‘MZP ve si’ hian phena thil awm an hmu em ni?
Mipuiin heti taka an duh leh lawm em em ni si MZP lamin Vishal hi Mizoram leh hnam tan a him lova an hriat chhan hi keini ang mimawl chuan kan hre ve thiam lova, Whatsapp lama RTI Act hmanga MIMA thil dil chhuah channa thehdarh a nih hnu kha chuan ngaihdan ka nei thiam leh deuh.
Engpawhnise he thil hi thui taka ngaihtuah ngai a nih ka ring a, rin thu leh ngaihdan ka han thawh belh ve hlek duh a ni.
Mizote hi humhalh ngaia kan la inngai a nih chuan hnamdang hminga VAT an pekna lehkha hmuh kha sadai ṭhiatna angin kei chuan ka lo hmu.
Vishal neitu lam VAT pekna lehkhaa Vai hming a lang leh a thlalakte hmuh kha chuan ka ngaihdan ka sawh sawn ṭan tawh a, MZP hi hmuh theih loh hmutu angah ka ngai ṭan tlat a, hei hi mi thiam zawkten sawifiah se ka duh takzet a ni.
Zep thu a cheng lova, keini lo ngaih ve dan chuan zirlai pawl leh pawl ṭhenkhat hi chuan hnam dang hnen aṭang hian pawisa an khawn ṭhin a, chu chu hming mawi tak vuahin ‘donation’ an ti fel êt a. Chu donation an khawn chu Vishal hi an len tham avangin tam tak pe turin an tuk ang a, an pek duh loh vangin an dodal mai mai emaw kan lo ti hman pek a, kei leh ka Mizo puite hi chu zeldin thu mai mai a hnu lawka thutak cheia chei ṭhin kha kan nia.
Tichuan, RTI aṭanga Vishal thil kal vel an han zawh chian kha chuan, Mizo sumdawnna ni lovin Vai sumdawnna lian pui Mizoramah a inbun ta a, a hlawkna pawh Vai kutah a kal dawn. Vai mi hausa tawntaw ni sa khan hausak belh a rawn tum a, chutah chuan bungraw tlawm hmangin min thlem ngam dawn niin ka hre ta.
Keiin ka ngaih seriour lai chu a Vishal emaw, a Big Bazar emaw, a eng mimal thil bik hi ni lovin dan anga Vai an sumdawng thei ta hi a ni a, hei hi hnam tan a pawi dawn a, “A pawi tham lo, Mizote hi thil tawngpawng hlauh ching kan ni,” kan tih mai mai lai hian kan ram ralna tura bul ṭanna a ni thei tih hi ka hmuh thiam dan a ni. Hei hi MZP hmuh dan pawh a nih hmel tlat.
MZP ve si ho hi an chet dan leh an khawsak danah ka thlawp loh chang awm mahse hnam issue-ah hi chuan ka chhuan ber an ni a, anni hi hnam thila kal huai ngam ber leh thawh hlawk ber an ni. Tun ṭum thilah pawh hian MZP hian Vishal hi an haw lova, hnam dang dan anga sumdawnna an kalpui hi an hua niin ka hria, hei hi kei pawhin ka duh lo a ni.
MZP hian eng mi pawh, eng anga lian pawh ni se hnam dangin Mizorama dan anga sumdawnna an kalpui tur hi an do loh chuan kan ram hi chu vai hausa mi 10 vel lek pawhin sumdawnna indonaah chuan an la awp thei ang. Vai mihausa pakhat tan mi nuai 1 chawm hi a harsa lo lutuk a, nuai 10 vel lek kan ni. “Mizote hi hlauh ngah tak kan ni,” kan tih pawhin ka chhanna tur chu, “Nuai 10 tan chuan hlauh tur an tam bik” tih a ni ang.
- Lalzarmawia Chhangte