AMC-ah Duhoma lainatna vote a luang lut dâwn

Mizoram political history a la thleng ngai lo chu MNF MLA 12-in an MLA pui leh anni aia politics lama senior zawk, thil tihsual pawh nei lo chu an party hotute nawrna avangin an hek a. Speaker chuan dan awm thei tur nasa taka zawng khawmin MNF party hruaitute a hlauh vang bawkin Pu Lalduhoma chu Serchhip bial MLA a nihna aṭangin a bân ta rup mai a ni.

Pu Duhoma hi Serchhip MLA ni turin Serchhip mipuiin duh taka an thlan tlin a ni a, ZPM Chief Ministerial candidate a ni a, ZPM flag eng (yellow) nen a campaign a. Banner-ah pawh ZPM a nih thu a in ziak a, poster zawng zawngte pawh kha en ila ZPM a nih thu a inziak hlawm a, Pu Duhoma hi ZPM a ni tih hre chungin Serchhip mipuiin an duha an thlang tling a ni.

MLA ni phak ṭhiau, mi pangngai tak tak, a ṭhen chu college zirtirtu ni thei khawpa lehkha thiam, tam tak hi Pathian rawngbawlna lama inhman avanga Kohhran Upa ni phak hialte chuan Mizoram mipui leh Pathian mithmuh ngeiah Pu Duhoma chu an han hek ta a, an hek chhan hi MNF party hruaitute nawrna vang a ni tih chu mipuiin an hai lo a ni. 

Thil sual a tih sawi tur awm si lovin, "ZPM office-ah ZPM ni turin mi a läwm lut, ZPM angin a khawsa," tihte a ni a, ZPM CM candidate a ni tih an hre vek si, an hek duh avang hian thil dangah pawh an duh chhe hle dâwn tiin kan puh hial tawh ang. 

MLA 12 hian an thil tih pawizia hi an la hre chhuak dâwn chhuah a, mahni mihring pui, mahni Mizo pui, anmahni ang bawka thlan tlin MLA kha tla turin rorel lai an nih ṭan chhanin an han hek duh a nia - an dam chhungin "Hektu 12 zing­ah an tel," an ti kum­khua tawh dâwn a ni. 

Hektute hi an khaw­­ngaihthlak letling a, MNF MLA zinga a junior ho thlan chhuah an ni. MLA-ah an vawi khat tlinna a ni a, Bial tana hnathawk tura thlan khan mi bial MLA  duhlai tlakna turin mualpho pwh pawisa lovin Pu Duhoma an hek duh a. An thil tih duh a chhiat em avang hian mipuiin an puh chhe dâwn a, an bial chhunga MNF ruhkawl ni lo anmahni vote-tute ngei pawhin hetiang MLA hi thlan nawn an duh tawh kher dâwn em ni? 

Mahse heng zawng zawng phenah hian Pu Duhoma hnawk titu chu Assembly House lama Pu Duha thudik puan avanga mualpho ta hi a ni tih chu mipuiin an hria. Pu Duhoma'n sorkar kal dan a sawi apianga mualphoa thinrim ṭhin an awm a, chu chuan a MLA zinga a junior te a tir chhuak tih hi mipui ngaihdan a ni. 

Engpawhnise 2023 inthlan a la ni lo deuh a, kan hma lawka AMC inthlan lo awm turah hian neutral chuan Pu Duhoma khawngaih vote hi ZPM ah an chhung lut ruih dâwn tih a rinawm. Serchhip Bialtu MLA, "ZPM angin a awm," ti vel thu mak taka hek duhtu party hi mi pangngai chuan an vote loh duh phah dâwn a ni.