Hlawhtlinpui ngei turin mau

Kan ram hruai­tuten mau an buaipui a, an atchilhna hi a rei tawh hle mai a. Kan hlawhtlin pui hun tur erawh beisei dan neih thiam pawh a la har hle thung.

Mizoramah chuan mau hi amaha lo awm mai, tuai thar leh bawk ṭhin a nih vangin kumhlun tur Pathian malsawmna ropui ber zinga mi a ni hial ang a, mahse kan hmang ṭangkai em tih lam lai erawh zawhna chhan har tak a ni mek.

Asia khawmuala Paper Mill lian ber pawl, Cachar Paper Mill te innghahna pawh Mizoram mâu kha a ni reng ṭhin a, kan ram mau hi mi rama hna sing tel siamtu a ni reng ṭhin a, an hausakna thlentu a ni reng ṭhin bawk awm e. Mahse Mizoramin mau kan hausak pui dan erawh sawi tur a la awm meuh lo.

Mau hlutna kan tel tlem lutuk ṭhin hi a pawi a, mau man tisang thei ang ber (value add thei ang ber) turin mau tlawn ni loin a chip nawi sa in mau hi thawn/ laktir tawh ang u tih hi ka rawtna ber chu a ni e. Mizoram chhunga mau kan hman ve tlemte tih loh, kan thawn chhuah tur reng reng chu a tlawn ni loin chip nawi sa in thawn chhuak tawh ila, hna tam tak kan siam dan tur ngaihtuah ringawt pawh hian hlawkna tam tak kan nei nghal der dawn a ni.

Tichuan, mau chip nawi chuan mau hlutna tam takin a belh dawn bawk a, state revenue ṭha takah mau hi kan chantir phawt dawn a ni. A bak kan CM in mau hmanga hausakna tur a sawi te leh thil dangte hi chu nakina kan la dawn tur a ni.

Kan chief minister chuan mau hmangin India mai ni lo khawvel entawn tur an hnutchhiah tur thu a sawi te, mau hmanga India rama per capita income sang ber kan nih theih thu a sawi te hi chu dam rei nghah thil a la ni tlat. Tun maia mau kan hlawkpui ve theih dan ber tur chu a tlawn ni lo; chip nawi sa chauha hralh chhuah hi a la ni rih e.

Chief minister hian hun rei tak a lo buaipui tawh mau hmanga intodelh hun hi keini ang upa lam tawhte phei chuan kan dam chhung hian kan hmu lo ang tih te pawh ka hlau deuh roh a. An sorkar hmalak lam a, mau hmanga kan intodelh ta lo pawh kha ‘political failure’ ni loin scientist te thiam loh zawk niin a sawi hial kha a ni a, scientist te meuh pawhin an tihsual phei chuan kan CM leh a hote phei chuan tihsualna chance an nei sang viauin ka hria a, an tisual dawn saah ngai ila, kan ring dik zawk mah ang tih te hi ka hlau lo hial zawk a ni.

Tin, tissue culture hmanga mau lian siam a sawi te pawh kha, thil phurawm tak a nih theih rualin, chakai farm mai mai pawh hlawkpui thei lote tih atan chuan a sang mah mahin ka hre bawk.

Kan tih nghal theih ṭha ber chu, mau hi a tlawna thawn chhuak tawh loin mau kan mahal dan te pawh hi tidanglam ila. Bamboo Chipping Unit hi hmun rem­chang apiangah sorkarin bun se, a chip nawi sa in thawn chhuak tawh ila, Mizoram hian mau aṭangin hlawkna kan nei ve thei dawn a ni. Cachar Paper mill hi lo tawpin tawp suh se, mau kan thawn chhuah dan hrim hrim hi tih danglam ka duh a ni.

- Vohbika Pu