hmasa ta a.

Ka bus chuanna tur awmna chu minute hnih kal pawh a ni lo vang, ka va thleng nghal mai a. Ka bungrua kan nghat chiah, hnunglam ka han hawi chu, min rawn zui tura ka ngaih driver chu hmuh tur a lo awm ta reng reng lo mai a! Mangang takin ka han hawi kual vel chu, nichina a taxi chawlhna chiahah khan ka bungrua chu a lo ding fal reng mai niin! Kan driver pa chuan ka bungrua min thiarpui peih lo avangin a lo haw ru daih a nih chu!

God Bless Mizoram!

A chunga ka sawi, keimah ngeiina ka tawnhriat, taxi leh two-wheeler taxi te avang khian ka lawm hliah hliah a ni. Anmahni zarah kan khawvel hi chutiang em em chuan a lo la chhe bik lo tih min hriattir a, an sawi ṭhin 'Mizo tlawmngaihna' leh 'Mizo rilru put hmang' te kha a takin hmuh tur a lo la awm reng a ni tih min hriattir bawk a ni.

Mizoram hi, Pathian malsawmna phu hliah hliah nun duhawm leh zahawm tak neitu hnam lo ni zel rawh se!

June 10, 2022 4:13 pm, Friday Woodrose Colony, Aizawl

Mai Sokhlei Par (Chinland Rose)