First Class Contractor!!!

Mizote hian thil sawi dan te te hi kan nei ve a, "Class 1 Contractor" tih tur hi "First Class Contractor" kan han ti phawt a. Chumi zingah chuan Kamlova Chhangte inti Kamrul Laskar chu a tel ve ta a ni.

June 9 khan Class 1 contractor list thar ber tih chhuah a ni a, tun hnaia Lengpui Airport sa chimtu ngei hming kha a lo lang ve nawlh a. A hming piahah kual khung chhungah 'Non Tribal' tih a inziak tel zui thlap bawk a ni. He mi Contractor ruattu Chairman chu Addi­tional Chief Sec­retary tih a inziak lang nghe nghe bawk a ni.

Keia ngaihtuah­naa lo awm ve daih zawk chu nuai tam em em man Airport sa tura an thlan lai khan Kamrula hi Second Class contractor chiah a lo la ni tihna a nih hmel a. He thil hian min ti mu tui thei lo a, mak tih leh a thlangtu lam rilru tur ngaihtuahin ka lo buai ve em em mai a ni.

Contractor te hi an class a zir hian hna khawih theih chin te pawh an nei niin an sawi khan ka hre ṭhin si a. Airport contract amount leh Pu Kamrula Class 2 nihna kha a dik thei em? A inmil thei chiah em? tih zawhna hi ka han zawt ve teh mauh a ni.

Chief Secretary atana Vai duh loh thu huaisen taka mualpho pui rap ngam kan NGO te chuan June 9 lama order chhuak tawh Mizoram sorkara inziak lut hnam dang Contractor Class 1 ni thei chu kan lo pawm ve thlap mai a nih hmel bawk si a. MZP te lai lai pawh hi khawiah nge an awm zawh tak? An term tawpah lawm takin Party lamin an lawm lut leh a nih pawhin a mak lova, hei hi hnam issue a ni lo pawh chu a ni thei a, dan hmanga an ruat a nih avang hian Kamrul-a Class 1 contractor nihna hi kei ni tan chuan hriatthiam phak a ni ve ta lo.

Kan sawi ve thiam zawk chu "Class 1 contractor pawh ni eng ang mah se 'First Class' chu a ni lo hrim hrim tih a Airport sak chim ta aṭangin a lang" tih hi a ni.

Airport sak chim kha Opposition party lam hian an en liam ta mai mai dawn chu a nih si hi teh!

- Raymond Khawlhring