SPEAKER ṬHA BERA HLAN CHI A NI EM!

Mizoram Legislative Assembly Speaker lo ni tawh zingah Dr. H. Thansanga, Pu Vaivenga, Pu Thangridema, Dr. Kenneth Chawngliana, Pu J. Thanghuama, Pu Hiphei, Pu Rokamlova, Pu R. Lalawia, Pu Lalchamliana, Pu R. Romawia, te ai hian Pu Lalrinliana Sailo hi Speaker ṭha bera thlan chi a ni mai em?! 

Khawvel ṭhang zelin a ken tel mihring hma­sawnna, hmanraw chang­kanna karah, tihsual palh chang awm mah se, nasa taka Party leh ram tana thawk mi niin a lang. Pu Lalrinliana Sailo hi Congress Party mi leh sa a nih laia MNF te vawm rawn, a thil tih sual nia an puhna pawh tunlai khawvel changkanna in a ken tel, sualna kan tih zinga langsar tak pakhat 'Khehpuam' a ni tih kan hria. A ruh langa sawi tur erawh ka hre ve hran lo. 

Amah Pu Rina ngei­in August 12, 2013 Vanglaini chanchinbua a sawifiahnaa a lan danin, thu dik lo hulhual a nih thu leh, mimal inbeihna a nih thu a lo sawi tawh a nih kha. November 12, 2020 a MPCC Press Release rawn chhuaha a lan danin Pu Rina hian khatih hunlai khan Drug License hmangin nasa takin thil a ti dik lo ngei niin a lang; a hunlaia amah ṭantute awká erawh a dikin a rinawm tlat. Mahse, tun dinhmunah erawh Speaker chak tak zawng a ni ngei mai. 

Zokhawthar lama sum­dawnna kalpui thiam tak nia an sawi, Silsury lamah lah Commerce & Industry changtu tih tur niawm tak, a changtu Minister chak loh avangin nge ni Pu Rina hian a va enfiah vek a. Tin, Zorinpui, Lawngtlai District lam pawh va hrutin, ramri depa insumdawn tawn­na (Border Trade) enin a va fang chhuak a. Ani tluka sumdawnna lam tuimi, tun hma Trade & Commerce a nih ṭhin laia a changtu Minister lo ni tawh ngat kha a ni ve tlat. A la vei reng tih a hriat theih mai, a tuina lam tak niin a lang. Speaker chak leh ṭha ber chu a ni mai lo maw! A kalna hmun hnihah a changtu Minister Dr. R. Lalthangliana hrilh si loa Speaker-in ama thua Border Trade chung chang a buaipui vak mai hi a ti ṭha thawkhat viauin a lang. Ama sumdawnna tur ngaihtuah tel a nih ka ring ve hauh lo.

Pu Lalrinliana Sailo MNF Party-a a luh hnu hian kum 2013 a nasa taka amah beitu Dr. R. Lalthangliana chu MNF Party OB aṭanga paih a ni a. An Party constitution-ah MLA nilai, Party President chauh lo chu OB an ni tur a ni lo, tih dan an nei nge ni. Tin, a hnuah Pu R. Tlanghmingthanga an han paih ve leh zel a, a tuartu chhungkaw tan chuan a na a nih kha! MLA ni ve lo; OB nilai an han paih tawp mai kha a ni a.  Pu Rina Sailo nena lo inbei ve ve tawh Party OB aṭangin an han thlawn ta zel a. 

Hun kal tawha MNF ho huat rawn, Septem­ber 10, 2013 a Health Minister aṭanga bang tura Total Bandh hial nei a, ruahmanna an siam chhan ber Pu Rina Sailo chu dinhmun ṭha takah a awm leh lawi si a. MNF-in sorkarna an siam tirh aṭangin Pu Rina Sailo chu Speaker hna zahawm tak an chelh tir a nih hi. 

Tun thlengin Speaker lo ni tawh zinga ṭha ber nih a tum a rinawm a, Commerce & Industry department chan thleng thlengin, a changtu Minister hriatpui si lovin a lo vil pui ve zel bawk a ni tih a lang chiang a. Speaker dinhmun a ti zahawmin Minister-te hna chanpual a lo enpui zel hi a fakawm viauin a hriat. A duhnaah chuan chak vut vut tak a ni.

Pu Lalduhoma MLA aṭanga bantu Speaker Pu Lalrinliana Sailo hi dikna duhtu, dan hmanga a thuneihna hmangtu niin in hre ve em? Ziaka a lan dan chuan ‘Anti Defection Law’ ni ngeia lang a ni miau si a. Mahse, Pu Lalduhoma hian amah vote tlingtu ZPM chu a phatsanin a lang si lo. 

Speaker hian mipui demna tur tam tak hrethiam saa, tu sawisel pawi ti loa ro a rel te, hun lo la awm zel turah atana thil pawi thei a awm ang nge awm lo ang tih a ngaihtuah lawk vekin a rinawm. Pathian malsawmna a dawng zel ang em tih thlengin a ngaihtuah lawk vekin ka ring. Chu zawng zawng hmu fiah sa veka rorel a ni a, a tih tur leh tih loh tur ngaihtuah em em loa chak tak leh huai taka thil ti mai ṭhin a nihna te hian Speaker ṭha tak, fak phu hluah hluah a nih tirin ka hria. 

Pu Lalduhoma hektu MNF MLA rual 12 te rilru hi nge dik lo; an heka rilru; Speaker zawk hi em ni dem tur? A hektu mawh nge a bantu mawh ni ta ang! Nge an heka mawh ni ta ber ang. Pu Lalduhoma leh Serchhip bial mipui ka lainat tak zet; Isua zirtir zat chiah MNF MLA te hian inchhir ni leh muthilh theih loh an nei èm lo’ng chu maw. 

A ngaidam theitu Spea­ker hi muhil thei tak maw! Sualna nei lo chuan deng zel rawh se.