Harh a hun e

Kei putar lehkha thiam lo, mimawl tak hian kan ram kal­hmang hi ka lo thlir ve ṭhin a, kan ramah politics a lo luh ve khan ka tlangval ve tawh a, tuna kan ramin a mamawh tak hi ka sawi ve duh a ni.

Hmanah Pu Ṭhen­phunga a lo lang a, kan ramin power kan mamawhzia a sawi nasa a, Bairabi tuikhuah chu siam turin an bei ta a.

Chutihlai chuan Bairabi-ah ka zuk kal ve a, nikhat chu khawlaiah an project officer ka hmu hlauh mai a, an tuikhuah chu engtiknge an zawh theih ang tih ka zawt a. Ani chuan "Hei hi project lian a ni lova tun aṭanga kum 5/6 ah chuan kan zo fel vek ang" a ti a. Chumi chu kum 1982 a ni. Mahse tuikhuah chu kan pamtul leh ta si a, ka ui a reh thei hlawl lo a ni.

A thiltih leh a rua­hmanna zawng zawng ka thlirin Pu Ṭhena kha ram hruaitu ṭha tak a nih ka ring a, amahah khan beiseina sang tak ka nei a ni. Mahse a hun a lo her liam ta si a.

Kan ramin kan mawmawh ber chu ram hmangaihtu tak tak, ram hmangaih avanga tuar ngam, rethei ngam, eiru lo ngam, hna thawk tak tak peih, nuamsa taka lal taka motor ṭhaa chuanga mam kung kung ringawt lo, thingtlang mite leh mi harsa zawkte harsatna hriatpuitu, anmahni zawla nung peih, mi inngaitlawm; a tawi zawngin sawi ta ila Tripura CM Manik Sarkar ang hi a ni.

Tunge mi ṭha hria ang? Milian tan mi ṭha hriat an har a, an chungah mi zawng zawng kan ṭha asin. Mi harsa zawk thingtlang mite hian mi ṭha chu an hria ang. Anni tan pawh an mit tidel theitu chu an harsat avangin thil pek eng emaw hlek kha a ni thei ang.

Kan ramah hian mirethei leh hausa inkar a zau ve ta hle a, mirethei eng emaw zat hi ka hnena lo kal ve ṭhin an awm a, an retheih dan chu nasa tak a ni. Khawvawh laia ‘zanah kan mulum thei hlawl lo' an ti te hian ka rilru ava khawih tak em! Sa han ei ve te hi ka va chak em an ti a. Ka chak vak deuh lai chuan thingtlang nun hmu tura vah chhuah ve chang ka nei a, khawpuia chengte hian kan unau thingtlanga awmte harsatna hi kan hriatpui tawk lo a ni.

Kan ram hian chhantu a ngai a, tuna kan nun dan hi chu a tawk lo viau a ni. Kan lalṭhutthleng inchuh dan te, ram rorelna hi lal taka nawm chenna hmun tur emaw kan ti tlat te hi thlak danglam a hun a ni.

Ram roreltute chauh pawh ni loin Pathian malsawmna dawng mihausate pawhin in robawm te kha hawng ula, mirethei ten lo ei ve sela a va ropui dawn em...! Chu chu chanchinṭha kan hril ṭhin hi a ni si a. Zoram harh rawh.

- Sanglura Sailo Electric Veng, Aizawl