Pastor chu ni ila ka ngawi ang

Assembly House-ah pute laka mark hmuh san tum luatah MLA pahnih chuan Pastor hming an lam ri zauh a. An thusawite kha dawt a ni nge ni lo tih finfiah tumna lam aiin “Khawih thiang lo khawih” an tih ang maiin Pastor lam chuan an theihna chin chinah an han tâwng let sup sup a, Pastor chu ni ila ka ngawi ang.

Kan zui Isua Krista ber khan “Dawta sual tinrengah an puh hunah che pawh...,” kha a tiin ka hria a, a bung leh chang lam hi chu ka chak lohna lam a nih avangin ka hre ve leh pek hauh lo. Chu bakah amah khan dawta an puhna zozai kha a chhang duh miah lova, an khengbet ta a nih kha mawle.

Kan MLA pakhat zawk hian zu in ve zeuh zeuh a hria a ni mai a, a in ve lo pastor tan huat tur a awmin ka hre lova, a in ve lo chu ni ila ka ngawi mai mai ang. Pakhat zawk hian mi thusawi a sawi chhawng a, a sawi chhawn dan ki a lo dik lo deuh a nih pawhin mi thusawi sawi chhawn na na na chu Pastor ve meuh tan chuan khin ur ur tur a ni lo.

Mizoramah hian sawisel thiang loa kan ngaih deuh an awm a, chung zinga mi chu Pastor hi an nih hmel. An sawisel pawh ni loin pastor ṭhenkhat chanchin sawi chhuah chu an helh ta em em a, hei hi chu pastor ve meuh tan chuan ngawih bo pui mai mai chi niin ka hria.

A thu hrimin pas­tor-te chu rilru zau ber tura ngaih an ni a, hetia pastor ṭhenkhat chanchin tuten emaw an sawi lan zeuh avanga Facebook vela lo au ve chiam chiam turah pastor-te hi kan ngai lo che u. Facebook-ah pawh in han insum thei lo nghal mai hi chu “Insumtheihna hi thlarau rah” tia min zirtirtu in nih vei nen, lo insum hram hram zawk ula in inhmeh zawk sian.

He mi piah lamah hian Whatsapp lamahte pawh in thusawi kan han hmu leh zel a, nangni chuan ṭawng-ṭai pui hlauh zawk ula, hetianga “fight fire with fire” an tih ang maia in tih ve hi chu keini in beramte hi chuan in inhmeh lo kan ti.

Zu in in lo tih kan chiang a, khi lama pastor lem ve zeuh zeuh kha chu in ni lo a, Pathian thu sawi nawmna atan lem zeuh in duh lo tih kan hriat chian em avangin kan hmuh dan che u a la ngai reng. In rawn au chhuah a, in insum theih loh a, in rawn rik hluai hian kei ni lam chuan in zia in hloh tiin kan lo ngai zawk che u asin.

Pulpit-a in sawisel ṭhin politician-te’n an pulpit ve Assembly House-a pastor tute emaw chanchin an sawi zauh hi chu ngawih bopui mai mai ula, chhang duh reng reng suh u.

Nangni chu pastor zahawm tak in nih kha, politician ang lekin lo react ve lo hram tawh ang che u.

- Lalmuanpuia