Chauvin a tlu maw? (Kei chu ring lo mi ka ni e)
Mizoram kohhran lian pahnihte Presbyterian leh Baptist Church of Mizoram chu inkhawmpui lianah in palai tawna rawngbawl dun turin hriak thihtu a awm a ni tihlan chiantirtu pawimawh tak pakhat chu an in hawisan hlen tak tak duh lo ve ve a. Chu bakah Pathian fakna hlabu siam dun zelin an in hman ṭawm reng bawk. Bethany khaw ṭhenawm pa pakhat sabengtung no duh lai ang khan Lalpan a duh a ni ngei ang le.
He kohhran pahnihte hla bu siam Presbyterian leh Baptist Kohhran Kristian hla bu hi Mizorama Kristian 60% velin kan hmang a. A hla tam zawk hi Mizorama ringtu 80% velin kan hmang a ni. Chumi zinga lar tak pakhat chu ‘Lalpan min hmangaihna chu’ tih hla kha a ni. Kristiante hunpui pawimawh tak pakhat Good Friday-ahte chu hla chu lungawi takin kan sa ve del del ṭhin.
‘Lungngaihna thing Kraws chu ka tan a pu a, chauvin a a tlu a' ti ngawt mai a, a tlu tih hi khawi aṭanga kan hriat nge ni le? Kei chuan Bible-ah ziak ka hmuh loh avangin ka ring lo. Chuvangin, kei chu ring lo mi ka ni ka tih chhan chu a ni. Pathian rin loh te chu ka ngam hauh lo mai a, ka rin loh chhan Bible thu lo en ila.
A hmasa berin Mathaia khabe liam chang phawt ila. Mathaia 27:32-ah chuan ‘Kurini khua ami a hming Simona an hmu a, chu mi chu a kraws pu turin an man a' a ti a. Chanchin Ṭha ziaktu dang Marka chuan heti hian a ti a, 'Tin, mi veivak pakhat Simona Kurini khuaa mi ram lam ata lo kal a kraws pu turin an man a' a ti leh mai a ni. A tluk thu kan hmu lo. (Mk. 15:21)
Luka hnen aṭanga kan hriat dan erawh chu hei hi a ni. Simona Kurini khua ami ram lam ata lo kal an man a, Isua hnung lama pu turin a chungah kraws chu an nghat a' a tih leh mai a. Isua a tlu tih hi khawi aṭanga kan hriat nge le? Theologian te chhanah dah chi a ni ngei ang le. A lehlam zawng chuan sermon tihausatuah erawh chuan a ṭha phian mai thei. Mahse chuti ngawt a ni thei lo.
Bible kan en chuan Thupuan 22:18-ah ‘Tupawhin heng thu hi a belhchhah chuan he lehkhabua hremna ziakte hi Pathianin a chungah a belhchhah ve ang' a ti si a. Chuvangin, Bible thu hi kan zir uluk a va ṭul em! Tup ṭawngkam thiam emawin pawm nuam zawng, awihawm sia an sawi chuan lo awih mai tawk kan awm hian hruai boin kan awm thei a ni.
Amaherawhchu, he thuah hian Lal Isua kha a tlu lo tih fiahna ka hria ka ti hauh lova, chauvin a tlu tih finfiahna ka hre lo ka ti a ni e. Tirhkoh Petera chuan ‘Mi tu pawhin thu a sawi chuan Pathian thute angin sawi rawh se' a tih kha kan hriat reng a ṭul a ni.
- F.Aihnuna, Keiṭum