Sawrkar hna kalphung siam rem hlek a ṭha (Ṭhalaite hmakhua ngaiin)

Kan ram kalsiam hi han thlir ila, kan ṭhalai, a bikin lehkha thiam, eizawnna mumal nei lote tana kawng sialsak dan tam tak zingah ‘apply’ awlsam deuh a awmin a lang. Kawng hnih han tarlang ila-

1) Sawrkar hna­thawk pension tawh rawih nawn loh: Sawrkar hnathawk mekte hnungah hian ṭhalai lehkha thiam

ṭhahnem tak an intlar a. Zirlai Pawlte’n nasa taka an dodal chung pawhin tun thleng hian sawrkar hnathawk pension tawh rawih nawn hi an la awm nia maw le!

Entirnan Aizawl traffic nihphung hi en ta ila, zing office kal hun laia Civil hospital zawna motor chhia a awm vaih chuan rei lo mah se Kulikawn pa lo chhuak thlengin a nghawng vek thei a. Chutiang chiah chuan kan sawrkar hnathawkte pension tawh tur, an hun pawh seisak a nih hian, a hun rei vak lo pawhin lang mah se, a hnunga ṭhalai lehkhathiam intlar mekte hi a nghawng thui riau ṭhin.

Chuvangin, sawrkar hian pension tawh rawih nawn hi chu ti lo ngam se, nasa takin ṭhalaite tan kawng an sat eng ngei ang.

2) Administrative reform: Kan sawrkar huang chhungah hian thil- a nih tur ang ni lo leh a kalphung tur ni loa kal a awm nualin a lang. Central Project siam chhuah, entirnan, MSACS ang chite hi a enkawltu atan Admi­nistrator (IAS) a beisei laiin kan ramah chuan kan dah hauh lo mai.

Kum tin ṭhalai lehkhathiam hi a za tel an inzir chhuak a. Heng kan ṭhalaite hian beisei leh innghahna lian tak an neih chu MPSC kal tlanga exam hi a ni. Mi pakhat phei chuan, “MPSC hna lak ni lo chu ka exam duh tawh lo, rilru a na duh em mai,” a ti hial a ni.

Chuvangin, Com­bined Competitive Exam-a service awmte hi sawrkar hian duhsak deuh ta se la, ṭhalaite tan sawrkar hnaah kawng a inhawng zau sawt dawn a ni. Tichuan, a chung lama kan sawi, Administrator post turte khi heng combined competi­tive-a awmho hian chelh ta se (chu chu a kalphung tur dik zawk ni ngei pawhin a lang), a kalkawng a zau sawt ang a, a luhna kawngka pawh a zau ang.

Kum tina kan ṭhalai lehkha zir chhuakte hian beisei tur neiin a kawngka chu an rawn pan thei ang. Tin, heng MPSC-in a lak nalh tawh chinte hi chu eng hna pawh hi an thiam viau zel a, an sincere bawk. Combined Competitive Exam-ah hian hna an la zing a, an la (recruit) tam lem lo; service dangte nen han khaikhin.

Sawrkar hna a indaih vek theih loh a, mah se kan ram tet leh mihring kan la tlem aia ‘unempolyment’ sang ta lutuk hi chu a dik lo a ni. Kan sawi takte khi thil tih theih a ni a, unemployment a chin fel thui dan tur pawh a lang reng mai. Huaisenna tlem nen chuan ṭhalai hna hmu lote tan kawng a sah zau belh hlek theih e.

- Lalfakawma, Kolasib