Chakai Farm leh project dang...

SEDP hnuaia Chakai farm siam, chakai 2000 aṭangin 600 vel an dam tih report a awm kha kan la hre hlawm em aw?

He Chakai farm hi pilot project ni tura sawi, sum pawh tam tak senna a ni a, sorkar sum neih loh leh Covid sum indaih loh karah Chakai farm tan chuan sum a lo awm narawh e.

Health Care sum tam tak mipui damlo­te inenkawlna kan sorkarin a batsak mek laiin sum tam tak luan ralna Chakai farm tan chuan sum hi a maka maka tam a lo awm a ni chek ang chu, an seng awlh awlh mai.

Chakai farm aṭanga nung khaw­chhuak ta chakaite hi sum sen aṭanga chhutin hlep nei tur ni lo, sum sen phuhru tur chuan chakai pakhat hi Rs. 5000 chuang vela hralh theih a ngai dawn tlat mai; hei hi keia rawn sawi a ni ngawt loa a hriate sawi dan a ni e.

Fisheries Depart­ment hian he chakai farm siam nan hian cheng nuai 30 chuang zet an seng tih an sawi mauh mai! Hei hi department a thawktu tu emaw sawi pawh ni lovin, he department changtu Minister ngeiin a sawi a ni lehzel a, chakai 1 man cheng sang nga chuanga lei duh hi kan hmu meuh ang emaw chu!

Chakai farm ngawr ngawr hi kan sawi tum a ni ringawt lo, sorkar project fail zing lutuk leh ho lam lutuka mipui sum sorkarin a tiriral fo mai hi a ṭha lo ka ti em a ni zawk. Chakai farm phei hi chu mi tam zawk chuan kan ngaihven lem lo ang a, chu vangin an sum sen ral dan leh a hlawk loh uchuak vel dan hi hriat pawh kan hre lo bawk ang.

Kan sawrkar hian kawng hrang hranga kan hmasawnna tur leh ei leh bara kan intodelh theihna tur hian thil tam tak a lo ti kual ve tawh a. Sum tam tak kan sen thlawn ang hi mimal kutah dahin tihtir (privatise) ta ila sorkarin a fail pui tawh project tam tak hi chu a hlawhtlin ngei pawh a rinawm zawk a ni. Chuti a nih chuan Chakai farm ringawt lo project dang tam tak hlawhchham ta te pawh kha a uiawm khawp mai.

Chung zawng zawnga aia pawi deuh awm leh chu, sorkar project a fail apiang hian a tuartu chu project kalpuitu, kuthnathawktute hi an ni tlat a ni. Anniho tel lo hian sorkar project tam tak hi kalpui hleihtheih a ni tlat lo a ni.

Chuti a nih chuan kuthnathawktuten an huan leh lo siam ai sorkar project beisei awm deuh deuh nia sorkarin a sawi hmuhte kha an han thawk ta ṭhin kha a nia, mahse a tawpah chuan hawi san an ni leh zel a, hlawmchhamna bak an chang ta ṭhin lo hi a pawi em em a ni.

A bikin kuthna­thawktute chuan a rah an seng vat theih loh thil chu eng ang pawhin hlawk dawn mah se, neih sa ei tur an nei ve tlat loh avangin an nghak thei lo a, an mangang mai ṭhin.

Chakai te phei chu kan lui dung zawng zawngah hian a awm deuh vek ang, a hrana sum tam tak senga kalpui fail leh si hi chu sum siam tumna a ang ṭhin ngawt mai. Thil tak tak hi i ti tawh teh ang u.

- Remtluangi