MLA BÂN CHUNGCHANG

"An bân i ring em" tia zawhna ka dawng tam ve hle a, ka chhanna chu "ring e" tih a ni. MLA vawikhat tlinna ṭhiau ṭhuau, Assembly House-ah pawh la mikhual tak, Minister chhete pawh la ni lo ṭhiau hian anmahni duhthu-in an hek hi kan ring thei lo fur a. Tu emaw inrawlhna lang thei tur chul mam tum viau mahse 'risk' leh 'phuahchawp' in a hrin chhuah, tu emaw thurawn a nih hi mipui tam zawk hian kan rinzawn vek a rinawm.

Hei vang hian a tir aṭang khan huai takin an diaqualify hi ka ring sa a. Speaker hian Dan hi sawi ve sek mah se, a chunga mi tu emaw duh dan chu Dan hmangin a puitlin dan tur an keu kualin a tin zawn dan an dap ve viau thei zawk. Hearing te han ti kual viau mahse, Politics-ah Speaker appoint tu hi an awm rân a, Court tak tak a nih loh avangin lehlam behchhan tur namnul thiam taka rorel theih tak pawh a ni maithei. Ṭhian dun kar pawh nise, a pu in 'tu rawh' a tih a tuk mai loh chuan amah chawpa disqualify theih thil a keng tlat a ni! 

Congress aṭanga khawhar taka paihthlak, amah avanga kawng zawh bur bur MNF Party a Speaker chelh thei ṭawk hi a in her leh vut duh a nih pawhin ZPM-ah hi chuan a chawr chhuak tawhin a rinawm lo. 

A hma khan ka thlirnaah ka tarlang tawh a, khawi lam lamah pawh keuh thlu se MNF hian an ṭhatpui viauna tur ka hmu thiam lo. An theih chhun chu Bye-Election ah theih tawp chhuah a, paihthlak chhun zawm nise, kan paihthla zo ngang lo a nih chuan kan nih nih kan nihpui tawh ang, kan ti laklawh tawh ti hi an ang ber a, an tawng chho mawp mawp reng dawn a ni.

Pu Duhoma hian zalen takin ZPM ah nihna chelh ṭep ṭup chung pawhin Bye-Election hi ZPM Party hming ngeiin a hmachhawn ngam tawh dawn a, chutah chuan MNF in an ngam leh ngam loh a ni tawh ang chu. Kum 2 pawh la Sorkar hmaa Bye-Election a an chak zo lo a nih chuan 'nih nih nihna' chiang takin a lang ang a, CM bakah MLA 12 te hi an thangtlawm teh ang chu. Party hlimthla a lang uar ang a, MNF ai hian ZPM hian 2023 an zuam zek zek phah zawk hial thei ang. Pu Duhoma hi a tling leh sak a nih chuan mi ṭhenkhat hmui chu ṭhuipin tlukin a chip hmak maithei.

MNF hian hei hi thlir ranin an in sawhnghehna tur leh dinhmun ṭhatna tur hnuhnung a nih avangin theihtawp bakah tlem pawh an chhuah duh hial dawn a ni. Serchhip biala lo tla tawh, Pu Ramzauva leh MNF Vice President, General Election a tling zo ta lo, Pu Vanlalzawma hming a ri zui bawk a, a tu pawh lo dah se ṭan chu a na ngat ngat khawp ang. Ruling ni mahse an phurna leh huphurhna hi a tak takah chuan a in zat velin ka ring! 

An CM candidate ber a ZPM lutuk tia an bân takah chuan an MLA dangte nen pawh hian line inang vek niin a lang; bân theih vek an ni mek a, khenbeh dawna tlansan aiin Pu Duhoma Press Conference thlengin langsar takin an ṭawiawm a. ZPM Party office an tlawh awl lo a, chuti chung chuan hêk an tawk ve miah lo hi mimal taka tu emaw hnawksak tihna hi an vanneih pui-ah ngai mai ang. Dikna duh MLA 12 te hian hmachhawpah nei nghe nghe sela, hêk zui law law se a ṭha ngawt mai, Cut-out thuhmun vek a ni si! 

ZPM hian Politics an thiam loh ṭhin hi an tuar ve thei tho. Mipui 'Court' ah an tih fo hi taimakna in a chhunzawm loh chuan an talbuai ting ve thei tho. Politics-ah thlamuanga ṭhut thluan duai hi engmah a ni lo. Tun ṭum Bye-Election hi MNF an dah NIL na tur leh 2023 inthlan leh AMC inthlan nghawng dawp thil a ni tih an hmuh thiam a, theihtawp an chhuah chuan 'an hloh' hi a lêt thum 'hlepah' an chhiar thei thung ang.

'An tih dan reng mai' tiin khawngaih vote in pe hnawk mai dawn nge, 'Ruling chhung chu MNF ah ti mai ang' in ti dawn tih hi Zoram mipuiten kan thlir rawn nghal ṭhup che u. 

Serchhip mipui nawlpuiin MNF Party Sorkar mek dinhmun in thlir dan leh in Bialtu in hmuh dan tarlanin a awm dawn a, hei mai hi a ni lo, in vote neih ve miah lohna, AMC inthlan mai tur leh 2023 General Election boruak tur hi in mihring thlan tlin a zirin thui tak a hril dawn tih in hriat tel a ngai a. Thutlukna siamtu (deciding factor) pawimawh tak in ni dawn a, rilru thianghlim takin hmachhawn ang che u. 

Pu Hawla Bial ṭhin Serchhip-ah hian Congress hian candidate an siam ang em? tih hi zawhna lian tak pakhat a ni. ZPM aia Party upa leh changtlung zawk hi an hái ngawt a nih chuan 'MNF nin lutukna syndrome' vang a ni thei ang. Chuti ni lova vote tidarh tur tala an ding a nih chuan awmzia an nei pha ve thei. A in bitum tur hi thil chiang sa, ZPM leh MNF a ni dawn a, Congress sukthlek hian kawngro a su thui viau ve thei bawk.

Rin lawk sa banna-ah hian tunge a hnu lam thlir thuia taimak chhuah zawk tih hi a lang dawn. Party leh mimal tan mai ni lo, Zoram vision nei thui zawk chu he Bial khat issue-ah hian tarlan a ni dawn e. Lehlamin nih nih nihna hmangin isk' an la a, lehlamin phelh ruah ṭhakna tur khawpin chance an nei sang bawk a, a ngaihnawm dawn - a che pelh zawk zawk pawl chuan an tuar dawn! 

MNF kum 2 tling lo deuh Sorkar thlen chin (achievment) hian an candidate a vawrh kang lawp a nih chuan Sorkar mek hi a ṭha tawk hle ah ngaih tur a ni ang a, kum 2 em pawh an Sorkar hmaa hneh taka Bye-Election ah paihthlak an nih chuan term chanve hmaa rin hlawh tawh lo tiin inthlan lo awm zel turah beisei a sang thei tawh lo thung ngei ang.