Sawrkar laka ngaihhlut hlawh phâk lo Zofate!

Ram ni tla sêng lova rorêltu Kumpinu ropui vanglai tak khân, Romantic Poet ropui ber pakhata chhiar kumkhua reng tawh tur William Wordsworth-a chuan London khawpui chu, nu valai tak pasal sûn ta ang maiin a lo ṭah khum tawh a. ‘London, 1802’ hla hril (Italian Sonnet, Rhyme Schem – abba, abba, cdde, ce) hriat reng fo tawh tur kal tlangin Wordsworth-a’n a hmangaih a ram chanchin heti hian min hrilh a nih kha -

Dum, chirh uiha khat tlat ang lo niin,

A sakhuana, sipai chakna, thu hla,

A in ropui, a inchhuanna zawng zawng,

A hlimna kulhpui nen a chim tak hi!

Wordsworth-a hun lai London leh tun huna kan zoram dinhmun hi, zawng fian phel ang hlauh zawng kan ti ngam kher lo a ni thei e. Mahse, kan inanna leh kan inzawlna erawh chhun en vanglai tluka thupbo theih a ni hauh thung lo. Mipuite mai bakah politician-te hlei hlei hian kan nihna leh kan dinhmun dik tak hi kan hai lo tlâng a ni ber e. Tunah tak hian Zofate thinlung ti nâ êm êmtu, chemte zum lova kan thinlai vit ngâihtu, ram leh hnam himna sawng nghing laih tham thil tih, ‘Pathian leh kan ram tân’ tih thupui neitu Party-te’n an nei mêk a.

Chu an thil tih kal tlang chuan, MNF sawrkar lakah Zofate hian vai pakhat Kamrul-a an tih ve mai aiin hlutna reng kan lo nei lo tih hriattirin kan awm ta a ni. Tha thawh hauh lovin Kamrul-a chu Pu Zoramthanga kal tlangin kan mawngah min pet a, kan hmaiah chil min chhâk khum ta a nih hi. Zofate’n lungrual taka, “Ti suh, ti lul suh” tia kan ngen láwm láwmna chu Pu Zorama kaihhruai sawrkar chuan, tin ther tlukah pawh ngai duh lovin kan duh dan leh kan ngenna kalh tlatin 1st Class Contractor – Non Tribal tih hming vuah chawpin, duhsakna nopui a dawmtir duh ta mai a! Pu Zorama thil tih hi politician tân chuan chem lova mahni lu lakna tluk niin, inthlan leh huna inthlan chuh tum ve tawh lo tur ang hrimin Pu Zorama hian Zoram a namnul ta a nih hi.

Heti êma mipuite leh Zofate min tham lotu, min ngai pawimawh lova tin ther tluk pawha min ngai lotu MNF sawrkar hian, eng vangin nge hming chhiat leh sawi chhiat tinreng hlawh huama Kamrul-a a hum luih tak tlat mai chu le? He mi avang hian Aizawl veng pakhata MNF Party Worker, hmei­chhe pakhat chuan Zonet Faksel­na kal tlangin Pu Zoramthanga hi politik aṭanga chawl tawh turin a ngen phah ta hial zu nia! MNF Party mi leh sate zingah hian an Thupui – Pathian leh kan Ram Tân tih kalh tlata an hotute thil tih he thutlukna, Zoram mipuite hriata sawiselna dem ngam pakhatmah an awm dâwn na nge? Hmeichhe pakhat chiah em ni ram leh hnam hmangaihtu MNF Party-ah hian awm?

Inkharkhip vanglai pawha nuai 100 chuang man contract hna thawk thei mi tlem tê zinga tel phâk, Airport a sak a chim chiam pawha a chunga eng hremna mah lekkawh loh, zalenna famkim nena a duhna hmun apianga la kal zawt zawt thei Kamrul-a hi, eng vangin nge Pu Zorama hian heti tak maia a duhsak ni le? Chhan dang a awm thei lo, a phenah hian sum leh paia hlawkna nanêmlo (a sawi kual duh chuan cheng vaibelchhe 9 chuang pawh an ti thei ang chu!) ei tur kan Zorama lal ber hian a neih theih dâwn vang chauh a ni ta ve ang! Kan pu ber hian thluaka sum lut natna a vei ngheh tawh tlat avangin, a khawthlir a tawiin a han zahpah leh mi mitmei han ven buai tumna reng a nei ta lo ni hialin a hriat zo ta a nih hi.

Kamrul-a chungchang thua a thutluknaah kher hi chuan, Party chhûngah ngei pawh inlungrual lohna a thleng ngei tih a hriat theih a. Mak tak maiin party mi leh sa tâna pute thil tih sawisel, kawng dik inkawhhmuhna leh thil dik lo an tih laka inhruai dik tumna lam hawi zawnga insawiselna pawh ni se, a tuartuah a sawiseltute an ṭan let hlauh zel avangin pute thil tih sawisel ngam khawi party-ah mah an awm lo ni hialin a hriat zo tawh a.

Kristian rama rorêltute chuan mipuite duh dan an ngaichangin an ngaihlu ṭhin hle a. Ram ropui kan tih phâk china rorêltute reng reng pawhin, an rorêlsak mipuite duh dan leh ngaih pawimawh chu zah takin an ngaihvenin, a theih hram chuan tihhlawhtlinsak an tum zel ṭhin.

Za-a za Kristiana inchhalte chenna rama rorêltute erawh chuan, an rorêlsak mipuite duh dan leh ngenna chu tual uicho pakhat tluk pawhin an ngaihlu lo a, mipuite zawk chil min chhâk khum lo chauh a nih zawk hi!

- Lalremliana Pachuau