CHAKAI FARM LEH TELHAWNG FARM

Tunlaiin thuthar mite ngaihven hlawh tak Chief Secretary Office kal tur dan – dan rinloh tih leh, Champhai leh Hnahlan Grape chungchangten chanchinbu (media) lam a luah hneh hle a. A hmalawkah Kolasib KṬP inkhawmpuilianah Speaker te thusawiin a luah hneh hle tawh bawk a. Mi tam takte ngaihdan pawh a sawh nghing dawrh dawrh awm e, nakkum 2023 inthlan turah pawh hian engti kawng takin emaw awmzia a neih phah ngei a rinawm. Heng Chief Secretary dan leh Grape chungchangte hi chu kan hotuten fel takin an rel turah ngai ila.

Tuna kai sawi tur Chakai Farm leh Telhawng Farm hi chu, ngaihtuah chian a ngai ta hlein a hriat. Chakai Farm phei hi chu hman deuh aṭanga Pilot Project-a an ruahman, sum pawh an lo seng viau tawh a, mipui hian kan ngai ropui lem lo nge, sawi hi a hlawh tehchiam loin a hriat. Kan sawrkar hian kawng hrang hranga kan hmasawnna tur leh ei leh bara kan intodelh theihna tur hian heng Project atana sum tam tak leh, tha leh tui senga hmunhma kan hman ai hian, Project dang tih tur hi kan hre lo em ni a tih theih rum rum ta mai. Tunhnaiah ni tin chanchinbu aṭangin Chakai Farm chungchang kan lo hria a, sawrkarpui Minister, ama bial ngeia mi, hmun kilkhawr tak pawh ni lo, Pilot Project kum hnih dawn buaipui tawh, Data felfai leh uluk tak buatsaih a, hma zauh zel tlak a nih leh nih loh hriat tawh awm tak a ni. Kut hnathawk (a tui mite tan) a innghahna tlak a nih dawn phei chuan hmalakpui vat ni se. Kuthnathawktute hi chuan a rah kan seng vat loh phei chuan kan tlin lo mai ṭhin. Kan ram tui zawng zawng a hnar kin thlengin, chakai awm lohna a awm awm lo e. Kan tlang mipui Khasi ho tak ngial pawhin an ei duh loh, keinin sum tam tak senga Chakai Farm lo buaipui hi chu a zia lo deuh lo maw! Hmalakna tur dang a tam teh reng nen!!!

TELHAWNG FARM : Hei pawh hi hmanni lawkah Minister zahawm takin Chhimlamah Telhawng Farm siam tur, Cultivator te hnenah a chi ngaihtuahna tur sum ṭhahnem tak a ruahman tih thu kan hria. Kan ram ei leh bar intodelhna turin hei aia ṭha zawk Project dang hmalakna tur a awm lo em ni? Keini ang rual chuan Telhawng chu uluk taka sawngbawl a, saum leh chingala bawl a, chawhmeh number 3-a awm ve zauh tawkah kan ngai a. Chutiang tur chuan Bazar niin lei mai tur a awm ṭhin.

Ni 7.4.2022 khan Mizoram Agriculture, Horticulture leh Irrigation Officer Pensioner (MAHIOPEN) Annual Conference kan neih tumin TELHAWNG FARM chungchang thu hi kan sawiho a. Hei Officer Pension kan ni a, eng emaw zatte phei hi chu Director-a Pension kan awm nual a, hmanni lawka Pension te pawh kan awm awm e. Kan Service chhung khan Telhawng chungchangte hi buaipui hman kan awm reng em? Eng vang taka kan ram tana thlai pawimawh nge maw a nih a, Pilot Project ang hrim a cultivator eng emaw zat chin tura a chi ngaihtuah nana sum tam fe (nuai sawmthum daw) ruahman a ni hi, Project dang Cultivator te tan chhenfakawm leh ram a awm lo em ni? tiin kan sawiho a. Sawrkar ruahman a ni a, sisawp taka cultivator te tan thil chin manhla tak tur a ni ang tih leh a ni lo ang tih lam kan sawi lem lo. Japan rama an chin thu leh an harvest hnuin an zailep a, an phoro a, an rawtdip leh a, damdawi siam nan an hmang ṭangkai viau niawmin sawite pawh kan awm.

Heng Project pahniha sum tam tak sen ai hi chuan, Mizoram khawilai hmunah pawh a aia awlsam leh chhenfakawm zawk Project buaipui tur tam tak a awm ngei ang. Hman kum lawk aṭanga Horticulture Department in Dawnfawh leh Tomato cultivator te hma an lakpuite hi a ṭhain a va hlawhtling em! Dawnfawh phei chu a hralhna lam buaipui ngai khawpin an thar a nih hi.

Mamit leh Kolasib District chhungah hian kumtluana chin theih vegetables thlai chi hrang hrang, Zikhlum, Parbawr, Brocoli, Bawkbawn, Bawrhsaiabe etc. a chin theih a, Cold Storage pahnih ve ve awm bawk se, kumtluanin State dang aṭanga thlai leh Sangha chenin ni tina lo lut ṭhinte hi kan dang thei ngei ang.

Pi Veronica Zatluangi’n Mizoram intodelh nan DAILUAH leh NIHAWI a sawi pawh hi hma kan lakna ngei ngei tur a ni, Nihawi aiah PURUNSEN ni zawk ta se. Brig. T.Sailo hunlai khan Dailuah sen leh Nihawi te hi Champhai leh hmun hrang hrangah (Trial) chin chhin a ni tawh a, a hlawhtling khawp mai. Mahse, hmalak zui a ni ta lo. Heng thlai Dailuah sen leh Purun sente hi englai pawha chhung tinin tukzana kan mamawh leh kan hman a ni a, kan ramah hian a ṭhain a chin theih vek si a. Tuna kan sawrkar hian hma a la hman lo a nih pawhin ring taka campaign naa auchhuahpuitute chuan nakkum 2023 inthlanah chuan an sawrkar phah ngei ang.

Kan sawrkar hian tuna Kolasib area a Buhherkhawl lian tak mai a bun an tihte khu a hnuhnung zawk tur an hmasaktir a ni lo maw? Kan zawl neihchhun zawng zawng leh remchang laite hi cultivator te hnenah Buhthar chhuak tam tura inzirtir leh ṭanpui ni se. Department in hma han la bing ta se a va ṭha dawn em! Tuna sum tam tak senga Buhherkhawl lianpui mai bunte khu, EKIN khawllian kal thei ang khan kan hluihlawn ṭawl leh mai mai lo'ng maw tihte hi, ram hmasawn leh duhtu tak tak leh tum tak takte tan chuan ngaihtuah a ni.

LALHMANGAIHA SAILO Holy Cross Bakery Zotlang, Aizawl Ph : 9436360275