Kan rawn kal

Nakkum maiah kum 5 chhunga kan ram roreltu tur kan thlang dawn a, political party hrang hrangte pawh an ṭang chho ṭan hle. A hun a hnai tawh miaua, political party tan chuan ṭan pawh a hun viau tawh a ni.

Mizote hian, a bik takin ṭhalaite hian politics hi kan ngaih­ven lo hle a, political party-a inhnam­hnawih tlem a zawng bakin politics hi an sawi peih ngai meuh lo a ni. Hun a kal zel a, khawvel chang­kannain social media platform a rawn hring chhuak a, ṭhalaite pawhin politics kan ngaihven chho ta tial tial a, hei hi keichuan thil lawmawm takah ka ngai.

Politics hi kan ram leh hnam tana thil pawimawh tak a nih avangin ngaihven a ṭul takzet a ni. Mipuite'n politics hi kan ngaihven a, kan duhtui telh telh a nih chuan kan politician-te an fimkhur telh telh ngei ang.

Chuvangin, a bik takin ṭhalaite hian 'politics ngaihven turin ṭhalaite poli­tics khawvelah kan rawn kal ve ta e, kan politician-te u min bum mai mai tum tawh suh u, in hmalakna leh in sum hman dante thlithlai turin kan rawn kal a nia' kan tih ngam a hun tawh.

Politics ngaihven tih hian a huang chhunga tal luh kher tur ka tihna a ni lo a, pawn lam aṭang pawhin a ngaihven theih a ni. Kan politician-te chetdan phung hi pawn lam aṭang pawhin thui tak a hriat theih tawh a, a dik tawk lote chu huaisen takin sel ngam ila, a thawk ṭhate pawh fak hreh miah lo ila, kan politician-te kawng dik zawh turin kan hruai thei dawn a ni.

Mahni party fak­mawi tumna avang leh mahni party ni lo sawisel phet tum ang chi erawh keichuan ka sawi mawi hauh lo. Hetiang ang ṭhalai zingah kan tam chuan kan ram tan a pawi dawn a, hetiang ang mi nih hi chu i tum lo hram ang u.

Rilru fim tak puin kan ram hruaitute hi chik ila, kan ram leh hnam hmangaihna rilru nen teh ṭhin ila, chu chuan kan ram leh hnam kawng dikah a hruai dawn a ni. Kan ram leh hnamin kawng dik a zawh chuan a chhawrtu tur chu nang leh kei kan ni.

Nakkum inthlan hunah ṭhalaite'n rilru fim tak puin kan politician-te kan lo hmachhawn a ṭul hlein ka hria. Thil ṭha tinreng an rawn sawi leh dawn a, an intiam leh nual ang. Chung hunah chuan ṭhalaite hian tih tak tak theih a ni dawn em tihte ngun taka ngaihtuah chungin lo ngaithla ang u.

Sum hmatheh lutuk pawh awm theih a ni a, chungte chu kan ram leh hnam hruai atan a ṭha ngai lo ang tih pawh kan hriat nawn fo a ṭul a ni. A sum sen hmuhlet leh a tum ngei ang. Chuvangin, ngaihtuahna fim tak nen inthlan hma­chhawn ṭheuh i tum ang u.

- Lalramdinthanga