CHIMRAL KAN NI LO ANG!
Sairang thleng rel a lo lut dawn, an ti a, kan phu suau a. Mizoramah vai sumdawng lian an rawn lut dawn, an ti leh a, kan phu leh suau a. Kil tin kil tangah kan ri ta noh noh mai a ‘chimral a hlauhawm,’ tiin.
Bairabi thleng rel a rawn lut dawn, an tih ṭum khan, ‘chimral kan ni ngei ang,’ kan ti tawh a. Ṭhangkhat lian zet a vei tawh hnuah pawh chimral chu kan la ni ta chuang lo chu a nia! Khatih laia, ‘chimral kan ni ang,’ ti pung pungho khan chimral kan ni ta si lo hi pawi an ti hial lo maw aw, ka ti rum rum!
Engemaw hlekah hian kan phu suau a, kan nghing nghal zel ni ber hian a lang. Hlauhte hi kan han ngah em em khawp ah. Khawchhak lungpui lum kan ti, thim thuah hnih kan ti thul, kan hlau nghal zel mai lehnghal. Tu mumang em mawni te hi kan hlau zel mai bawk a! Kan pianthar dante pawh hi a chiang lo a ni - insawiṭhaih deuh avanga piangtharte hi kan tam lutuk a ni lo maw?
Chimralte hi eng’a tinge maw kan hlauh em em le? Kan inhmu nepin kan inngai derdep lutuk deuh a ni. Kan hnam a naupangin hnam tlemte chu kan ni ngei mai. Mahse, kan nihna bak bakin kan inhmu sikhaw deuh niin a lang. Infuih phur aia insawi ṭhaih kan chin vangte pawh a ni mahna.
Chuti mai chuan Pathian zawn chhuah ram hi chimral kan ni lo ang. Hlauthawng lutuk lo teh ang u. Tin, pawngpaw hlauhthawn hian sawngsawhlawtna a nei chuang lo; ṭul loa philina leh chi-aina mai mai a ni. Kan phili lutukna lamah keimahni leh keimahni hi kan innek khawlo zo ang tih pawh hlauhawm zawk tak a ni.
Pathianin Mizote min zawn chhuah dan hi i lo chhut ve ṭhin tho chu ka ring a - a mak ngawt mai tiraw? Sap ram (Wales) kan tih aṭangin Missionary an rawn kal vang vang a, kan ram chhehvel hnam tam tak kal kanin Chanchin Ṭha min rawn hrilh a nia! Chuti taka Pathianin a hriat ram, a hmangaih leh enkawl, a Chanchin Ṭha hril tura a hnam thlante hi chuti mai mai chuan chimral kan ni lo ang. Mahse, chumi avanga pawng ngaih-ṭhat ngawt chi chu a ni leh si lo.
Kan hnam ṭawng hi kan humhalha ngaihsan nachang kan hriat lehzual a ṭul. Zirna in hrang hrang leh kohhranahte hian kan uar deuh deuh a ngai. Hnam dang ṭawngte hi kan uar ta mah mah deuh a ni. Zirna inahte hian kan hnam ṭawng leh nun phungte hi kan hlamchhiah ta mah mah deuh lo maw? Kan ṭawng hi Pathian min pek a ni a.
Kan hawrawp pawh hi Pathianin min siamsak (Missionary kaltlangin) a ni tih hria ila, kan ngaihhluta kan ngaihpawimawh hian kawng khatin Pathian thu kan awih tihna a lo ni reng mai. Chuti ni lova kan ṭawng hi kan hnualsuat a, kan ngaihpawimawh loh zel chuan chimral kan ni tho tho ang. Hnam dang sumdawng hausa rawn lut lovin phai vai khu rawn chho lo eng ang mah se, chimral kan ni tho ang.
Khawtlang, kohhran leh i in chhungah khan i hnam ṭawng aia hnam dang ṭawng a rik zin zawk a, a rik rin zawk na na na chuan i fate khan hnam dang ṭawng an thiam zawk ang a, i hnam ṭawng chu an theihnghilh daih mai ang. Chutih hunah chuan ‘Mizo’ hming pu si hi kan ‘Mizo’ tawh dawn miah lo. Chumi rual chiah chuan Mizo nun dan ṭha leh hlu nia kan hriat zawng zawng hi a bo nghal bawk ang. Khawnge Mizona chu ni ta ang le?
Ni e, kan hnam nun dan ṭha leh hlu, kan ṭawngte hi kan humhalha kan uar zel a ṭul. Chu baka ram leh hnam humhalh dan ṭha chu a awm chuang lo. Kawng zawha au rual vak vak te leh lo lungawi loh ve viau ringawt hian awmzia a nei tak tak lo.
- Rindika Mizo, Ropaiabawk