SCIENTIST ROPUI

Pathianin mihringte leh thilnung dangte hi ropui takin min siam a. A bik takin mihringte chu kan taksa inrelbawlna ngawr ngawr mai bakah chhia leh ṭha hriatna ropui tak nena relbawl leh din kan ni tih hi thilsiam (creation) ringtute chuan kan pawm dan a ni. Kan taksa in relbawl dan hi a zirchiangtute leh a hre thuk apiangte mak tih a tling a, tin, eng chena thuk nge taksa in relbawl dan hi kan hriat tawh a, eng chena thui nge kan hriat loh la awm; a tehna scale awm ta se khawi lai nge kan thlen tawh le tih hi zawhna awm thei leh chhan chakawm tak a ni.

Hei hian hma lam pana hriat belh chakna/ duhna scientist tam tak te pe in research neih tirtu a ni bawk awm e. Kum 1953 khan James Watson leh Francis Crick te chuan DNA structure an lo hmuchhuak a, hei hi kum zabi 20-na a thil hmuhchhuah pawimawh berte zinga mi a ni hial awm e.

He an thil hmuhchhuah vang hian science lam hma­sawnna ngawr ngawr mai bakah thil tam tak kan hriat belh phah a ni. Tlemin han sawi zau ta ila, DNA structure hriatfiahna vang hian natna tam tak leh natna hrik tam tak kan lo hriat chian phah a. Mihring DNA pumpui mai zirchianna (Human Genome Project, 2003) scientist ten an neih khan heng natna hrang hrang kan tawrh ṭhin; cancer, diabetes, AIDS, malaria, Alzhei­mer’s disease, TB leh a dang tam tak hi kan lo hre chiang tawh ang a, chu chuan invenna leh tihdamna lamah nasa takin min pui thei ang tih chu scientist-te suangtuahna a ni.

Kan taksa leh natna te hi kan hriat chian a pawimawh a, chuti a nih lohva kan ral beih tur ber kan hriat loh chuan engtin nge kan lo inven/ indan theih ang. Tichuan, thiamna hmangin natna lo hmuhchhuah (diagnosis) dan rang (rapid) zawk leh invenna vaccine ṭha zawk te kan lo neih theih phah ṭhin a ni.

Hun hmasa lamah chuan, vaccine siam chhuah te hi a awmzia pawh hriat chian mang lohva taksa a chiu luh ve top mai, engemaw hleka thil inthlak danglam thut thei leh chutiang ‘risk’ chu khawilaiah nge a awm pawh hriat loh te a ni a. Nimahsela, tun hunah erawh chuan vaccine te hi, a zavai chuan ni lo deuh mahse, enge kan vaccine lak/ dawn hian taksaah hnathawh a neih, khawi laiah nge risk awm, khawi laiah nge failure thleng thei, engtin nge ṭha lehzualin natna tam zawk lakah vaccine kan siam chhuah ang ti lam hawi zawngin research kan kalpui thei tawh a. Hei hi hriain ram changkang zawkte chuan Research and Development (R&D) ah sum tam tak dahin research an kalpui mup mup a ni. Tin, sawrkar mai bakah hian mimal din organisation tam tak pawhin heng research beitu scientist-te hi sum leh paiah te an pui ṭhin a, chung zinga langsar tak pakhat chu Bill & Melinda Gates Foundation hi a ni.

Hun a lo kal zel a, thiamna pawh a lo ṭhang ve zel a. Kum 2006 a Andrew Fire leh Creig Melo-ten Nobel Prize an dawnna RNA interference hmangin RNA kan lo ti muhil/ silence thei ta a (DNA hi kan nihna, engtik lai maha danglam ngai lo tur a ni. RNA erawh hi chu a hun mil zela insiam a ni thung). Hemi hmuhchhuah a nih vang hian chiang leh zualin taksa bung hrang hrang leh natna hrik te kan zirchian theih phah a ni. He technology mai bakah hian thil thar danglam tak tak hmuhchhuah a ni zel bawk zel a. Tin, science thiamna avang hian natna lam chauh ni lovin hun kal tawha mi ruhro leh fossils te kan lo zirchiang thei ta bawk.

Heng fossils hi science thiamna hmanga zirchian a nih hian Bible nena inkalh, a bik takin kum/ hun bi chhiarah awmin kan hre ṭhin. Chuvang chuan mi tam takten Genesis-in a tarlan anga Pathianin mihring leh thil nun dangte ni 6 chhunga din kan nih dan hi an lo ringhlel ṭhin a ni.

Hemi bakah hian evolu­tionist-te pawhin Bible in mihring siam kan nih dan a tarlan ang hi chuan din kan nih an ring lo a. A chhan ni awm berah chuan kan an pui, heng Neanderthal te, Herto man te leh a dangte hmuhchhuah a ni ve leh zel a. Hei hian inhnialna nasa tak chawk chhuakin, mihringte hi Pathian din ni lovin kum tam tak kal vela hunin min her chhuah niin ngaihdan a awm a ni. Engpawh nise, ‘creationist vs evolutionist’ inhnialna hi chu tawp hleithei lo tur a ni a, a sawi hnuhnung apiang hi a dik zawk mai emaw tih chang a awm ṭhin. He article hi zawng (monkey)/ eng emaw aṭangin mihringte hi hunin min her chhuak (evolve) tih ringtute rawn hnial nana ziak ka ni lo; Pathian ropuina tihlanna ni zawk se tih hi ka tum ber a ni.

Tun kum zabi 21-ah hian khawvel thiamna hi a nasa a, hmasawnna pawh kan ngah tawh. Life science leh biology lama kan thlen chin thui tawhzia he article-ah hian ka han tarlang zuai zuai a ni mai a. Physics lam te, vansang lam (astronomy leh astrophysics) te, arts leh mechanical engi­neering lamah te mihring hian hmasawnna kan nei nasa a ni. Heng thiamna avangte hian Pathian awm rinna lohna te, thilnung dangte leh mihring hi Pathianin a siam kan ni lovang tih ngaihdan te mi tam tak a bik takin mithiam tak takte rilruah a awm ṭhin a ni. I Korinth (8:1) ah chuan ‘hriatna zawngin mi uantir ṭhin a’ tiin a lo sawi a, tun hunah hian science thiamna hmangin kan taksa inrelbawl dan te, khawvel leh van thengreng (universe) kan lo hrethiam ve ṭan dawn ek ek a, eng chena tam nge hriat loh kan la neih ang le? Khawi emaw laiah luruh ro mihring ang deuh si - zawng ang roh bawk deuh si laih chhuah a nih vang hian em ni Pathian kutchhuak kan ni tih kan lo rinhlelh leh ṭhin? Nge carbon dating emaw time scale anga kan chhut vang mai hian emaw nile kan rinna kan lo hloh tak ṭhin. Joba hnenah chuan ‘Leilung nghahchhan ka phum lai khan khawiah nge i awm? I hriat thiam chuan sawi rawh’ a ti a (Joba 38:4).

Khawvel finna a sang tawh viau emaw kan tih lai hian thil siam te chanchin leh taksa chhungril kal vel pawh kan la hre fiah thiam lo a nia, nimahsela Pathian chuan heng zawng zawng hi duh tak leh hmangaih takin a lo dinchhuak a. Stem cell research an tih ṭhin hmang hian pân dam thei lo te, ruh tliak te tihdam theih beiseiin research an kalpui ṭhin. Nimahsela, chu pawh chu a tihdam (treatment/ repair) chauh a la ni a, awm lo ata awmah Pathian chuan min dinchhuak a, min siamtu chu a va ropui dawn em! Mihring (mifing) mihrinna hian a ngaihtuah chhuak zo lo a ni (Pu Chawngkhupa). Kan hriatna mawlte a leilung leh thilnungte Pathianin min din chhuah dan kan han suangtuah ve hian, magic ang lek leka thil vir muai muai, ri rum rum mai ang deuhte pawh a ni ang. Mahse, a lo ni kher lo maithei a, ni khat tia Bible-in a ziah hi darkar 24 a lo ni kher lo thei a. Amah hi Scientist ropui berah ka pawm a, uluk takin scientific deuh hian mihringte min din hi ka ring a ni.

He khawvel leh a chhunga thil awm zawng zawng hi mithiam sang rualin hun leh tha, sum leh pai tam takin sengin kum engemaw zat zirchiangin an buaipui tawh a, kan hriat leh zirchhuahte hi a tam poh leh hriat belh tur tawp chin nei lovin a la awm zel dawn niin a lang. Siamtu Pathian lo ropuizia hi kan hmuchhuak zel dawn chu a nih hi.

- H. Lalrinkima, M.V.Sc.