SAWISEL NUN

Social media hi han keu ila, tunlai khawvel chu sawi­selna khawvel a ni ta mai emaw tih tur a ni. Hmuntin maiah hian mahni tawk ṭheuhah vuivaina tur, sawisel tur leh dem tur hi kan zawng luai luai emaw tih tur a ni.

A zawna han zawn tàkah chuan kawitin maiah hian sawisel tur leh sawi hnawm tur, pawr deuh lai hi a lo awm deuh zel a. A tawi zawngin kan nun hi sawisel nun a ni ta mai emaw tih tur a ni.

Sawiselna hrim hrim hi hmanraw ṭangkai tak a ni thei a, kan sawisel dan ki leh sawiselna thinlung a zirin rah ṭha tak a chhuah thei bawk. Chuvangin sawiselna hrim hrim hi a ṭha lo tia mausam ngawt theih a ni lo.

Hla siamtu-in "Fakna hi kan tân thlemtu, sawichhiat­na erawh kan ṭhian" a tih ang deuhin sawi­selna hian nghawng ṭha tak a neih chuan a hlu êm êm thung si.

Tam tak erawh hi chu sawisel tur zawng ve hrim hrim, a dika dawk thlu lem lova sawisel nuam ti ve hrim hrim leh, ngaih dan khat chauha thlira thil sawisel nuam timi hi awm ve a nia. He sawisel châkna thlarau hian a ṭha lo zawng hlet a chhuah erawh chuan ṭha lo thei tak a ni!

Thil kan hmuh dan a dik thei tawh lova, sawisel tur leh dem tur ringawt kan ngaihtuah a, lâwmna tur hi kan hmu tlêm telh telh mai a. Lawmthu sawina tur hi a vâng pharh mai a ni.

Sawisel ringawt nun hi a hah­thlak a, a nêlawm lo, chu­vangin kan nunah hian sawisel tur ringawt zawng lovin fak tur leh lawmna tur i ngaihtuah ve fo ang u. Sawisel hi sim telh telh ila, fak leh lâwm hi uar tial tial ila nun hi chu a nuam a ni leh mai!

Kan nitin nunah hian lawmthu sawina tur hi nitin kan dawng a, midangte avanga lawmthu sawina tur hi kan zawn peih chuan a awm reng, Pathianin a thlawna min pek avanga lawmthu sawina tur phei hi chu tûktin a awm!

Hetia social media lam mitin mai hi mahnia thuthar thehdarhtua (self-style journalist) kan tan tàk vek hnu phei hi chuan sawiselna thawm hi a ri nuaih nuaih a ni ber mai a. Hei hian kan hnua ṭhang leh thar chhuan lo la awm leh zel turte thinlungah helna rilru (rebellious mind) a tuh palh ang tih ka lo hlauthawng deuh ṭhin.

In fak hi uar ila, a ṭha zawnga in­chawi­mawi hi uar ila, a ṭha lam hi hmuh tam tum ila, inbâwl erawh i uar tel kher lovang u! Tukin i thawh hlimah lawmthu i sawi tawh em?

- PC Nghaklianmawia